சிறு முயற்சி

ஆல் இஸ் வெல்

2012-01-17T13:09:00.000+05:30

ஈழநேசனுக்காக எழுதிய த்ரீ இடியட்ஸ் படம்பற்றிய பதிவு.

அனைவருமே வெற்றிக்கான பாதையில் தான் செல்ல விரும்புகிறோம். ஆனால் வெற்றியை குறிக்கோளாகக் கொண்டு செயல்படுகிற போது போட்டி, பொறாமைகள், பிரச்சனைகள், தோல்விகள், மனக்கசப்புகள் என்று படிப்படியாக பல தடைகளும் துன்பங்களும் நேரிடுகிறது. வெற்றியின் பின்னால் ஓடாமல் ஒரு நல்ல செயலை எடுத்துக்கொண்டு நல்ல திட்டமிடுதலும் அதை சரியான வழியில் செயல்படுத்தலும் வெற்றியை தன் பின்னால் ஓடிவரச் செய்யக்கூடியதாக மாற்றுவதும் ஒரு புத்திசாலியின் வழியாகும்.

’உள்ளுவ தெல்லாம் உயர்வுள்ளல்’ என்பது போல பல சொற்றொடர்களைக் கேள்விப்பட்டிருப்போம் நேர்மறை எண்ணங்களின் அலைவரிசை நமக்கு வெற்றியைப் பெற்றுத்தரவல்லது. அதையே ‘ஆல் இஸ் வெல்’ என்று சொல்லிக்கொண்டு முட்டாள் பட்டம் கட்டப்பட்ட மூவர் வெற்றிபெற்ற கதை 3 இடியட்ஸ்- ஹிந்தி திரைப்படம்.

சேத்தன் பகத்தின் ’5 பாயிண்ட் சம் ஒன்’ என்கிற நாவலைத் தழுவி அமைக்கப்பட்ட கதை. ’முன்னாபாய் ’எம் பிபி எஸ்’ மற்றும் ’லகே ரஹோ முன்னாபாய்’ போன்ற வெற்றிப்படங்களை அளித்த ராஜ்குமார் ஹிரானி மற்றும் தயாரிப்பாளர் விது வினோத் சோப்ராவின் கூட்டணியில் மூன்றாவது படம் 3 இடியட்ஸ். படம் வெளிவந்த வேகத்தில் வசூலை கொட்டிக்கொண்டிருக்கிறது.

படத்தின் மையக்கருத்தைப் போலவே அமீர்கான் மற்றும் ராஹ்குமார் ஹிரானியின் வெற்றியைச் சென்றடையும் வழி சிறப்பானது. தேர்ந்தெடுக்கின்ற கதையை நேர்மறையாகவும் ( பாஸிட்டிவ்) திரைக்கதையை அமைக்கும் வகை சிறப்பானதாகவும் இருந்தால் மற்ற படங்களிலிருந்து வேறுபட்டு நின்று விடுகிறது. வெற்றி அவர்கள் பக்கம் தானே இருந்தாக வேண்டும். அமீர்கான் தன்னை ரசிகர்களின் அடிமை என்று உருவகப்படுத்திக்கொள்கிறாராம். அடிமை உங்களை மகிழ்ச்சியூட்ட வருகிறார். ஹிரானியால் எதிர்மறையான கதாபாத்திரங்களைக்கூட மிக கொடூரமாக சித்தரிக்கமுடியாது என்கிறார் அமீர். உண்மையில் வாழ்க்கையும் அது தானே. நியாயங்கள் வேறுபடலாம் ஆனால் அவர்களும் மனிதர்கள் தானே.

நம் நாடுகளின் கல்வி முறைகள் இன்னமும் ஒரு அலுவலக குமஸ்தாவை உருவாக்கும் வண்ணமே இருந்துகொண்டிருக்கிறது. மதிப்பெண்களுக்கான முக்கியத்துவத்தின் அழுத்தத்தால் தற்கொலைகள் அதிகரிக்கும் இக்காலகட்டத்தில் சரியான ஒரு கருத்தைக் கையில் எடுத்திருக்கிறார்கள். மிகச்சிறந்த கல்லூரியில் இஞ்சினியர் படிப்புக்காக இணைந்திருக்கும் இளைஞர்கள் மூவரைப் பற்றிய கதை. அமீர்கான் ( ராஞ்சோ) மிகப்பெரிய பணக்காரக் குடும்பத்தைச் சேர்ந்தவராக வருகிறார் . அவருக்கு கல்வி ஒரு பிடித்தமான விசயம். மாதவன் மற்றும் ஷர்மானுக்கு சராசரிக் குடும்பத்தின் உயர்வை அவர்களின் படிப்பு நிர்ணயிக்கப்போகும் அழுத்தம். எதையும் ஆல் இஸ் வெல் என்றபடி தன் என்ணத்துக்கு ஏற்றபடி மாற்றிக் கொள்ளும் அமிர்கானின் வழிமுறையைப் பின்பற்றி நண்பர்கள் வாழ்வில் ஜெயிக்கிறார்கள்.

பொமன் இராணி (வீரு சகஸ்ரபூதே) மிகச்சிறந்த நடிகர் என்பதை இன்னொருமுறை நிரூபித்திருக்கிறார். தன் மகனை தன் இஞ்சினியர் வாரிசாக நினைத்து ஏற்படுத்திய அழுத்தத்தால் பறிகொடுத்துவிடும் பொமன் இரானி கல்லூரியின் டைரக்டர். முதல் நாள் கல்லூரியில் சேர்ந்தவர்களுக்கு அவர்கள் எத்தனை பேரின் கல்லூரிக் கனவினை பின் தள்ளி இங்கே இணைந்திருக்கிறார்கள் என்று கூறுகிறார். அமீர்கானின் துடுக்கான புத்திசாலித்தனமான கேள்விகளால் கோபமுற்று அவரையும் அவர் நண்பர்களையும் முட்டாள்கள் என்றும் அவர்கள் வாழ்வில் செயிக்கப்போவதில்லை என்றும் சொல்லி வருகிறார். அவரை வைரஸ் என்று பெயரிட்டு அழைக்கிறார்கள் நண்பர்கள். அமீர்கானுக்கும் அவருக்குமான காட்சிகளில் பொறி பறக்கிறது.

சதூர் ராமலிங்கமாக வருகின்ற ஓமி வைத்யா அமெரிக்காவில் வளர்ந்தவர் எனினும் ஒரு ஹிந்தி தெரியாத பாகத்து இந்தியனின் அனைத்து குணாதிசயங்களையும் மிகச்சரியாக வெளிப்படுத்தி இருக்கிறார். அவருடைய கதாபாத்திரம் முக்கியமானதும் கதையோட்டத்துக்கு தூண் போன்றதும் கூட . மனப்பாடம் செய்து வெற்றி பெறுபவர்களின் உதாரணமாக வருகிறார். படம் முடிந்த பின்னும் ‘சதூர்’ நினைவில் நிற்கிறார்.

ஷர்மானின் (ராஜூ) குடும்பம் ஒரு சினிமாத்தனமான குடும்பம் என்கிற அறிமுகம் அருமையானது. கருப்பு வெள்ளையில் இருமிக்கொண்டிருக்கும் அம்மா , கைகால் விளங்காத அப்பா, கல்யாணம் செய்யவேண்டிய தங்கை என அவருக்கு வாழ்க்கையில் பயத்தையும் அழுத்தத்தையும் உண்டு பண்ணக்கூடிய பிண்ணனி. ஷர்மான் கச்சிதமாக பொருந்தி நடித்திருக்கிறார்.

கதாநாயகி கரீனாவுக்கான வேடம் மிகச்சிறியதே. ஆனால் அமீர்கானுக்கும் அவருக்குமான ஜோடிப்பொருத்தம் மனதை அள்ளுகிறது. அவருடைய கல்யாணத்தை உடைக்கும் விதமான அமீரின் அத்தனை காட்சிகளும் யதார்த்த நகைச்சுவைகள். சின்னத்திரை நடிகை மோனாசிங்கின் (கரீனாவின் அக்கா) முதல் திரைப்படம். ஒவ்வொரு சிறு பாத்திரமும் கண்களில் நிற்கிறார்கள். பள்ளிப்படிப்பை படிக்க ஏழைச்சிறுவனுக்கு அமீர் கூறும் வழிமுறை முதலிலேயே சிறுகுறிப்பாகச் சுட்டப்படுகிறது.

மாதவன் படத்தின் தொடக்கத்திலிருந்தே கலக்குகிறார். ஃபரான் (மாதவன்) க்கு அவருடைய படிப்பைக்காட்டிலும் வனவிலங்குகளின் புகைப்படக்காரராக வரவேண்டும் என்கிற ஆசை. அவரை தன் அப்பாவை சம்மதிக்க வைத்து வாழ்வில் சரியான பாதையைத் தேர்தெடுக்கவைப்பது ராஞ்சூ. ஷர்மான் பொமன் இராணியின் சதிக்கு உடன்படாமல் தற்கொலைக்கு முயன்று நண்பனைக் காப்பாற்றுகிறான். அதற்கு பின் வாழ்வில் ராஞ்சூவின் வழிமுறையான எதையும் நேர்மறையாக , தைரியமாக செய்கின்றவனாக மாறுகிறான். அவனுடைய தைரியமான , நேர்மையான வழிமுறை அவனுக்கு நேர்முகத்தேர்வில் வேலைப் பெற்றுத்தருகிறது.

சதுர் தான் வாழ்க்கையில் ஜெயிக்க மற்றவர்களைத் தோற்கடிக்கவேண்டும் என்கிற போக்கு கொண்டவராக வருகிறார். அமீரின் பதில் தாக்குதலால் அதுவும் ஹிந்தி பாஷையை புரியாமல் மனப்பாடம் செய்து மேடையில் பேசி அவமானம் அடைவதால் ஒரு சபதம் செய்கிறார். இன்ன தேதியில் நாம் நால்வரும் இதே இடத்திற்கு வருவோம் அப்போது உங்கள் எல்லாரைக்காட்டிலும் நானே சிறந்தவனாய் வளர்ந்திருப்பேன் என்கிறார். அன்றைய தேதியில் நல்ல வேலையும் காசுமாக அவர் வரவும் செய்கிறார். ஆனால் ராஞ்சோ அமீர் மட்டும் திரும்பவில்லை. நிஜமான அறிவாளி என்ன செய்கிறான் என்பதைக் காண நண்பர்கள் அவரைத்தேடிச் செல்கிறார்கள்.

ஜாவீத் ஜாஃப்ரியை சந்திக்கிறார்கள். அவரிடமிருந்து அமீர்கானின் இருப்பிடம் அறிந்து கொண்டு கரீனாவையும் அழைத்துக்கொண்டு பயணப்படுகிறார்கள். இக்காலகட்டத்தில் ராஞ்சோவின் வழிமுறையிலேயே அவர்கள் எல்லா விசயத்தையும் கையிலெடுத்து ஜெயிப்பது அவர்களுக்கு நண்பனின் தாக்கம் எந்த அளவுக்கு என்று துல்லியமாகக் காட்டுகிறது.

3 இடியட்ஸ் உடன் எதாவது ஒரு நல்ல தமிழ் திரைப்படத்தை ஒப்பிட நினைத்தால் ‘பசங்க’ படத்தை ஒப்பிடலாம். இருந்தாலும் தமிழில் மறுஆக்கம் வர இருக்கிறது. இக்கூட்டணியின் முதல் இரு படங்களைப்போலவே இதிலும் மிக அதிக உருக்கமான காட்சிகள் வருகிறது. மழை நாளில் மோனாவுக்கு அமீரே குழந்தை பிரசவிக்கச் செய்வது போன்ற காட்சிகள். மற்ற கமர்சியல் படங்களில் வரும் பத்து பேரை அடித்து ஒடுக்கும் ஒரு ஹீரோவின் இன்னோரு அற்புதமே. சினிமாத்தனங்கள் இணையாத கமர்சியல் படமாக இருப்பது இயலாத காரணமாக இருக்கலாம். சொல்ல வந்த விசயம் காரணமாக மக்கள் மனதில் இடம்பிடித்து வசூலில் குவிப்பதில் சாதனைப் படைத்திருக்கிறது 3 இடியட்ஸ்.

இன்று ஆல் இஸ் வெல் என்பது அனைவரின் வாயிலிருந்து அன்றாடம் வெளிப்படுவது படத்தை சரியாக விளம்பரம் செய்கிறது.
அபீஜீத் மற்றும் ராஜ்குமார் ஹிரானியின் வசனங்களின் கச்சிதம் வெகுவாக பாராட்டப்பட்டிருக்கிறது. லடாக் வரை கண்களை கொள்ளை கொள்ளச்செய்யும் காட்சிகளை விரித்திருக்கிறார் . c.k.முரளீதரன் இசை துள்ளல். ஷூபி தூபி ரபப்பா..

ரசியுங்கள் , சிரியுங்கள் , உருகுங்கள். ஆல் இஸ் வெல். எல்லாம் நன்மை பயக்கட்டும். -கயல் லக்ஷ்மி

எண்ணப்பின்னல்கள்

2011-12-21T09:42:00.000+05:30

எண்ணப்பின்னல்கள்
பின்னலும் பிரித்தலும்
பிரித்தலும் பின்னலுமாய்

பின்னிக்கொண்ட மகிழ்ச்சிகள்
மகிழ்விழை இழைந்தோர் நிலையும் - நீ
நிலைத்த நெஞ்சில் ஈரமுமாய்

ஈரவிழிச் சொற்கள்
சொல்லிழந்தோர்ப் புள்ளியில் மலரவும்
மலர்மனதில் எண்ணப்பின்னல்கள்

முதல்முறையாக பின்னல்கோலாட்டம் கண்டபோது தோன்றியது முதல் மூன்றுவரிகள்

உள்வெளி

2011-12-11T12:42:00.002+05:30

கோணங்களை மாற்றிவைத்தாலும்
அக எதிரொளிப்பில்
ஒளியிழைகளைப் பற்றி
மேலேறி நிற்கிறது
குறுக்குவெட்டிலும் நோக்கி
பிழைகளைப் பட்டியலாக்கி
முடிவுகளை மேலேற்றி
வடிவம் செய்கிறது

சத்தமின்றி சில உயிர்களை
அச்சட்டகத்திலாக்கி
பார்வைக்கு மறைவாய்
அலையத்தொடங்குகிறேன்.

வின்மீண் தொலைவில்
வேறொரு உலகம் சமைத்தும்
பருவங்களில்
நீர் வற்றாத ஓவிய ஆறாக
உள்ளே தான் உறைந்திருக்கிறதது

உள்ளோடும் ஈர்ப்பில்
சுருங்கி சுருங்கி
அளவில்லாததும்
உருவில்லாததும் ஆனபின்னும்
நிரம்பாத வெற்றிடமும் கொண்டு..

இம்மாத வடக்குவாசலில் வெளிவந்திருக்கும் என் கவிதை

பேரருள்

2011-11-30T08:24:00.000+05:30

காணிக்கை என்பதும் கையூட்டாய்
கடவுள் கூட அவர் கூட்டாய்
பால்வெண்மையில் கரையுமோ
சிவப்பு நிறப்பாவங்கள்
கண்கள் மூடிய அரையிருட்டில்
தள்ளுமுள்ளு இல்லாத
தரிசனத்தில்
தள்ளுபடியானதோ கணக்குகள்?
மனமிரங்கக் கேட்டோர் குரல்
மலை எதிரொலிக்க பட்டு
திரும்புவதோ
வாழ்வின் திருப்பம்?
நீளும் உயிரும்
நெருக்கிய இருளுமாய்
தவித்த இரைச்சல்களை
கடந்த கால்கள்
இன்று யாத்திரையோ?
குற்றம்சுட்டிய விரல்கள்
நெஞ்சு துளைக்க
இன்றவர் கூப்பியகரங்களோ?
இல்லையென்றார்
இருக்கின்றாரென்றார்
நிலையானவர் என்றார்
நிலையுயர்த்துவார் என்றார்
நிலையாக நிற்பவரே
உம்நிலை தான் என்ன?

டிசம்பர் 2009 - ஈழநேசன் தளத்தில் வெளிவந்த எனது கவிதை

கூட்டம்

2011-11-27T20:31:00.001+05:30

வண்ணக்குழம்புகள் பூசிய முகங்கள்
ஒன்றேபோல உடைகள்
புடைத்த நரம்புகள்
கனத்த குரல்கள்
குறிக்கோள் தாங்கிய கண்மணிகள்
வீசி உதறி குதித்து
ஓரோர் பக்கமாய் நிமிர்ந்து நின்றனர்.

பறவையைப்போல்
சிறகுவிரித்துப் பறந்தான் ஒருவன்
மஞ்சள் வண்ணம் ஒளிரும் முகம்
சிரிக்கக் கண்டார்கள்.

நிமிட இடைவெளியில்
புகுந்தான் ஒருவன்
திரண்ட தோளுக்குரியவனாய்
கருமையும் செம்மையுமாய்
வண்ணக்கலவை மிரட்ட
உரக்கக்கூவினான்
யார் நீ? யார் நீ?

நான் நீ! நான் நீ!
குழம்பி உரைத்தான் இவன்.
மறுத்துச் சாய்த்தான் ஒருவன்..
மடங்கி சரிந்தான் இவன்..
இதயம் கனத்தது என்றது கூட்டம்.
எதையோ இழந்தோம் என்றது கூட்டம்.
பேசிக் கலைந்தது கூட்டம்.
கூட்டம் விட்டுச்சென்ற
முகமூடிகளைப்
பொறுக்கிச் சேர்த்தான் ஒருவன்.

நன்றி:
22 ஜூலை 2009 ல் ஈழநேசன் முல்லை இணைய இதழில் வெளிவந்த என் கவிதை.

யந்திரவாகனன்

2011-11-16T14:07:00.004+05:30

சிறுமுயற்சிக்கு 5 வருடம் நிறைந்துவிட்டது.
அதற்கு காரணமாயிருந்த நட்புகளுக்கு என் நன்றிகள்.

நான் செம்படம்பர் மாதம் தில்லி ஹிந்தி அகடமியில் கவிதை வாசித்தபோது என்கவிதைகளை மொழிபெயர்த்து தந்த பாலசுப்ரமணியம் சார் அவர் மொழிபெயர்த்த இப்புத்தகத்தை தன் நல்லாசிகளோடு கையெழுத்திட்டுத்தந்தார்கள். நாவலை மற்ற கதைகளைப்போல நான் வேகவேகமாக கடக்கவே முடியவில்லை. நாலோ ஐந்தோ பக்கம் படித்துவிட்டு மூடிவைத்துவிட்டு நானும் அவரைப்போலவே உள்ளே யோசிக்கக்கூட ஆரம்பித்துவிட்டேன். யோசனை ஓடி ஓடி ஒரு சில கவிதைகள் கூட எழுதிவைத்தேன். மனசுக்குள்ள(யும்)யே பேசித்தீர்த்துக்கிறவங்களுக்கு இந்தக்கதை படிக்க ரொம்பவுமே பிடிக்கலாம். உடலைத்தேர் என்றும் ஆத்மாவை தேரோட்டி என்று கொண்டதாக உருவகிக்கும் ஆழமானதொரு கதையை மொழிபெயர்த்தவரே எனக்கு பரிசளித்தது மிகப்பெருமையாக கருதுகிறேன். நன்றி சார்.

[கவிதை வாசிப்பு நிகழ்ச்சியை இங்கே யூட்யுபில் காணலாம்..
என்கவிதைகளின் முதல் மேடை..பிழைகளைப் பொறுத்தருள்க. கவிதை வாசிப்பு நிகழ்விற்கு என்னை பரிந்துரைத்த திரு ஷாஜகான் அவர்களுக்கு சிறுமுயற்சியின் பாதையில் ஒரு முக்கிய நிகழ்வை தந்ததற்காக தனிப்பட்ட நன்றியை இங்கே தெரிவித்துக்கொள்கிறேன்.

ஹிந்தியில் என் கவிதைகள்

இரண்டு கவிதைகள் ராஜஸ்தானி மொழியில் திரு நீரஜ் தையா அவர்களால் மொழிபெயர்க்கப்பட்டுள்ளது.]

--------------------------------------------
யந்திரவாகனன் - சந்திரசேகர் ரத் ஒரியா மொழியில் எழுதிய நாவல்.
ஹிந்தியில் - சங்கர்லால் ப்ரோஹித்
தமிழில் - திரு ஹச்.பாலசுப்ரமணியம்

தாசர் என்கிற கிராமத்துக்கோயிலில் பூஜை செய்கிற மனிதரோட கதை. கிடைக்கிறதை விட அதிகமா எதிர்ப்பார்க்காத நிம்மதியான மனுசனான தாசர் ,உலகத்து வாழ்வில் வாழ்வதைவிட மனசுக்குள் ஒரு வாழ்க்கையை தனியா வாழ்ந்துகிட்டிருக்கார். சொல்லப்போனா அவர் மனசுக்குள்ள வாழற வாழ்வைத்தான் முழுமையா வாழ்ந்தார்ன்னு நினைக்கிறேன்.

தோட்ட வேலை செய்கிற மாலியையும் சத்பதி போன்ற தத்துவநெறிகளை அறிந்த மனத்தெளிவு கொண்டவராக மதிக்கப்படறவரையும் சமமாக ஞானிகளாக பாவிக்கிறார். அவர்களை ஏறக்குறைய துலாபாரத்துல ஒரு தட்டில் வைத்து தன்னை அஞ்ஞானியாக மற்றோரு தட்டில் வைத்து உள்ளுக்குள்ளேயே தர்க்கம் செய்துக்கிறார்.

பழமையான எண்ணங்களில் தத்துவங்களில் பழகிப்போன வாழ்க்கையை வாழ்ந்தாலும் அவரோட மனசுக்குள்ளே அவற்றை கேள்வியும் கேட்டு விவாதம் செய்கிறார். பசுவை தானம் குடுக்கச்சொல்லி ஒருவருக்கு சொல்லிவிட்டு அதை தனக்கான ஆதாயத்துக்காக சொல்லிவிட்டோமோ என்ற குற்ற உணர்ச்சியில் மனுச மனங்களின் கள்ளங்களை அவர்களின் நேர்மையைப்பற்றி கேள்விக்கேட்டுக்கொள்கிறார். விதியைப்பற்றி இறந்த பின்னான உலகம் பற்றியும் படித்தவனானாலும் நீலகண்டருக்கு இருக்கின்ற பொறாமையைப்பற்றியும் நீளநீளமாக யோசித்து நேரம் கடத்தி மனைவியின்

“இப்படியே தான் உக்காந்திருக்கப்போறீங்களா ?”

போன்ற அதட்டலில் நிகழுலகத்துக்கு வந்து வந்து போகிறவர்.

புரிக்கு திருவிழா பார்க்க குடும்பத்தை அழைத்துச்செல்லமுடியாத நிலையில் ..

“கோவிந்த தூவதசி வர்ரது எல்லாரும் கிளம்பராங்க , புண்ணியம் சம்பாதிக்கவா போறானுக ? அட ஒரு ஆடு நொண்டித்துன்னு பின்னால் வர எல்லா ஆடும் நொண்டுமே அது மாதிரி கதைதான்”

என்று திருவிழாவில் கடையும் கொண்டாட்டமும் என்று கடவுளை நினைக்காதவங்களை பற்றி குறைபட்டுக்கொண்டே மனைவியின் புலம்பலிலிருந்து தப்பித்து கோயில் வாசலில் தூங்கிய தூக்கத்தின் நடுவில் கனவில் அவர் புரிக்குச் சென்று கடவுளையும் தரிசித்துவிடுகிறார்.

ரயில் வண்டியிலிருந்தே ஜெகன்னாநாதனை நினைத்தபடி கூட்டத்தில் முண்டியடித்து

‘ஹே பரந்தாமா! ஈரேழு பதினாலு லோகமும் உன்னுடைய லீலாபூமி . பிரபு! உனக்கு இதெல்லாம் ஒரு பொருட்டா? அகற்றிடு மேகநாதர் மதிலை..மேகத்தின் பக்கமாக உயர்த்தி விடு இதை. எவ்வளவு தூரத்திலிருந்து உன்னை தரிசிக்க வந்திருக்கு ஜனகோடிகள். ஏழை எளியவர் எல்லாரையும் உள்ளே நுழைய விடு . எல்லாரும் பக்கத்தில் வரட்டும் .. ஹரி ஜெகந்நாதா! ஜெய் ஜகன்னாதா!உன்னைக் கண்களால் பருகும்போதே இந்த உயிர் பிரிஞ்சுடனும்

என்றபடி மற்றவர்களுக்காகவும் வேண்டி உருகி வழிபடும் அவர் உள்ளுக்குள் கண்ட தரிசனத்தைப் போல கோயிலுக்கு போனவர்கள் கூட கண்டிருக்கமுடியாது.

சத்பதியைப்பற்றி மாலியும் தாசரும் உரையாடுவதிலும் சத்பதியிடம் விவாதிக்கிற இடங்களிலும் தத்துவங்களை கேள்விகேட்டு புரிந்துகொள்ள முயல்கிறார்கள்.

ஒருநாளானால் மனைவியும் குழந்தைகளும் தன்னை வாழ்க்கையில் பெரும் மோகத்தில் ஆழ்த்தும் சக்திகளென்று வெறுத்து யோசித்தாலும் மருத்துவம் பார்க்க பணமில்லாமல் மனைவியும் ஒரு மகனும் இறந்த பின் மனைவியின் மேலான அன்பு மேலிட மனம் பேதலித்து நிற்கிறார்.

தனக்குள்ளே பேசி தர்க்கம் செய்து வாழ்ந்தவர் பேதலித்த மனதோடு வாய் வார்த்தை குறைந்து உள்ளுக்குள் ஆமைஓட்டுக்குள் சுருங்கியது போல இருக்க, அவரின் மனம் மாற்ற கொள்ளவேண்டுமென்று சத்பதி தலயாத்திரை அழைத்து செல்கிறார். மௌனச்சாமியாராக..காசிக்கு சென்று கங்கையில் முங்கி சிவனை தரிசிக்க செல்லும் வழியில் அவருடைய பேதலித்த நடையைக் கண்டு கடைக்காரர்கள் தாமாக அவரையும் பூஜித்து, கடவுளுக்கு சாத்த பூவும் பொருட்களும் குடுக்க..

‘கடைசியில் பிச்சையும் எடுத்தாய் இல்லையா?’
இவர்களுக்கு என்ன பைத்தியமா? என்னை மதிப்பதற்கு ..காசியில் எது வேண்டுமானாலும் நடக்கும். தினம் ஒரு மகான் தோன்றக்கூடும் மனிதனைபிடித்து மகானாக்குவதற்கு எவ்வளவு நேரம் பிடிக்கபோகிறது

என்றபடி சத்பதி மகராஜிடம் வேடிக்கையாக .. காசி மக்களுக்கு பக்தி ஜாஸ்தி இப்படி பைத்தியம் பிடிச்சு என்னையும் பைத்தியமாக்கிவிட்டார்கள் என்று சொல்கிறார்.

எவ்வளவு மனைவியை மறக்க நினைக்கிறாரோ அவ்வளவு அவள் நினைவுக்கு வருவதை

‘’” இந்த டுக்கு அம்மா அடிக்கடி நினைவுக்கு வராளே ஏன் ? ஒரு நாழிகைப் பொழுதாக நானும் பார்க்கிறேன் அவள் ஞாபகமே வருதே! மனம் ரொம்ப சஞ்சலமடைகிறது’ மதுரா பிருந்தாவன்னு சொல்றாளே எப்படி இருக்கும் போய் வரலாமா என்றாள் நான் சிரிச்சி மழுப்பினேனே.. அவ ஆத்மா மறந்திருக்காது . அவளும் கூடவே வந்திருக்கா. என் சரீரத்தில் புகுந்து அவளும் பிருந்தாவன் பார்ப்பா போலிருக்கு. //

தாசரும் அவரை மனசமாதனம் படுத்த

இவ்வளவு தூரம் கிளம்பி வந்தது அதையெல்லாம் விடறதுக்குத்தானே . நீர்தான் வீணாக நிழலை பார்த்துண்டு ஓடறீர்’

இல்லே சுவாமி! வெளிச்சத்துக்கு வரும்போதெல்லாம் நிழலையும் கூடவே கொண்டுதானே நடக்கவேண்டி இருக்கு.

ஒளியை இலக்காகக் கொண்டு நாம் முன்னேறினா நிழல் தானே
பின்னடைஞ்சுடாதா? அதுக்கு போய் கவலைப்படுவானேன்?’

அப்ப நிஜம்மாவே நிழல் விட்டுப்போயிடும்ன்னு சொல்றேளா? ஒளிபக்கத்தில் வரவர நிழலும் அதிலிருந்து சக்தியைப் பெருக்கிக்கும் . ஒளியோட சேர்ந்துட்டா அங்க நிழல் இருக்காதே. அது ஒளியில் லயித்துவிடும்’

எத்தனையோ சிந்தனைத்தெளிவாக ஓரொரு சமயம் பேசினாலும் ,தன்னை சுற்றி நடப்பதையோ , பேச்சுக்களையோ உணரமுடியாத நிலையிலேயே சிலநாட்கள் குழம்பி பின் மனைவி ஆசையாக செல்லவேண்டுமென்றாளே அந்த ஜகன்னாத புரியில் இறக்க ஆசைபடுகிறேன் என்று அங்கேயே சென்று இறக்கிறார்.

படித்தவராகவும் இந்த சாதரண மனுசன் மேல பொறாமையும் கொண்டிருந்தவராகவும் இருக்கிற நீலகண்ட பண்டிதருக்கும் தாசருடைய மரணத்திற்கு பின்பு அவரின் மகத்துவம் ,பொறாமையற்ற எளிமையான மனது புரிகிறது.

தமிழ்மீடியாவில் பதிவு அறிமுகங்கள் -1

2011-10-24T13:39:00.003+05:30

சிலவருடங்களுக்கு முன்பு 4தமிழ்மீடியா தளம் உருவாகியபோது அங்கே வாரம் ஒரு வலைப்பூ என்ற ஒரு பகுதியைத் தொடங்கபோவதாகவும் அதற்கு சில அறிமுகங்களைத் தரவேண்டும் என்றும் அதன் நிர்வாகத்திலிருந்து நண்பவரொருவர் கேட்டிருந்தார். வலைச்சரத்தில் பொறுப்பாசிரியராக இருந்து சில நல்ல அறிமுகங்களைக் கொடுத்துக்கொண்டிருந்ததை நினைவில் கொண்டு அப்பொறுப்பை அவர் கொடுத்திருக்கலாம். அவருக்கு நன்றி. முக்கியமாக நான் அதனை ஒத்துக்கொண்டதற்கு காரணம் அப்போது தமிழ்மணத்தில் வந்துவிழும் அத்தனை பதிவுகளையும் வாசித்துத் தள்ளிக்கொண்டிருந்தேன்.

அந்த அறிமுகங்களை ஒரு சேமிப்பிற்காக இங்கே சிறுமுயற்சியில் பதிந்து வைக்கிறேன். இதில் வெளிவந்திருக்கும் பதிவுகளில் சில என் நண்பர்களுடையதாக இருந்தாலும் கூட அந்த நண்பர்களுக்கே அது வெளிவந்த போது நான்தான் அறிமுகம் எழுதி இருந்தேனென்று தெரியாது. இப்பொழுது கூறுவதால் ஏன் எழுதினாய் என்றோ? மற்றவர்களை குறிப்பிடவில்லையென்றெல்லாமும் யாரும் தவறாக நினைக்கப்போவதில்லை என்று ஒரு நம்பிக்கை . முதல் பத்து பதிவுகளைஇங்கே காணலாம்.

1. குழந்தை வளர்ப்புக் குறித்த வலைப்பூ

இணையஉலகில் ஆங்கிலத்தில் குழந்தைவளர்ப்பு பற்றிய குறிப்புகள் கொட்டிக்கிடக்கின்றன.. தமிழில் அதன் அவசியத்தை உணர்ந்து சில பெற்றோர்களின் இணைந்த முயற்சியில் இந்த வலைப்பதிவு நடத்தப்படுகிறது. குழந்தைகளிடம் நம் அணுகுமுறை எப்படி இருக்கவேண்டும்? மற்றும் குழந்தை வளர்ப்பில் நேர்கிற தவறுகளை சுட்டிக்காட்டி அதற்கான தீர்வுகளும் வழங்குகிறார்கள். மேலும் குழந்தைகளுக்கான உணவுகள் , கல்வி பற்றிய விசயங்களும் காணலாம்.ஒரு சிறுகுழந்தையைப் போலவே மலர்ந்து (வளர்ந்து) வரும் இந்த பதிவின் வெற்றிக்கு வாழ்த்துகள். "பேரன்ட்ஸ் கிளப்" எனும் இவ் வலைப்பூவினைக் காண

2. மென்பொருள் முகவரி தரும் தமிழ்நெஞ்சம்

இவர் இன்னது தான் எழுதுவார் என்று நம்மால் வரையறுக்க இயலாது. குறிப்பிட்டு சொல்லவேண்டும் என்றால் இணையத்தில் கிடைக்கின்ற மென்பொருளுக்கு அறிமுகம் தந்து வருகிறார்.எங்கிருந்து நீங்கள் தரவிறக்கம் செய்யலாம் என்பவற்றையும் கூறுவதோடு அவற்றினை ஓரிடத்தில் தொகுத்தும் அளிக்கிறார். ஆடியோ வீடியோ எடிட்டிங்க் மென்பொருள்கள் ,ரீசைக்கிள் பின்னை காலி செய்த பின்னும் கோப்புக்களை பெறுவது எப்படி? இவை சில உதாரணங்கள்.தமிழ் 2000 வலைப்பதிவுக்கு சென்று பாருங்கள். சலனப்பட வரிசைகள் அதிகம் இடம்பெற்று இருக்கின்றதென்றாலும் அவைகளிலும் எப்படி ? எப்படி? வகை சார்த்தவைகள் இருக்கின்றன. பயனுள்ள பதிவு.

3. தமிழில் புகைப்படக் கலை
தமிழ் வலைப்பதிவுகளிலேயே மிகவும் அதிக வரவேற்பைப் பெற்றவற்றில் இந்த கூட்டுவலைப்பதிவுத்தளம் முக்கியமான ஒன்றாகும். புகைப்படக்கலையில் ஆர்வமிகுந்தவர்கள், அக்கலையின் நுணுக்கங்களை தாங்களாகவே கற்றுக்கொண்டு வருபவர்களின் முயற்சி. எனினும் மற்றவர்களையும் போட்டிகளின் மூலம் கவர்ந்துவருகிறார்கள். மாதாமாதம் நடத்தும் போட்டிகளில் கலந்துகொள்பவர்களின் எண்ணிக்கை கூடிவருவது தளத்தின் வெற்றி. இந்த போட்டியில் பங்கேற்பதற்காகவே சிலர் பதிவுகளை தொடங்கியது சுவாரசியம்.

முதலில் எளிதான நிறங்கள், இயற்கை என்ற தலைப்புகளில் வந்த போட்டி பின் இரவுஒளியில் எடுக்கப்பட்ட புகைப்படம், பிரதிபலிப்புகள் போன்ற போட்டியாளர்களுக்கு சவாலான தலைப்புகளை நோக்கி முன்னேறி வந்திருக்கிறது. வெற்றிபெற்றவர்களின் குறை நிறைகளை அலசி ஆராய்ந்து கூறுகிற நடுவர்கள், அந்த போட்டிகளின் மூலமாகவே, நுட்பங்களை கற்றுத்தந்து வருகிறார்கள்.போட்டிகள் தவிர்த்து படம் செய்யவிரும்பு தொடர் மூலமாக ஃபோகல் லென்த் , ஒயிட் பேலன்ஸ் ,ஷட்டர் ஸ்பீடு போன்றவைகளை விளக்கமாக அறிந்து கொள்ளமுடிகிறது.

மிகச்சிறிய அளவிலான பொருள்களை படமெடுப்பது எப்படி? லென்ஸுகளை மாற்றி உபயோகிப்பது மூலம் அவற்றை துல்லியமாக காட்டுதிறன் அதிகரிக்கிறது மேலும் பிற்தயாரிப்பு என்கிற வகைகளில் எடுக்கப்பட்ட படங்களை மேலும் மெருகேற்றும் தொழில்நுட்பங்களை எளிமையாக தருகிறார்கள்.நீங்கள் எந்த வகையான புகைப்படக்கருவி வாங்கலாம் என்பதற்கான ஆலோசனைகளும் கிடைக்கின்றது.
மொத்தத்தில் ஒரு குழுவாக இணைந்து இயங்கும் இவர்கள், பதிவில் எழுதுபவர்கள் மட்டுமில்லாமல் வாசிப்பவர்களும் பங்களிப்பவர்களுமாக மிகப்பெரிய குழுவாக முன்னேறிவருகிறார்கள். தமிழில் புகைப்படக்கலை வலைப்பதிவுலகில் ஒரு ஆரோக்கியமான முயற்சி

4. இணையத்தில் ஒரு இயற்கை போராளி

இயற்கையின் கணக்கு தெரியுமா?. மண் + மரம் = மழை , சோலைவனம் . மண் - மரம் = - மழை , பாலைவனம். மழை - மரம் = வெள்ளம் , மண் அரிப்பு. ''இயற்கை நமக்கு கற்பதற்கு நிறைய தருகிறது. நாம் கற்க மறுக்கிறோம். விளைவுகளை நாம் தினமும் செய்தியாக படிக்கிறோம், பார்க்கிறோம். காலம் தாழ்த்தாமல் கற்க ஆரம்பிப்போம்.'' என்றபடி இங்கே இணையத்தில் ஒரு இயற்கை போராளியாக உருவெடுத்திருப்பவர் பதிவர் வின்சென்ட்.
இயற்கைக்கு எதிரான பாலிதீன்களிடமிருந்து மீண்டுவர அழைக்கிறார். பசுமைப்புரட்சியால் இழந்தோம்! இயற்கை விவசாயத்தால் உயர்வோம்! என்கிற இவரின் பதிவுகள் அனைத்திலும் நாளைய உலகின் இயற்கை சூழலுக்கான நல்லெண்ணத்தை காணமுடிகிறது. மரம் வளர்க்க வங்கிகளின் கடனுதவிகள், வேளாண்மை தொடர்பான பயிலரங்க அறிவுப்புகள் போன்ற தகவல்கள் தருகிறார் .

வெட்டிவேரின் சிறப்புகள் பற்றிய அவரின் பதிவுகளில் களை என்று ஒதுக்கும் வெட்டிவேரின் இயற்கை பாதுகாப்பு திறமையையும் கைத்தொழில் பயன்களையும் எடுத்துரைக்கிறார். ஜப்பானிய இயற்கை ஞானி மாசானபு புகோகா ,கேரள அலையாத்தி காடுகளின் பொக்கூடன், நோபல்பரிசு பெற்ற ஆப்பிரிக்க வங்கேரீ மாத்தாய் ,பிஷ்னாயி இன மக்களின் மரங்களின் மீதான அன்பு, grow bag என காணக்கிடைக்கும் ஒவ்வொரு பதிவும் இயற்கையோடு இசைந்த வாழ்வுக்கான படிப்பினைகளை தருகிறது.

மண் மரம் மழை மனிதன் இணையத்தில் ஒரு இயற்கை போராளியின் முயற்சி.. முயற்சிக்கு தோள்கொடுப்போம்.

5. புது வண்டு எனும் கதை சொல்லி

வலைப்பூவினில் தேன்குடித்து இளைப்பாற வந்த சிலநாட்களில் புதுமுயற்சி ஒன்றைத் தொடங்கி இருக்கும் புதுவண்டு இவர். அனைவரையும் போல வாழ்வில் தான் சந்திக்கின்ற நிகழ்வுகளையும், கருத்துக்களையும் ,மலரும் நினைவுகளையும் பதியத்தொடங்கினார். குழந்தையின் முதல் ஆசிரியை , தாய் என்பது அறிவோம். இன்றைய குழந்தைகளுக்கு அறிவுரைகளை வழங்குவது எளிதான காரியம் இல்லை. இதற்காக ஒரு கதைசொல்லியாக உருவெடுத்திருக்கிறார் புதுவண்டு. வண்டு சிண்டு என்ற இரு பொம்மைகளின் புகைப்படங்களை கொண்டு காட்சி அமைப்பும் பிண்ணனியில் குரல் கொடுத்தும் இயக்கி இருக்கிறார். காட்சிகளின் எளிமை, கனிவான குரல் என்று குழந்தைகளை கவர்வதாக இருக்கின்றது.
அதிகம் இனிப்பு சாப்பிடுவதால் என்ன ஆகும்? வண்டுவுக்கு வந்தது போல வயிற்றுவலி வரும். ஆனால் அவர் மகனின் வருத்தம் உணர்ந்து தாயாக கதையின் முடிவை மாற்றி மறுநாள் சரியாகும்படியா மாற்றிவிட்டார். கதையின் தாக்கம் அவர் குழந்தையிடம் என்ன என்பதையும் சிறு பின்குறிப்பாகத் தருகிறார்.

தமிழில் சிறுவர் இலக்கியங்களுக்கான படைப்பாளிகள் மிகவும் அரிதாகவேயுள்ளார்கள். தமிழகத்தில் அழ.வள்ளியப்பா போன்ற குழந்தைகளுக்கான எழுத்தாளர் தொடர்ந்து உருவாகதது, எங்கள் பிள்ளைககளின் துர்ப்பாக்கியமே. இலங்கை வானொலியில் மாஸ்டர் சிவலிங்கம் என்றொரு கலைஞர் இருந்தார். சிறுவர்களுக்கான கதைசொல்லும் அற்புதமான கலைஞன் அதன்பின் அந்த இடம் இற்றை வரைக்கும் நிரப்பப்படவில்லை. அந்த இடங்களின் வெற்றிடங்களை, எங்கள் வீட்டுக் கூடத்துக்கு வந்த தொலைக்காட்சிகள் ஆக்கிரமித்துக்கொள்ள, எங்கள் பிள்ளைகள் அது சொல்லும் "எவா..அவா.." வார்த்தைகளில் பரிச்சயமாகின்றார்கள். இந்த நிலை மாற்றமுற, இத்தகைய புதுவண்டுகளின் வரவு மிக அவசியமானது. அவரின் இப்புதுமுயற்சிக்கு வாழ்த்துக்கள்.

வாருங்கள் வண்டின் கதை கேட்க

6.இசைக்கு மயங்காதோர் யார்?
இவ்வார வலைப்பதிவின் தாரக மந்திரம் ரசிக்கத்துவங்கிவிட்டால் , ருசிக்கத்துவங்கிவிடலாம் வாருங்கள் இசையின் நுணுக்கங்கள் அறிவோம் . கர்நாடக இசை , திரையிசை , திரையிசையில் கர்நாடக இசை மேலும் இளைஞர்களுக்கு ஜாஸ் ப்ரைய்ன் ஆடம்ஸ் என ஃப்யூசன் கூட்டுப்பதிவு. திரையிசையில் காப்பியடிக்கப்படும் பாடல்களை சொல்லும் சினிமா காரம் காப்பி.வீணையில் ருத்ரவீணை ,சரஸ்வதி வீணை , கொன்னக்கோல், சாரங்கி , புல்லாங்குழல் , வயலின் போன்ற ஒவ்வொரு வாத்தியங்களைப் பற்றிய குறிப்புகள்.அவை பயன்படுத்தப்பட்டு அழகூட்டப்பட்ட பாடல்கள்.

இசையைக்கேட்டுக்கொண்டிருக்கையில் அதன் பிண்ணனியில் நிகழ்ந்த தகவல்களையும் பரிமாறுகிறார்கள். கீர்த்தனைகள் புனையப்பெற்ற காலத்தில் நிகழ்ந்த நிகழ்வுகளையும் கதைகளாக அறிகிறோம். ராக சாயல்களை கண்டுபிடிப்பதுவே ஷெர்லாக் ஹோமெஸ் க்தை மாதிரி ஒரு அலாதி இன்பமான விஷயம் . கண்டுபிடித்ததை பின் கேட்பதுவும் ஆனந்தம் அல்லவா? இசையில் ஆர்வம் மிகுந்தோருக்கு இனிய கலந்துரையாடலைப்போன்றதொரு இசைக்கல்வி . செவிக்கின்பம் , இதயத்திற்கின்பம் தரும் இசையின்பம் குழுவினருக்கு வாழ்த்துகள். வாருங்கள் இசை இன்பம் இரசிப்போம்

7. வருத்தப்படாத வாலிபர்கள் சங்கம்
/வடிவேலுவின் திரைப்படத்தில் வரும் "வருத்தப்படாத வாலிபர்கள் சங்கம்" என்பதே இதன் விரிவு. யாருடைய மனமும் நோகாமல் தன்னைமட்டுமே வருத்திக்கொண்டு மற்றவர்களை சிரிக்க செய்யும் வடிவேலுவின் பாணியே இவர்களின் பாணியும். யார் மனதையும் புண்படுத்தாமல் நகைச்சுவை இழையோட வரும் பதிவுகள், மாதம் ஒரு பதிவரை அட்லஸ் வாலிபராக்கி அவருடைய நகைச்சுவை ரசனையை அனைவருக்கும் வெளிப்படுத்துவது என்பவை சிறப்பு. வ.வா.சங்கக் கூட்டுப்பதிவு நகைச்சுவைக்கெனவே ஆரம்பிக்கப்பட்டது.

வெற்றிக்கரமான இரண்டாம் ஆண்டுவிழாவினைக் கொண்டாடிக்கொண்டிருக்கிறார்கள். இரண்டு போட்டி , ப்ரம்ம ரசம் போட்டி போன்று அவ்வப்போது நடக்கும் போட்டிகளெல்லாம் வாசகர்களின் நகைச்சுவை ரசனையை ஊக்கப்படுத்துகிறது. வ.வா.சங்கத்தில் இருக்கும் சிங்கங்களில் கைப்புள்ளையையோ இல்ல அங்கே அப்பரண்டிசா இருக்கறவங்களையோ அவர்களே கலாய்த்துப் (கிண்டலடித்து) போடப்படும் பதிவுகள் நிஜ கைப்புள்ளை வடிவேலுவையே கவர்ந்த விசயங்களாகும்.உங்களுக்காக இரண்டு உதாரணச்சிரிப்பு வெடிகள்.

1.அண்ணே, அண்ணே உங்களுக்கு மூத்திர சந்தில் இருந்து போன் வந்திருக்கு
கைப்புள்ள : கட்டதுரை கட்ட்ட்ட்ட்ட்ட துரை பார்த்தியா என் ரேஞ்ச...நான் ஒன்னும் வேலை வெட்டி இல்லாதவன் இல்லை, அங்கங்கே அப்பாய்ன்மெண்ட் கொடுத்து...அடிவாங்க போன் போட்டு கூப்பிட்டு கொடுக்கிறானுங்க, நான் அவ்வளவு பிசி.... உன்னிய மதிச்சி 2 அரைவாங்கினது நான் உனக்கு கொடுத்த மரியாதை...காப்பாத்திக்க...

2.ஆமாங்க கடைசி ஓவர்ல்ல ஆறு பாலுக்கு முப்பது ரன் இருந்துச்சு... அப்போ எங்க கோச் வந்து காட்டுக் கத்தலா அடிச்சு ஆடுறா கொய்யா.... அடிச்சு ஆடுறா கொய்யா.....அப்படின்னு உசுப்பு ஏத்துனார்"
"சுத்திப் பாத்தேன்... நான் அடிக்கிற அளவுக்கு யாரும் பக்கத்துல்ல இல்ல... எதிரி டீம்ல்ல எல்லாருமே வாட்டச் சாட்டமா இருந்தாங்க.. யோசிச்சேன்... யார் அடிச்சாலும் சும்மா அசால்ட்டா தாங்குற ஒரே மனதைரியம் கொண்ட ஒப்பற்ற மனுசன்.. எங்கத் தல தான் அதான் வேகமா ஓடிப் போய் பெவிலியன்ல்ல குறட்டை விட்டு தூங்கிட்டு இருந்த எங்கத் தல கன்னத்துல்ல பளேர்ன்னு ஒரு அரை விட்டுட்டு வந்து ஆடுனேன்... நாங்க செயிச்சுட்டோம்.. ஆனா எங்கத் தல கண்ணீர் விட்டு அழுததை டிவியிலே திரும்ப திரும்ப பாக்கும் போது தான் மனச் சங்கடமாப் போயிச்சுங்க".சங்கத்தச் சிங்கங்களைச் சந்திக்கலாம் வாங்க..

8.கேன்சருடன் ஒரு யுத்தம்
மார்பகப்புற்றுநோயால் அவதிப்பட்டு கொண்டு நோயின் துன்பத்தை, தீவிரத்தை, காரணங்களை வலையுலகில் பகிர்ந்து கொண்டு வந்த பதிவர் அனுராதா ஆகஸ்ட் 28, 2008 அன்று நோயின் துயரிலிருந்து விடுபட்டார். அவர்களுக்கு எங்கள் அஞ்சலி.அனுராதாவிற்கு புற்றுநோய் வந்தபோதினில் அவருக்கோ அவருடைய துணைக்கோ நோயைப்பற்றிய எந்த ஒன்றும் தெரிந்திருக்கவில்லை.
2003 ஆம் ஆண்டிலிருந்து நோயின் தீவிரத்தினால் பலவாறும் துன்பங்களை எதிர்த்துப்போராடியதோடு இணையத்தில் அவற்றை தொடர்ந்து குறிப்புக்களாக எழுதி சேகரித்தும் வந்தார். அவருக்கு மார்பகத்தை அகற்ற விருப்பமில்லாததால் மாற்று முறைகளை தேர்ந்தெடுத்து சிகிச்சை பெற்று வந்தார். இடையில் மார்பகப்புற்றுநோய் கல்லீரலுக்கும் பரவியது, சர்க்கரை நோய் இணைந்து கொண்டது.

மருத்துவமனை மருத்துவனையாக வெவ்வேறு மருத்துவர்களை கலந்தாலோசித்து நோயின் ஒவ்வொரு மூலத்தையும் அலசி ஆராய்ந்து கொண்டிருந்த அனுராதா ,மார்பகத்தை அகற்றாமல் 5 வருடங்கள் போரடிய நிலையில் , மற்றவர்கள் கருத்து பற்றிய கவலையின்றி மார்பகத்தை அகற்றிவிட்டு போராடி இருந்தால் மேலும் பலநாட்கள் நம்முடன் இருந்திருக்கலாமோ என்ற ஒரு கலக்கம் சிலர் மனதில் தோன்றுகின்ற கருத்தாக இருக்கின்றது.

கேன்சருடன் ஒரு யுத்தம் பதிவில் அனுராதா எழுதி இருக்கின்ற சிகிச்சைகளின் விளக்கங்கள் நம்மை கதிகலங்க வைப்பதாகவும் அவற்றின் பின்விளைவுகள் சிந்திக்க வைப்பதாகவும் இருக்கின்றன. ப்ளாஸ்டிக் பொருட்கள் மூலமாகவும் சிடி ஸ்கேன் மூலமாகவும் புற்று பரவுவதை குறிப்பிட்டார். மூளைக்கும் புற்று பரவிய பிறகு அவர் சொல்லச்சொல்ல அவருடைய கணவர் குறிப்புக்களை வலையில் பதிவிடும்படி செய்தார். மே மாதத்தில் அவர் விதியை வெல்லும் நிலைக்கு வந்துவிட்டதாக பதிவிட்டிருந்தார் .. ஆனால் விதியை யாரால் முன்கூட்டி அறிய இயலும்? அனுராதாவின் குறிப்புக்களை புத்தகமாக்கும் ஆசையை நிறைவேற்ற அவரின் கணவர் மற்றும் வலைப்பதிவர் நண்பர்கள் இணைந்து செயல்பட இருக்கிறார்கள்
http://ww1.4tamilmedia.com/index.php/2009-04-20-00-21-36/2009-05-01-01-50-40/2125----2

9. சமையலுக்கு என்ன தேவை?

சமையல் குறிப்பு - தேவையான பொருட்கள் - ஒரு ஸ்பூன் இனிய அன்பான மனம், ஒரு ஸ்பூன் ரசிப்பு தன்மை, ஒரு ஸ்பூன் கோப தாபமில்லா அமைதியான மனம். என்ன இது! என்று பார்க்கிறீர்களா? இது தான் முக்கியமான சமையல் குறிப்பு. சமையலுக்கென்ற கூட்டு வலைப்பதிவான சமையல் திரட்டியில் தான் இப்படிப்பட்ட முக்கியமான விசயங்களைத் தருகிறார்கள்.
சுண்டகீரை , பழங்கஞ்சியும் உண்டு. திருநெல்வேலி சிறப்பு சொதியும் உண்டு. ஈழத்து வாழக்காய் சம்பலும் உண்டு. சுண்டைக்காய் கொழம்பு மண்பாண்டத்தில் செய்வது எப்படி? புளியோதரை தெரியும் தக்காளியோதரை தெரியுமா? இறால் வஞ்சிரம் என்னவகையானாலும் சுவைகூட்ட குறிப்பிருக்கிறது. வாரத்திட்டம் என்கிற திட்டத்தின் கீழ் தயிர் ஐயிட்டங்கள், இனிப்பு ஐட்டங்கள், பதிவர்களின் மனதுக்கு பிடித்த ஐட்டங்கள்.

நீங்கள் தனிச்சமையலா? பிடியுங்கள் அவசர ரசம்.அதிலும் பலவகை ரசம்.இடியாப்ப பிரியாணி , தக்காளி சஞ்சிகை, கலர்புல் மிண்ட் ரைஸ் , வினிகர் கத்திரிக்காய். கேட்க கேட்க நாவூறுகிறதா?தமிழ் சமையல் வலைப்பூ திரட்டியை எட்டிப்பாருங்கள் , சமைத்துப்பாருங்கள்.

10.ஏன் என்ற கேள்வி இங்கு கேட்காமல் வாழ்க்கை இல்லை

இவ்வாரத்திய பதிவு , விசய ஞானத்தைப்பகிர்வது மட்டுமின்றி சுள்ளென்ற கேள்விகளையும் பகிர்ந்து வைக்கும் பதிவு .மூகமூடியற்ற நிஜமுகத்தைக்காட்ட விரும்புபவராகவும் , தான் வாழ்நாளில் சந்திக்கும் நிகழ்ச்சிகளில் சிந்திக்கவைத்த சில கேள்விகளை ஏன் இப்படி? என்று கேட்டு நம் மனங்களையும் திடுக்கிட வைக்கிறார்.
சில வேளைகளில் நீங்களும் அந்த நிகழ்வுகளை வாழ்வில் சந்தித்திருக்க வாய்ப்புண்டு. அப்போது உங்கள் மனம் ஒரு பாதையிலும் வாழ்வின் சிக்கல்கள் உங்களை வேறு பாதையிலும் செலுத்தி இருக்கலாம்.

சாக்கடை மூடிகள் தயாரிப்பில் நம்மவர்களின் பாடுபற்றி அறிவீர்களா? ஆண்களுக்கும் அப்பாவாகும் போது மன அழுத்தம் வரும் என்பது உண்மையா? உணர்ந்திருக்கிறீர்களா? ஒருகாலத்தில் நாம் இயற்கையாக அனுபவித்த உணவுப்பொருட்களை இன்று ரசாயன உரங்களால் இழந்துவிட்டு அதிக காசுகொடுத்து ஆர்கானிக் காய்கறிகள் உண்பது ஏன்? உடல் உறுப்பு தானம் என்றால் பதறுவது ஏன்? முதுமை சாபக்கேடா? கருக்கலைப்பு சட்டம் இதுநியாயமா?

உலகில் பலபாகங்களில் இயற்கைக்கு மாறான நடைமுறைகளால் நிகழ்ந்த நிகழ்வுகளைக்கூறி இன்னமும் நாம் படிப்பினை பெறவில்லையே ஏன் இப்படி? என்று பல கேள்விக்குறிகளை சுற்றிலும் சுழலவிடுகிறார்.ஏன் என்ற கேள்வி இங்கு கேட்காமல் வாழ்க்கை இல்லை. வாழ்வில் உண்மையை உணர கேள்விகள் கேட்க பழகுங்கள்.

அன்றொரு காலத்தில்,..

2011-10-20T14:42:00.000+05:30

இடுப்பொடிய சுடாதேயம்மா
அடுக்கு நிறைய மட்டும் வேண்டுமெனக்கு
குளிக்கமறுப்பவன் முன்னால் எழுப்பச்சொல்லி
முறையிடுவான்

காசைக்கரியாக்க ஆசையோடு
அட்டவணையில் குறிப்பெடுப்போம்
வாழ்வினிமைக்கு வாழ்த்தி
மருந்தோடு வருவாள் ஆச்சி
உனக்கெத்தனை எனக்கெத்தனை
பங்கிட்டோம் பட்டாசுகளை
சேர்ந்தே குதூகலிக்க

வரிசை வரிசையாய் ஆசைகள்
கொளுத்தி வைத்து
பூக்கிண்ணமாய் சிதறிக்கொண்டிருந்தன

இன்று
பக்கத்திற்கொன்றாய்
தெறித்த பட்டாஸாய்
வாழ்வைப்போன்ற இரட்டை நாக்கு
எவருக்குமில்லை..

வல்லமை இதழுக்காக எழுதிய அந்தக்கால தீபாவளிய மிஸ் செய்யும் என் கவிதை

பனிஊழிக்காலங்கள்

2011-10-17T16:56:00.001+05:30

தோல்வி

சிறுமிகட்டிய
சின்னச் சின்ன மணற்கோபுரங்கள்
நான் ஒளித்த ஈர்க்குச்சியை
ஒவ்வொருமுறையும்
கண்டுகொண்டாய்.
ஒருமுறைகூட விளையாட்டாய்
தோற்கத்தெரியாதா?

சில வார்த்தை ஒளிக்கிறேன்
பெரியவள்
ஒருமுறை கூட நீ அதன் பொருள்
அறிந்துகொள்ளவில்லை
-------------------------------------------------------

முடிவு

நூற்றாண்டுகளாய்
உறைந்துகொண்டிருந்த பனி
உருகிக்கொண்டிருந்தது
வெளிகாட்டும் படிமங்கள்
நிகழ்ந்த
பிறப்பும் இறப்பும்
காட்டிக்கொண்டிருக்க
பனி ஊழிக்கு காத்திருக்கும்
குளிர் தேடியலையும்
உயிர் ஒன்றின் காலடியில்
எங்கோ
நீர் உயர்ந்துகொண்டிருந்தது

------------------------------------------------

வழி

காரணங்கள் உருவாக்க
அவசியமிருக்கவில்லை
இல்லாத ஒன்றை
இருக்கின்றதென்றும் சொல்லவில்லை
இல்லாததற்காக
ஆகாத்தியமும் தேவையில்லை
நினைத்துக்கொண்டாற்போல
மறந்துகொள்வதற்கு
கோபத்திற்கான காரணங்களாவது வேண்டும்
பெரியவிசயமில்லை
வரிகளுக்கிடையில் படிக்கலாம்
கிடைக்காமலா போகும்

-----------------------------------------------------------

நாடகம்

பாடப்புத்தகத்தின் பக்கங்களில்
கிரீடம் வைத்த அரசனுக்கு
ஒரு கண்ணைக் கருப்படித்தாள்
சிலபல தலைகளை வரைந்தாள்
பயங்கரனைப் போல
ஆக்கிவிட்டோமா என்று
தூரநிறுத்திப் பார்த்துக்கொண்டாள்
முடிந்தவரை
அவனே வந்தாலும்
தன்னையறிய முடியாதபடிக்காய்
அதை
உருமாற்றிக்கொண்டிருந்தாள்

வானவில் இற்றைகள் அக்டோபர் 2011

2011-10-14T11:30:00.000+05:30

உலகக்கோப்பை இறுதிப்போட்டிக்கு முன்னும் கிரிக்கெட் பிடிக்கும் விளையாடுவான் பேசுவான் . ஒருமுறை நேராக என் மூக்கைப்பார்த்து பந்தை இறக்கி, அதிலிருந்து ”அம்மா உங்கள் மேல் அடிக்கமாட்டேன் வாங்க விளையாடலாம்” என்பான். இறுதிப்போட்டியில் வெற்றிக்கோப்பையைப் பெற்ற உடன் தெருமுனையில் டோல் அடித்து குழு நடனங்கள் நடந்தது. இதுநாள் வரை பூஸ்ட் க்கு கிடைத்த கிரிக்கெட் மட்டைகளை வைத்து விளையாண்டு கொண்டிருந்தவர் புது மட்டைக்கு அடிப்போட்டார். நான் மறுக்க அப்பா வாங்கிக்கொடுத்துவிட்டார்கள். அவர்கள் அடுத்தவர்களுடையது வைத்து விளையாடிய நினைவு வந்து மகனின் கனவை நினைவாக்கி விட்டார்கள். அது கிடைத்ததும் அடுத்து இந்தியா டீசர்ட்டுக்கு அடிபோட்டார். அது இவர் அளவுக்கு கிடைக்காததால் ஒருவருசம் போகட்டும் உடம்பைத் தேத்தப்பா என்று சொல்லிவைத்தேன்.

கடைக்கு செல்லவேண்டியதினத்தில் சீக்கிரமே எழுந்து அம்மா அப்பாவுக்கு குட்மார்னிங்க் வைத்து எல்லாரையும் கடைக்கு தயாராகச்செய்து ..என்ன ஒரு நல்லபையன்.

புது கிரிக்கெட் பேட் வாங்கியபின் விளையாட விடாமல் ஒரு நடன அரங்கேற்றம் பார்க்க அழைத்துச்செல்ல ஒரே அழுகை . விடுமுறையில் விளையாட விடவில்லையே .” நாங்கள் சிறுபிள்ளையாக இருந்தபோது விடுமுறை நாட்களில் கோயிலுக்கு வார வழிபாடு என்று அழைத்துச் செல்வார்கள். (கொஞ்சம் பெரிசானதும் நாங்கள் குறைத்தோம் தான்) காரிலா போனோம்? நடந்து போனோம்” என்று வழக்கமான அறிவுரையைக் கேட்டுக்கொண்டிருந்தான். டீவி இல்லை , கார் இல்லை,ஃபிரிட்ஜ் இல்லை என்று சொன்ன கதைகளை அடிக்கடிக் கேட்டுக்கேட்டு கடுப்பாகி

அப்பறம் எப்படித்தான் வாழ்ந்தீங்க?

”ஏன் அது எல்லாம் இல்லாம வாழமுடியாதா என்ன? முடியும்டா?
இருக்கிற அத்தனை விளையாட்டு சாமன்களையும் வைக்க இடமில்லை. மேலும் மேலும் கேட்பதை நிறுத்து ” என்று அடுத்த அறிவுரை..... அவன் படுத்து தூங்கிவிட்டான், பின்சீட்டில்...
----------------------------------
தலைமுடியை எப்பப்பாருங்க க்ரோஷா பின்னல் போல சுற்றிக்கொண்டே இருப்பான். முன் பக்கம் செய்வதால் யாரிடமாவது பேசும்போது அப்படி சுழட்டுவது பார்க்க நன்றாக இல்லை. ஏண்டா அப்படி செய்கிற என்று கேட்டால் அது மகிழ்ச்சியைக்கொடுப்பதா சொல்வான் ( மஜா ஆரஹாஹெ )

முடிவெட்டிவிட்டு வந்த நாள் ....உடையில் எதோ ஒரு நூலைப் பிடித்து அதே போல சுற்றிக்கொண்டிருந்தான். என்னடா அதை விட்டு இப்ப இதா என்று கேட்ட என்னிடம் ஒரு கேள்வி கேட்டான். அதைக்கேட்டதும் எனக்கு இதயமே வலித்தது. என்னவா?

‘ அம்மா இதும் எனக்கு மகிழ்ச்சியா இருக்குன்னு சொன்னா நீங்க எடுத்துடுவிங்களா..? ‘

நான் என்ன அவன் மகிழ்ச்சியைவா பிடுங்கறேன். ஹ்ம்.. :( உன்னை நாலு பேர் ஸ்மார்ட் பாய் ந்னு அப்பத்தானே சொல்வாங்க..இப்படி முடியை சுத்திட்டிருந்தா என்ன பையன் இவன்னு சொல்வாங்களே அதுக்குத்தானே சொன்னேன் என்று புரியவைக்க முயற்சித்தேன். ஆமா முயற்சித்தேன்னு தான் சொல்லனும். முடிந்ததா என்று தெரியல.

-------------------------------
புது புது ஹிந்தி அல்லது ஆங்கில வார்த்தைகள் தெரிந்துகொண்டால் அது ஒரு வாரகாலம் அதே வைத்து தான் பேசுவது வழக்கம். பெஹோஷ் மயக்கம் என்று ஒரு வார்த்தை தெரிந்தது. அம்மா சீக்கிரம் வாங்க இந்த கேம் ல நான் எவ்ளோ பாயிண்ட் எடுத்திருக்கேன் தெரியும..? ம் சொல்லுப்பா.. கேட்டா நீங்க பெகோஷ் ஆகிடுவீங்க.. என்று சொல்லிவிட்டுத்தான் பாயிண்ட் எவ்ளோ என்று சொல்வது. இப்போதெல்லாம் நான் கூப்பிட்டால் சீக்கிரம் சொல்லு பெகோஷ் ஆகி விழனும்ல்லன்னு சொல்லிட்டு கீழே விழப்போகும் மாதிரி நிற்பது கண்டு அவனுக்கு ஒரே வெட்கம். ரொம்ப அதிகமாப்போனா அம்மா ந்னு ஒரு கோவம்..
-------------------------------------------
महानो का यह पवित्र देश‌
अब क्यो बदल रहा है अपना वेश?
स्वतंत्र तो हो गये है मगर,
कब छाएगा एकता का अम्बर?
இது என் மகள் அவளோட பள்ளி கையெழுத்துப் பத்திரிக்கைக்காக எழுதியது.

ஹிந்தியில் கவிதை வேணும் என்றதும்.. எல்லாரும் இவளை கைகாட்டி இருக்காங்க..நான் ஆங்கிலத்தில் தான் எழுதுவேன் என்று சொன்னதும்..டீச்சர் அதெல்லாம் ஹிந்தியிலும் வரும் ட்ரை செய்யு என்று சொல்லிட்டாங்களாம்..
வந்து என்ன எழுத எழுத ந்னு தொணத்தொணத்தா எழுதுடி எதயாச்சும் எழுதிட்டு காமி சொல்றேன்னேன்..

அப்பறம் எதோ எழுதினா. நம்ம தேசம் , இதோட மன்ணுன்னு ஒரே பெருமையா இருந்தது கவிதையில்..இதே மாதிரி தானெ எல்லாரும் எழுதிட்டு வருவாங்க..கவிதை எழுதினா அதுக்கு உண்மையா இருக்கனும்.. எழுதனுமேன்னு இருந்தா எழுதாதே வரலைன்னு சொல்லிடு டீச்சருக்குந்னு சொல்லிட்டேன்.. அதோட வராதுனு கவலையில் முகத்தைத் தூக்கிவச்சிட்டிருக்காதே ..
இதை எடுத்துட்டுபோ இன்னும் ஒரு நாள் டைம் கிடச்சா வேற எழுதுன்னேன்.. அதே மாதிரி வகுப்பில் எல்லாரும் அதே மாதிரி எழுதி இருக்கவும் திரும்ப வந்தா..

என்ன எழுதனுமோ அதை ஆங்கிலத்தில் எழுது அப்பறம் அதுக்கான வார்த்தைய ஹிந்தியில் தேடுன்னேன்.. கவிதைய சமைக்கச்சொன்னேன்..:)) திருத்தி எழுதப்பட்டது ..
டீச்சர் இதை நீதான் எழுதினியா மண்டபத்துல வாங்கிட்டுவந்தியான்னு எல்லா வார்த்தைகளுக்கும் அர்த்தம் கேட்டுக்கிட்டாங்களாம்..:))

மகான்களால் நிறைந்த இந்த புண்ணியதேசம்
ஏன் கலைக்கிறது அதன் வேஷம்
சுதந்திரம் வந்துவிட்டது ஆனால்
எல்லாரும் சமமென்ற வானம் விரிவதெப்போது ?
- இது நான் என் அறிவுக்கு அதை மொழிபெயர்த்திருக்கிறேன்..
---------------------
தூங்கிட்டிருந்தவளை எழுப்பி ’அன்ஷுல் நம்பர் சொல்லும்மா..’
’போன்ல தானேடா இருக்கு.. ’
’அன்ஷுல் 4 மணிக்கு என் வீட்டுக்கு விளையாடவா..’
6 மணிக்கு ’அன்ஷுல் உன் வீட்டுக்கு போற டைமாகிடுச்சுல்ல..வா நானும் உன்கூடவே உன் வீட்டுக்கு வரேன்..’
’
’அம்மா அன்ஷுலுக்கு அவன் வீட்டுக்குப்போனும் கொண்டுவிடு..
நானும் அப்படியே போறேன்..’
’டேய் யாருடா திரும்ப 7 மணிக்கு கூட்டிடுவருவா.. ’
’நீதான்மா..’
நானில்லைன்னு தலையாட்டிட்டிருக்கும்போதே..
கிரிக்கெட்ல அவுட் செய்துட்டா பவுலர் செய்ய்ரமாதிரி எல்போ மடக்கி.. எஸ் ந்னு கத்திக்கிட்டே

‘ நான் உன் வீட்டுக்கு வரேன் அன்ஷுல்..’
----------------------------------------------
’தாயே பராசக்தி என்னைக்காப்பாத்தும்மா ‘- நான்..

என்னைத்திட்டரதுக்குத்தானேம்மா சக்தி கேக்கரே.. என்னை அடிக்கிறதுக்குத்தானே - குட்டிப்பையன்

அவ்....
----------------------------
ஷாப்பிங் போன இடத்துல குட்டிப்பையன் சொன்னதை நான் வாங்கலைன்னு , ப்ளே ஏரியால விளையாட விடலைன்னு ஒரே சண்டை.. நிருலாஸ் ல சாப்பிடப்போனா ,அங்க வரைக்கும் முகத்தை உம்முன்னு வச்சிக்கிட்டு.. பேசினா பேசாம..நான் உக்காந்திருக்கும் டேபிளில் எதிர்சேர்ல கூட உக்காரமாட்டானாம்.. உன் கூட பேசமாட்டேன் ந்னு சொல்லிட்டு எங்க டேபிள் ,அத்தை மாமா உக்காந்திருந்த டெபிள் எல்லாம் சுத்திட்டு அப்படியே திரும்ப வந்து , நீங்க எப்பவும் என் பேச்சுக்கேக்கறதில்ல., எப்பவும் திட்டறீங்கன்னு சொல்லிக்கிட்டே மடியில் ஏறி உக்காந்தாச்சு..

ஏ ஒருத்தன் என்கிட்ட பேசமாட்டேன்னு சொன்னானே அவன் எங்கே ?
இப்ப அவன் அவ்வ்..:))

காற்றலை இல்லை என்றால் (மனப்) பாட்டொலிக்கேட்பதில்லை

2011-10-04T17:01:00.004+05:30

இந்த முறை கொலுவில் தீம் டாய்ஸ்டோரி.. சோனி டீவியில் இருந்து டாய்ஸ் எல்லாம் வெளியே வருகிறது.. எல்.ஜி டீவி தான் ந்னு குட்டிப்பையன் ஒரே அழுகை.. அது எப்படி? நாம ஒரு ‘சோனி’(க்)குடும்பம் ந்னு சொல்லி .. நானும் பொண்ணும் ஒரே பிடியா , ”சோனி எல் சிடி” டீவி மாடல் தான் செய்தோம். அதுல இருந்து பாருங்க ஒரு டினோசர் வெளிய வந்திட்டிருக்கு.. ட்யூப்லைட்.. டீவி ,ஷோகேஸ், பக்கத்துல சின்ன பியானோ, பூந்தொட்டி, எல்லாம் பெரிசு செய்து பார்த்துக்கோங்க..:)

முன்னமே வெளிய வந்த பொம்மையெல்லாம் நின்னிட்டிருக்கு.. சுண்டலை எல்லாம் போட்டோ எடுக்கல இந்த முறை.. இன்னிக்கு சுசியமும் , பட்டாணி சுண்டலும்.. எல்லாருக்கும் வச்சிக்கொடுத்தது டீ கப்ஸ் பீங்கானில்.. எல்லாத்தையும் படம் எடுத்துப்போட ரொம்ப சோம்பலாகிடுச்சு.... அம்மா ஸ்கைப்ல குழந்தைங்க பாடியதை எழுதி இருக்காங்க..நானும் ஊருல இருக்கும் கொலுவுக்கு திருப்புகழ் பாடினேன்.. அம்மா பூஜை செய்யும்போது பாடும் ‘ அன்னவாகன தேவி ’பாடினேன் அவங்க கூடவே..

அமரிக்காவில் இருக்கும் தம்பிக்கு ஃபேஸ்டைம் ல கொலுவைக்காண்பிச்சேன்.. அங்கருந்தே
நாத்தனார் மகளும் தம்பி மகனும் எங்கள் கொலுவுக்கு பாடினார்கள்.

”காற்றலை இல்லை என்றால் (மனப்) பாட்டொலிக்கேட்பதில்லை”

திருத்தம்

2011-10-02T17:36:00.000+05:30

திருத்தம்

உணவாக்க விழையாத இழைகளை
வட்டத்துக்குள் சிக்காமல்
குறுக்கில் நடந்து கடக்கிறாய்
இழைகளை
உண்டு செரிக்கத் தயாராகிறேன்
--------------------------------------------

எல்லாம் அறிவாய்
வேண்டி நிற்பதும் அறிவாய்
காட்சி எப்போது?
அல்லது யாருக்கு?
கர்வம் மிக்கது எது?
கசிந்துருகுவது எது?
கடமைக்காய் இருப்பது எது?
கடந்து போவது எது?
கல்லாய் நினைப்பது எது?
துல்லியமாய் அறிவாய்
அறியாதது
நீ யாரென்பது மட்டும்.
-----------------------------
காதல் எழுதுபவர்கள்
காதலில் இருக்கிறார்கள்
மரணம் எழுதுபவர்கள்
மரணித்துக்கொண்டும்
கருணை எழுதுபவர்கள்
கசிந்துருகிக் கொண்டும்
இவ்வாறெனில்
எவ்வளவு எளிது
இவ்வுலகம்.

-------------------------------

கூகிள் பஸ் பற்றி அறிந்தும் ரொம்ப நாள் அந்தப்பக்கம் எட்டிப்பார்க்கவில்லை.. டிவிட்டர் அளவுக்கு யோசிக்கவைக்காமல்.எவ்வளவும் தட்டச்சலாம்.. என்பதால் அங்கே அவ்வப்போது தோன்றியதை எழுதி வந்தேன். அதனை இங்கே சேமித்து வைக்கிறேன்.

-----------------------------

ஸெர்யோஷா என்றொரு சிறுவன்

2011-09-02T12:49:00.002+05:30

கள்ளம் கபடமற்ற குழந்தையின் நிலையிலிருந்து கேள்விகளாலும் சந்தேகங்களாலும் அறிவை விசாலமாக்கிக் கொள்ளத் தொடங்கி இருக்கும் ஒரு சிறுவனின் கதை. புதிய தந்தைக்கும் ஸெர்யோஷா என்கிற சிறுவனுக்கும் முகிழ்கின்ற சிறு நேசத்தின் வாசம் இக்கதை எங்கும் வீசி நிற்கிறது.ஸெர்யோஷாவின் வாழ்வில் சிறிய மகிழ்ச்சிகளும் உண்டு. வாட்டும் கேள்விகளும் உண்டு. வாசிப்பவரை சில நேரம் குழந்தையாக்கி மகிழவைக்கிறார் வேரா பனோவா. சில நேரம் ஏக்கத்தில் திண்டாடவைக்கிறார். நீங்கள் மீண்டுமொருமுறை குழந்தையாக வாழ்ந்து பார்க்க நேரிடலாம்.

அறிமுகக்காட்சியிலேயே “பெரியவர்கள் சூனியக்காரியைப் பற்றி கதைகள் படித்துவிட்டு அதே மூச்சில் “ ஸெர்யோஷா , சூனியக்காரிகள் உண்மையில் இருப்பதில்லை “ என்று சொன்னால் பொதுவாக இந்த புத்தகங்களை நம்புவது எப்படியாம்? “ என்று உள்ளுக்குள் பெரிய சிந்தனையாளனாகத்தான் நமக்கு அறிமுகமாகிறான்.

ஸெர்யோஷா நேர்மையான கீழ்படிதலுள்ள எளிமையான சிறுவன். பெற்றோராக இருந்தால் இப்படி ஒரு பிள்ளையைப் பெற்றவராக இருக்க விருப்பமுண்டாக்க போதுமான குணங்கள் அவனுக்கு இருக்கிறது. நண்பர்கள் குழுவுடன் ஆனந்தமாக பொழுதைக் கழித்தபடி இருந்தவனைப் பார்த்து , தாய் “ நம் வீட்டில் ஒரு அப்பா இருந்தால் நன்றாக இருக்குமென்று தோன்றுகிறது ‘ என்று சொல்லும்போது அவனுக்கு அப்படி தோன்றவில்லையெனினும் அம்மாவுக்கு அப்படி தோன்றுகிறது என்றால் நாம் அதை ஆமோதிப்பது நல்லது என்ற தெளிவு இருக்கிறது.

அவனால் சரியாக எண்ணங்களை வெளிப்படுத்தத் தெரியாமல் இருக்கலாம். ஆனால் குழந்தையின் மன அலைகளை நாம் அறிவது எவ்வாறு? பொதுவாகவே பலரும் மரத்தை நறுக்கி நறுக்கி போன்சாய் செய்வது போல குழந்தைகளை சொல்பேச்சு கேட்க வைப்பதில் கவனமாயிருந்துவிடுவதுண்டு. தன் வளர்ச்சியாக அவர்களின் சிந்தனை போகும் பாதையைப் பற்றி பெரியவர்கள் அறிவதுமில்லை முயல்வதுமில்லை.

அப்பா இல்லாவிட்டால் மோசம் தானே என்று கேட்டுவிட்டபின் தான் அப்பா இருப்பது மோசமா இல்லாதிருப்பது மோசமா என அவன் சீர்தூக்கிப்பார்க்கிறான். போரில் இறந்துபோன அப்பாவின் புகைப்படத்தினை மட்டும் பார்த்து அவனால் அன்பு கொள்ளமுடியவில்லை. எப்படியும் நமக்கு நன்மை செய்பவராய் இருப்பார் என்ற நம்பிக்கையில் புது அப்பாவின் வரவை எதிர்கொள்கிறான்.

குழந்தைகள் நேரடியாகக் கேட்டு தெளிவுபடுத்திகொள்வார்கள். ஒளிவு மறைவில்லை. ’நீ என்னை இடுப்புவாரால் அடிப்பாயா’ என்று புது அப்பாவிடம் நேரடியாகக் கேட்டு தெளிந்து அமைதியுறுகிறான். அது போல தங்களிடம் சொல்வது போல் பெரியவர்கள் செயல்படுகிறார்களா என்று கவனிப்பதில் சமர்த்தர்கள். ஞாயிறு புதியசைக்கிள் வாங்கித்தருவதாக ஒப்புக்கொண்ட பின் அதை நிறைவேத்தி தருகின்ற புது அப்பாவான கொரஸ்தல்யோ நேர்மையானவன் . ஸெர்ன்யோன்ஸாவின் உணர்வுகளை மதிப்பவன் என்ற ரீதியில் அவன் மனதில் இடம்பிடிக்கிறான்.

பெரியவர்கள் தேவையற்ற வார்த்தைகளை கொட்டி இறைப்பதாக உணர்கிறான் ஸெர்யோஷா . தேநீரைக் கொட்டியதற்காக வருத்தப்படும் அவனை தேவையற்ற வார்த்தைகளால் அத்தை அர்ச்சிப்பது போன்றோ ,அம்மா அவன் எல்லாவற்றிற்கும் தயவு செய்து என்று இணைத்து பேசவேண்டும் என்பதற்காக படும் அவஸ்தைகளோ அற்ற கொரஸ்தல்யோ வித்தியாசமானவனாகத் தெரிகிறான்.

மிட்டாய் இருப்பதாக ஏமாற்றி தாளை தருகின்ற பெத்யா மாமாவை முட்டாள் என்று விமர்சித்தது சரியானது என்றும் அவன் ஆட்களை புரிந்துகொள்ளக்கூடிய அறிவாளி என்றும் கொரஸ்தல்யோ சொல்கிறபோது நன்றியுடையவனாகிப் போகிறான். ’சண்டைக்குப் போவாய் அப்போது காயங்களை கண்டு அழுது நிற்பாயோ பையனே’ என்கிற போது நெஞ்சு நிமிர்த்தி வீரனாகிறான். கொரஸ்தல்யோவின் வார்த்தைகள் ஒவ்வொன்றாலும் அவன் உருக்கொண்டுவந்தான்.

கொள்ளுப்பாட்டியின் இறுதிச்சடங்கில் “ வழியனுப்ப வந்தாயா உனக்கு என்ன அவள் மேல் பிரியமா ?”என்று கேட்கும் தோஸ்யா அத்தைக்கு .. ”பிரியமில்லை” என்று தானே சொல்வான். இனி அவள் இல்லாத வீட்டில் அவன் விருந்துண்ணப் போனால் மிரட்டவோ குற்றம் கண்டுபிடிக்கவோ யாரும் இருக்கமாட்டார்கள் என்பதில் அவன் எளிய உள்ளம் அமைதியுறுகிறது. எல்லாரும் இறப்பார்கள் என்றாலும் நீ இறக்கமாட்டாய் என்று சொல்கிற தந்தையை அவன் நம்புகிறான்.

கொரஸ்தல்யோவின் பண்ணைக்கு செல்லும்போது அவன் ஏன் தினமும் அவசரமாக பண்ணைக்கு ப் போகிறான் . அவன்வராவிட்டால் வேலையாட்களுக்கு இன்னின்னது செய்யவேண்டுமென்று எப்படித்தெரியும் என்று உணர்கிறான். பண்ணையாளின் மேல் கோவம் காட்டினாலும் வேலையை விட்டு நீக்காத அவன் செய்கையைக் கண்டு சர்வ வல்லமை மட்டுமல்ல இவன் நல்லவனும் கூட என்று பெருமிதம் கொள்கிறான்.

விண்மீன்களைப் பற்றியும் கிரகங்களைப் பற்றியும் அறிந்துகொண்ட நாட்களில் அவன் சிந்தனை நீள்கிறது. “செவ்வாய்கிரகம் பெரியதாக இருந்து அதில் மனிதர்கள் வசிக்கலாம் என்றால் ம் ஒரு வேளை என்னையே போன்ற பையன் இதே போன்ற சறுக்கு வண்டியுடன் அங்கே இப்போது நின்று கொண்டிருக்கலாம், ஒருவேளை அவன் பெயரும் ஸெர்யோசாவாக இருக்கலாம்’ என்று வியந்து போகும் அச்சிறுவன் இது போன்ற சிந்தனைகளை பகிர்ந்தால் ஏனையோர் கேலி செய்வதுண்டு. ஆனால் கொரஸ்தெல்யோவ் அவனை மதிப்பான். “அதெற்கென்ன நடக்கக்கூடியதுதான்’ என்பான்

மற்றொரு குழந்தையை தாய் பெற்றெடுக்க இருக்கையில் தந்தையிடம் தனக்கு பையன் வேண்டுமென்பது விருப்பமென்றும் பக்கத்துவீட்டு பெண்ணைப்போல தான் அக்குழந்தையை பாதுக்காக்க கடமையானவனாகிப் போவானோ என்றெல்லாம் அவன் சிந்திக்கத்தொடங்குகிறான். எல்லா ஏற்பாடுகளையும் செய்கிற தாயும் தந்தையும் இன்னமும் மருத்துவமனையிலிருந்து குழந்தையை கொண்டுவரத்தாமதப்படுத்துவது தான் ஏனென்று அவனுக்கு புரியவில்லையாம்.

”குழந்தைகள் எங்கிருந்து கொண்டு வரப்படுகின்றன என்பது தெரிந்ததுதான். அவை ஆஸ்பத்திரியில் விலைக்கு வாங்கப்படுகின்றன. ஒருத்தி ஒரே சமயத்தில் இரண்டு குழந்தைகளை விலைக்கு வாங்கினாள். எதனாலோ அவள் முழுவதும் ஒரே மாதிரியான குழந்தைகளை வாங்கினாள். ஒரு குழந்தையின் கழுத்தில் மச்சம் இருக்கிரதாம். இன்னொன்றுக்கு மச்சம் கிடையாதாம். இந்த மச்சத்தைக் கொண்டுதான் அவள் குழந்தைகளை அடையாளம் கண்டு கொள்கிறாளாம். ஒரே மாதிரிக் குழந்தைகள் அவளுக்கு எதற்கோ தெரியவில்லை. வெவ்வேறு விதமான குழந்தைகளை வாங்கி இருக்கலாமே “

நண்பன் வாஸ்யாவின் மாமாவைப்போல அனைவரும் பச்சைக்குத்திக்கொள்கையில் தானும் பெரியவன் என்று நிரூபிக்க பச்சைக்குத்திக்கொண்டதில் இருந்து அவனுக்கு உடல்நலமின்றி போகின்றது. படுக்கையும் வீடே கதியாகவும் இருந்த சிறுவனுக்கு சிறைச்சாலையிலிருந்து வருகின்ற வேற்றாள் சுவாரசியத்தையும் கேள்விகளையும் கொண்டுவருகின்றான். அவனிடம் பாஷா அத்தை காட்டுகின்ற வேற்றுமைகள் அவனுக்கு மனிதரிடத்தில் நல்லவன் கெட்டவன் இன்னும் இன்னும் பல வேறுபாடுகள் இருப்பதை குழப்பத்தோடு அறிகிறான். அலமாரித்தட்டில் இருக்கும் இரண்டு வகை சோப்பில் , ரோஜா நிற சோப்புக்கு பதில் பழுப்பு நிற சோப்பால் கைகழுவிக்கொள்ளும் வேற்றாளைப் பார்த்து இப்படி யோசிக்கிறான்.

“ ரோஜா சோப்பினால் கைகழுவிக்கொள்ள வேண்டுமென்று அவனுக்குத் தெரியாதோ அல்லது மேஜை விரிப்பையும் இன்றைய சூப்பையும் போலவே அவனுக்கு ரோஜா சோப்பும் ஆகாதோ தெரியாது. “

சிறைக்கு சென்றவன் கெட்டவன் என்றாகிறது. ஆனால் அவனுக்கு இரக்கம் காட்டுவது எதற்கு என்று குழம்புகிறான். திருடினால் பிடிப்பார்கள் என்று தெரிந்து ஏன் திருடினான். பள்ளியில் புத்தகம் திருடும் சிறுவனுக்கு சிறை கிடையாதென்றால் ஏன் ? அவன் கேள்விக்கு எரிச்சலுறும் அம்மாவிடம் கொரெஸ்தெல்யோவ் பின்பு விளக்குகிறான்.

”அவன் என்ன வேண்டுகிறான் தெரியுமா ? அவனுக்கு ஆமாம் அல்லது இல்லை என்ற பதில் தான் வேண்டும் இடைப்பட்ட பதில் அவனுக்குப் புரிவதில்லை.” குழந்தையின் அனைத்துக் கேள்விக்கும் பதில் தரவேண்டாம் என்று நினைக்கின்ற அம்மாவிற்கு தெரியாமல் தந்தை அவனுக்கு பதிலளிக்கத்தான் செய்கிறார்.

கதை சொல்லக் கேட்ட மாத்திரம் பெரியவர்களுக்கு வந்துவிடுகின்ற வேலையைப்பற்றியும் அவனுக்கு மிக வருத்தமுண்டு. எப்படியோ கதை சொல்ல வராத கொரெஸ்தெல்வைக்கூட ஒத்தாசை செய்து அவன் கதை சொல்லப்பழக்கிவிட்டிருந்தானாம். இத்தனை ஒட்டிப்பழகி அவன் உணர்வாகிப்போன தந்தையையும் தாயையும் அவன் பிரிந்திருக்கவேண்டிய கட்டம் வந்தால் அவனால் தாங்கமுடியுமா. கொரெஸ்தெல்யோவின் வேலைகாரணமாக வெளியூர் செல்லவேண்டி வரும்போது இவன் உடல்நிலையைக் காரணம் காட்டி சிறிது நாட்கள் அதே ஊரில் அவன் தங்கியிருக்கும் படி சொல்கிறார்கள்.

அன்றிலிருந்து அவன் சிந்திப்பதெல்லாம் தான் நோயாய் இருப்பதால் அவர்களுக்கு அவன் சுமையாகிவிடுவான் என்ற எண்ணம் தான். அன்புக்குரியது எதுவும் சுமையாக இருக்காது என்று சிந்திக்கத்தொடங்கிவிட்டவன் . தந்தையின் விளக்கமெல்லாம் கேட்டபின்னும் தான் தொல்லைக்குள்ளானாலும் அவர்களோடு வாழவே ஆசைப்படுவதை சொல்லத் தெரியவில்லை. அழுவதில்லை என்ற வாக்கிற்கு கட்டுப்பட்டு அவன் அவர்கள் கிளம்பும் நேரம்வரை உள்ளுக்குள் குமைகின்ற பகுதிகள் நெகிழ்ச்சி தருபவை. துயரத்தில் கூனிக்குறுகி அவன் நடக்கையில் “ தயாராகு கிளம்பு ’என்கிற தந்தையின் குரலைக் கேட்டதும் நம்பமுடியாத மகிழ்ச்சியில் அவன் கொரெஸ்த்ல்யோவ் நம்மை நேசிக்கிறான் என்று பெருமிதம் கொள்கிறான்.

கதை முழுதும் சிறுவனின் மனவோட்டங்களாலும் தந்தைக்கும் மகனுக்குமான உறவின் அழகுணர்ச்சியிலும் முடிவான மகிழ்ச்சியிலும் வாசிப்பவருக்கு இனிமையானதொரு அனுபவத்தைத் தருகிறார் வேரா பனோவா. இவர் ஸ்டாலின் பரிசைப் பெற்ற ரஷ்ய எழுத்தாளர் ஆவார். குழந்தையைப் பற்றிய கதையாக இருந்தாலும் இதனை பெற்றவர்களுக்காகத்தன் வெரா பனொவா எழுதி இருக்கிறார். வாசிப்பவர்கள் இனி குழந்தையை அணுகும்போது அவர்கள் எண்ணவோட்டம் என்னவாக இருக்குமென்று யோசிக்கத்தொடங்குவார்கள். மேம்போக்காக யோசித்தால் மிகச்சாதரணமான விசயத்தைக் கையாண்டது போலத்தெரிந்தாலும் உள்பொதிந்திருக்கும் விசயம் மிக மேன்மையானது. குழந்தைகள் உலகம் நம்மிலிருந்து வேறுபட்டது. நாம் அதைத் தாண்டி வந்ததை மறந்து அவர்களை தவறாக கையாள்வதை தவிர்க்க உணர்த்துகிறார் வேரா பனோவா.

புத்தகம் : ஸெர்யோஷா என்றொரு சிறுவன் எழுதியவர்: வேரா பனோவா மொழிபெயர்ப்பு: ஜெபி வெளியீடு ஜெபி அண்ட் கோ. -------------------------------------------------- ஈழநேசன் முல்லை.org ல் சனிக்கிழமை, 21 ஆகஸ்ட் 2010 01:43 வெளிவந்தது.
-------------------------------------------------------
இக்கதைப்பற்றிய மற்றொரு பதிவு ஷெர்யோஷாவும் குட்டீஸ் சிந்தனைகளும்

திரைப்படமாகவும் கிடைக்கிறது. யூட்யூப் ல்.. நான் இனிமேல்தான் பார்க்க இருக்கிறேன். இப்போது தான் கண்டுபிடித்தேன்.

தூரத்து வெளிச்சம்

2011-08-31T13:48:00.002+05:30

இறக்கை இழந்த
சிறுநெல்மணிக்கான
பறவைக் குறுநடையோடு
தேடித்தேடி
களைத்திருந்தான்

எவனுக்கோ இவனுக்கோ
உருவங்கள் சாயங்கள் மறையும் வரை
சீட்டுக்கள் என்றும் ஏமாற்றுவதில்லை

கதைகளைப் புனைந்து
வாக்குகளை உரைக்கும்
ஆருடக்காரனின்
அடுக்கு மொழிகள்
தன் வசீகரங்களை இழந்திருந்தது

சொன்ன சொற்களுக்கான
உரைகள்
திருத்தப்பட்டன
சொல்லாத சொற்கள்
அரங்கேறி
வாழ்க்கை கலைத்தது

ஆருடங்கள் மாறுகிறதாயில்லை
ஆருடக்காரன்
மாறிக்கொண்டே இருக்கிறான்
வேதனை உதறி
எட்டி இட்ட நடையின் வழியில்
கோர்த்த கரங்களால்
உடைபடும் வேலிகள்
---------------------------------
(புதன்கிழமை, 14 அக்டோபர் 2009 )முல்லை( ஈழநேசன்)
----------------------------------

ஜாக்தே ரஹோ - விழித்துகொண்டிரு

2011-08-17T08:47:00.004+05:30

நேற்று பலூன்மாமா கல்வெட்டு வின் பஸ்ஸை எல்லாரும் பகிர்ந்திருந்தார்கள், திண்ணை மற்றும் காலியிடங்களில் வழிபோக்கர்கள் தங்குவதற்கு அனுமதிக்காத நம் ஊர்களில் மனிதம் செத்துவிட்டதாகக் கூறி இருந்தார். தங்க விடுகிறோமோ இல்லையோ இன்றளவில் தண்ணீர் கொடுக்கக்கூடப் பயமாக இருக்கிறதாம்.

கல்லூரிக்கு நாங்கள் தண்ணீர் எடுத்துச்சென்றோமா என்று நினைத்துப் பார்க்கிறேன். நான்கு மணிநேரக்கல்லூரிக்கு நாங்கள் தண்ணீர் எடுத்துச்சென்றதாக நினைவில்லை. பஸ்ஸுக்கு காத்திருக்கும் போது அங்கு ஒரு குடிசை வீட்டில் தண்ணீர் கேட்போம் அவர்களும் ஒரு செம்பு நிறைய தண்ணீர் தருவார்கள்.ஊரில் எங்கள் வீடும் ரோடு பார்க்க இருந்ததால் யாராவது தண்ணீர் என்று கேட்டு வருவார்கள்.நாங்களும் கொடுப்பதுண்டு. வீட்டுக்கு எதிர்புறத்தில் ஒரு பொதுக்குழாயும் உண்டு. அதில் தண்ணீர் வருகின்ற நேரத்தில் போவோர் வருவோரும் அங்கே தண்ணீர் குடிப்பதுண்டு. பலசமயம் உடைந்து தண்ணீர் கொட்டிக்கொண்டே இருக்கும்.

தனிவீடுகளில் இன்று தண்ணீர் கேட்கவந்து அடித்துபோட்டு கொள்ளை என்கிறார்கள். சரி அடுக்குமாடிகளிலோ காவலுக்கு ஆள் இருப்பான் உள்ளே நுழைய முடியாது. இப்படி ஒரு படத்தைப் பார்த்தது நினைவு வந்தது.
ஜாக்தே ரஹோ.. (விழித்து இரு..)1956

ராஜ்கபூர் நடித்தபடம் .இப்படி ஒரு நல்லபடத்தை சொந்த செலவில் எடுத்திருக்கிறார். படத்தில் அவருக்கு அதிகம் வசனமில்லை. எல்லாம் முகக்குறிப்பில் தான். மிக அருமையான நடிப்பு. ஒரு ஏழை விவசாயி நகர்புறத்திற்கு தன் வாழ்வின் முன்னேற்றத்திற்காக வந்து சேர்கிறான். அவனுக்கு தண்ணீரக்கு தட்டழிந்து ஒரு அடுக்கு மாடிக்குடியிருப்புக்குள் இருந்த தண்ணீர்குழாயில் தண்ணீர் குடிக்க நுழைகிறான். அழுக்கு உடையும் பஞ்சப்பராரி தோற்றமும் அவனை ஒரு திருடன் என நினைக்கவைத்து குடியிருப்பே அவனைத்தேடி அலைய அவன் ஒவ்வொரு வீடாக ஒளிந்து தப்பிக்க முனையும் போது ... அங்கே வசிக்கும் ஒவ்வொருவரும் , பெரியமனிதப்போர்வையில் செய்கின்ற திருட்டுத்தனங்களை , தவறுகளை காண்கிறான்.

மனைவியிடம் திருடும் கணவன், குடிகாரன் மனைவியை படுத்தும்பாடு, கள்ளநோட்டு அச்சடிப்பவன், ஜோசியம் என்று பொய்வேசம் போடுபவன் என இருக்கிறது அந்த பெரியமனிதர்களின் இடம் . கள்ளநோட்டுக்களை அடிப்பவனோடு மருத்துவர் உடந்தை. அவர்களிருவரும் வீடுகளுக்கு இடையில் ரகசியப்பாதை வைத்து திருடனைத் தேடிவரும் போலீஸ் குழுவிலிருந்து தங்கள் தவறை மறைக்க முயல அங்கே போய் ராஜ்கபூர் சிக்கிக்கொள்கிறார். தங்களுக்காக ராஜ்கபூரை பலியிடவும் அவர்கள் தயங்கவில்லை.. போலீஸ் வந்து சோதனை செய்வதும் அதற்கு முன் ஒரு குழுவாக காவல் செய்பவர்களும் பின் வருகின்ற பத்திரிக்கையாளர்களும்.. 1956 லேயே அப்படித்தான், இன்னமும் பிப்லிலைவ் எடுக்கவும் நம்மிடம் கதை இருக்கிறது.

படத்தைப் பார்த்து பலநாட்களாகிவிட்டதால் சில பகுதிகள் நினைவில் இல்லை. ரோந்துகுழு அமைக்கப்படும்போது அதன் தலைவன் மிக நல்ல வசனங்கள் பேசுவான் . அதற்கான வீடியோ கிடைக்கவில்லை. இந்தப்பாடலைக் கேளுங்கள், படத்தில் வரும் ஒரு பஞ்சாபி ரோந்துக்குழுவின் பாடல்..
The Lyrics and its Translation

Oye aiwe duniya dewe duhai,
jhootha pondi shor
te apne dil to pooch ke vekho
kaun nahi hai chor

The world appeals for no reason
the liar makes hue and cry
Why don't you ask your heart
who is not a thief!

te ki mein jhooth bolya
koi na
te ki mein mein kufr tolya
koi na
te mein ki zeher gholya

Hey have I lied?
No!
Hey have I spread disbelief?
No!
Hey have I poisoned?
No!

Oye hath dooje ka maar maar ke
ban de log ameer
mein ainu kainda chori
dunika kendi taqdeer
By pulling stuff from others hands
people become rich
I call it thievery
the world calls it destiny

te ki mein jhooth bolya
koi na
te ki mein mein kufr tolya
koi na
te mein ki zeher gholya

Hey have I lied?
No!
Hey have I spread disbelief?
No!
Hey have I poisoned?
No!

O hut ke
Paraji bach ke

Hey move aside
Sir, be careful!

O vekhe pandit gyaani-dhyaani
daya-dharam de bande
Ram naam japte
khaave goshala de chande

I have seen wise and pious
men of religion and kindness
They chant the name of Ram
and hoard all the charity

te ki mein jhooth bolya
koi na
te ki mein mein kufr tolya
koi na
te mein ki zeher gholya

Hey have I lied?
No!
Hey have I spread disbelief?
No!
Hey have I poisoned?
No!

O hut ke
Paraji bach ke

Hey move aside
Sir, be careful!

O sachche phansi chade vekhe
jhoota mauj udave
Loki kende rab di maya
Mein kenda anyay

I have seen honest people hanged
while the culprit enjoys life
People say it god's will
I call it injustice

te ki mein jhooth bolya
koi na
te ki mein mein kufr tolya
koi na
te mein ki zeher gholya

Hey have I lied?
No!
Hey have I spread disbelief?
No!
Hey have I poisoned?
No!

O hut ke
Paraji bach ke

Hey move aside
Sir, be careful!
(thanks to sandeep)

இரக்கமே இல்லாமல் ராஜ்கபூரின் உடம்பில் பணக்கட்டுகளை அடுக்கி ஜன்னல் வழியாக வெளியேறவைக்கிறார்கள். மேலே இருந்து தொங்கும் துணியை அறுக்கிறான் முதலாளி. கீழே இருந்து நெருப்பு பற்றவைக்கிறான் ஒருவன். கீழே திரண்ட மக்கள் ( யாரு எவன் என்று தெரியாவிட்டாலும் கூட்டமாக சேர்ந்து கொடிபிடித்தால் கொடிபிடிப்போம், தர்ம அடி போட்டுகிட்டிருந்தால் அதையும் செய்வோம்) ராஜ்கபூரை கீழே இருந்து பொருட்களால் அடிக்கத்தொடங்குகிறார்கள். திருடன் திருடன் என்று திட்டும் அவர்கள் பணம் பையிலிருந்து கீழே விழும்போது அடுத்தவன் பணமென்ற உணர்வின்றி பணம் பணம் என்று பொறுக்கத்தொடங்கிவிடுகிறார்கள்.

மேலும் கொஞ்சம் பணத்தை இறைத்து கவனம் திருப்பி ,தப்பி மேல் மாடிக்கு சென்று நீங்கள் படித்தவர்கள் , பெரியமனிதர்கள் ,நீங்கள் என்னைத்திருடன் என்றா சொல்கிறீர்கள் .. நீங்கள் மட்டுமென்ன..அனைவருமே திருடர்கள் என்று அவர்களின் குற்றங்களைச்சொல்லும்போது அனைவரும் அவனைக் கொல்ல நெருங்குகிறார்கள். அந்தக்காட்சியில் வசத்தின் வீச்சு அருமையானதாக இருக்கும். (அதன் வீடியோ கிடைக்கவில்லை. யாருக்காவது தெரிந்தால் சொல்லுங்கள்.)

மீண்டும் தப்பி ஒரு வீட்டில் நுழையும் போது டெய்சி ராணி (குழந்தைநட்சத்திரம் )அங்கே அவரிடம் கனிவுடன் பேசுகிறார். நீ திருடனா ? இல்லை தானே? அப்பறம் எதுக்காக நீ பயப்படனும் தைரியமாக நட . யாரும் உன்னை எதுவும் செய்யமாட்டார்கள் என்று தன்னம்பிக்கை கொள்ளச்செய்கிறாள். தைரியமாக அவர் நெஞ்சு நிமிர்த்தி நடந்துவெளியேறுகையில் சோதனையிடவந்த போலீஸ் அங்கே தவறு செய்த பெரியமனிதர்களைக் கையும்களவுமாகப் பிடித்துச்செல்கிறார்கள். எளிய விவசாயியை யாரும் கவனிக்கவே இல்லை. அந்த காட்சியை இந்த வீடியோவில் பார்க்கலாம்.

இந்தப்படத்தை என் மகனோடு பார்த்துக்கொண்டிருந்தேன். அழுக்கு உடையும் ஏழையுமாய் இருப்பவனெல்லாம் திருடன் இல்லைடா என்று சொல்லிக்கொண்டிருந்தேன். குழந்தை அவனுக்கு தைரியம் சொல்லும் காட்சி வரை கவலையாக இருந்த அவன் முகம் மலர்ந்ததைக் கண்டேன். இன்று இப்பதிவை எழுதத் தயார் செய்தபோது கூட.. இந்தக்காட்சியை மீண்டுமொருமுறை பார்க்கவேண்டுமென்று உட்கார்ந்திருந்தான்.
Jaago mohan pyaare, jaago
Jisne mann ka deep jalaaya
(Who ever lit the lamp in heart)
Duniya ko usne hi ujalaa paaya
(has found the world lit)
Mat rehna ankhiyon ke sahaare
(Do not depend on eyes only)
Jaago mohan pyaare, jaago
(Arise dear Mohan, Wake up)

தமிழ்மீடியாவில் சிறுமுயற்சி

2011-08-16T18:15:00.002+05:30

தமிழ்மீடியா தளத்தில் சிறுமுயற்சி தளம் பற்றி அறிமுகம் வெளிவந்திருக்கிறது. இன்றைய வலைப்பூ பகுதியில் சிறுமுயற்சிக்கும் இடமளித்த அவர்களுக்கு என் நன்றிகள். இங்கே கீழே இருப்பது அங்கே வெளிவந்திருக்கும் பதிவு.

-----------------------------------------------------------------

வெறுப்புணர்வை இணக்கமாக, பொறாமையை பெருந்தன்மையாக,இருண்மையை ஒளியாக,பொய்மையை உண்மையாக,

தீமையை நல்லதாக, போரை அமைதியாக,தோல்வியை வெற்றியாக,குழப்பத்தை தெளிவாக மாற்றுங்கள்.. எனக் கூறும் முத்துலட்சுமி அதற்கு எல்லாவிடங்களிலும் தேவையானது சிறு முயற்சி என்பதைச் சொல்லாமல் சொல்வது போல் தன் வலைப்பதிவுக்கு வைத்திருக்கும் பெயர் சிறு முயற்சி.
இவரது வலைப்பதிவின் பெயர் சிறு முயற்சியாக இருந்தாலும், அதன்மூலம் இவர் பதிவு செய்கின்ற விடயங்கள் பெருமுயற்சி என்பதில் சந்தேகமில்லை. புதிய இடங்களைச் சுற்றிப்பார்பது சுகமென்றால், அதனை அழகாகவும் ரசனையாகவும் மற்றவர்களுக்கு சொல்வது மகிழ்ச்சி கலந்த பெருமிதம்.
தொடர்புச் சாதனங்களும், உலக வலையாக்கம் விரிவுபடாதிருந்த காலத்தில், தமிழ் எழுத்துலகில் தனது பயணக்கட்டுரைகள் மூலம் உலகின் பல இடங்களுக்கு அழைத்துச் செல்லும் அனுபவத்தைக் கொடுத்தவர் எழுத்தாளர் மணியன். இன்று அந்தச் சூழ்நிலை மாறி, பலரும் பலதும் தெரிந்திருக்கக் கூடிய சூழலிலும், அதேவிதமான ரசனைச்சுவையைத் தனது எழுத்துகளால் வலைப்பதிவில் பதிவு செய்யும் முத்துலெட்சுமியின் முயற்சியை சிறுமுயற்சி என்றிடலாமா..?
சுற்றுப் பயண அனுபவங்கள் என்றில்லாமல் பல்வேறு அனுபவங்களையும் தனது ரசனையின் நோக்கோடு பதிவு செய்யப்பட்டிருக்கிறது சிறுமுயற்சியில். இவ்வாறு அனுபவங்களை, அறிந்தவைகளை அழகாகப் பதிவு செய்யும் முத்துலெட்சுமி குறித்து பலராலும் அறிந்து கொள்ளப்படாத செய்தி ஒன்று உள்ளது.
4தமிழ்மீடியாவில் முன்பு வாரமொரு வலைப்பதிவு பகுதியிலும், 'ஆனந்தி' சஞ்சிகையில் வலைப்பதிவு பகுதியையும் சிறப்பாகத் தொகுத்தளித்தவர் என்பதை, 4தமிழ்மீடியா 4வது ஆண்டில் அடியெடுத்து வைத்திருக்கும் இவ்வேளையில் பெருமையோடு தெரிவித்து, பல வலைப்பதிவுகளின் பரவலான அறிமுகத்துக்குக் காரணமாக இருந்த அவரது சிறுமுயற்றி வலைப்பதிவினை இந்தப் பகுதியில் அறிமுகம் செய்வதில் மகிழ்ச்சி அடைகின்றோம்.
அவரா..இவர் என ஆச்சரியப்படுகின்றீர்களா?..

யாவரும் நலம்

2011-08-12T10:13:00.001+05:30

தரைமுழுதும் உதிர்ந்திருக்கும்

பின்கட்டு முருங்கைப்பூ,

செலவழிக்க விரும்பாத

சிறுவாடாய் ,

சின்னப்பிள்ளைகள் சிரிப்பினில் மகிழ்ந்திருந்த

மல்லிகை மணம் வீசும்

முற்றமிருக்கும்.

இல்லாதவர் பெயர்தாங்கிய

பலகைகள் தொங்கும்

இலக்கமிட்ட வாயில்

அனைவருக்குமாய் தவமிருக்கும்.

முகவரிகள் தொலைத்தபின்

நலமில்லா விவரம் தாங்கி

இருபக்கமும் கடிதமில்லை.

சோறிட்ட காகங்கள்

நன்றியோடு

நினைவில் நிறுத்தி

கரைகின்ற ஒரு பொழுதில்

யார் காலடியாவது

புழுதி கலைத்து நுழையுமெனில்

மீண்டும் ஒருநாள்

கடிதங்கள் வரக்கூடும்.

பேனாக்கள் உயிர்த்தெழுந்து

நலங்கள் விசாரிக்கப்படலாம்.

நலங்களை நினைப்பதில்

எங்கிருக்கிறது பிழை?

யாவரும் நலமென

எதற்கும் நாம் கையெழுத்திட்டுப்

பழகிக்கொள்வோம்.

28.ஜூலை 2009 ல் ஈழநேசனில் வெளிவந்த கவிதை

கேப் மே ஃபெர்ரி ரைட்

2011-08-11T11:39:00.002+05:30

கேப் மே எமலன் பிசிக் எஸ்டேட் (Emlen Physick Estate)

பிசிக் ந்னு ஒரு டாக்டர் . ஆனா அவர் டாக்டருக்கு ப்ராக்டிஸ் செய்யலையாம். விவசாயி யா மாறிட்டாராம். அவர், அவருடைய அம்மா , ஒரு அத்தை அந்த எஸ்டேட் வீட்டில் இருந்தாங்களாம். பிசிக்கோட தாத்தா தான் அமெரிக்க அறுவை சிகிச்சை மருத்துவத்துக்கு தந்தையாம்.. அவர் கண்டுபிடித்த சிகிச்சைக்கான புதிய முறைகளும் கருவிகளும் இன்றும் பயன்படுகிறதாம்..

வீடுகள் வாங்கி விற்பதும் , (கேப் மே)ஊர் எப்படி இருக்கவேண்டும்ன்னு முடிவு செய்யும் கூட்டங்கள் நடத்துவதுன்னு அவர் பொழுதைப்போக்கி இருக்கிறார். அவருக்குப் பின்னால் அந்த இடத்தை இப்பொழுது மிட் -அட்லண்டிக் செண்ட்டர் என்கிற ஆர்ட் அண்ட் ஹுயுமனிடீஸ் நிறுவனம் எடுத்து நடத்துகிறதாம். வருகிறவர்கள் நுழைவுக்கட்டணம் கொடுப்பதை வைத்தே நிர்வாகம் நடக்கிறதாம். இதையெல்லாம் இதோ இவங்கதான் எங்களுக்கு சொன்னாங்க...

சுற்றிக்காட்ட அவர்களுக்கு ஒரு குறிப்பிட்ட கூட்டம் வரவேண்டும் . அதனால் எங்களைக் காக்க வைத்திருந்தார்கள். எங்களுக்கு கேப் மே ஃபெர்ரிக்கு அடுத்து போகவேண்டுமே என்ற போது சரி உங்களுக்கு முதல் தளம் மட்டும் காட்டுகிறேன். நீங்கள் பிறகு செல்லலாம் என்றார். அதுல என்ன பெருந்தன்மையோ.? மற்றவர்கள் வரும் முன் மேல்தளத்தை எங்களுக்கு காட்டி இருக்கலாம். ம்..

வீட்டின் ஒவ்வொரு அறையும் அன்றைய காலத்தில் எப்படி அலங்கரிக்கப்பட்டிருந்ததோ அதே முறையில் அப்படியே இருந்தது. வரவேற்பரையின் ப்ரம்மாண்ட அலங்கராங்களும் , உணவுக்கூடத்தின் அருமையான தட்டு கரண்டிகளின் கலெக்சனும் ( என் மருமகனுக்கு ஸ்பூன் கரண்டின்னா பிரியம் எடுத்து தரலன்னா அழுவான் அடுத்த அறைக்கு ஓடுங்க ) பெரிய பெரிய இரும்பு அடுப்புகளும் சின்ன இரும்பு இஸ்திரி பெட்டியும் துணி துவைக்கும் மர அடுக்குகளும் வித்தியாசமான ஒன்று தான். மரவேலைப்பாடுகள் நிறைந்த அந்த வீடு அழகோ அழகு. இன்னும் அந்த எஸ்டேட்டில் பார்க்க வேண்டியது இருந்தாலும். என்ன கிடைத்ததோ அதை சரியாகப் பார்த்துவிட்டோம். இந்த வண்டியில் வைத்து இன்னும் சில இடங்களையும் உள்ளே காண்பிப்பார்களாம்.

கீழ்தளத்தைச் சுற்றிக்காண்பித்துவிட்டு வீட்டுக்கு வந்த விருந்தாளியை வழியனுப்புவது போல வெளீயே வந்து சரியான நேரத்துக்கு ஃபெர்ரியைப் பிடித்துவிடுவீர்கள்ன்னு நினைக்கிறேன் என்று சொல்லி வழியனுப்பினார்கள்.

இந்த இணைப்புக்கு சென்று அந்த அறைகளை நீங்களும் பார்க்கலாம்.

கப்பலுக்கு நேரமாச்சு..

வாங்க இந்த வீடியோவைப் பாருங்க.. அப்படியே நீங்களும் கூடவே காரில் அமர்ந்தபடியே கப்பலுக்கு ஏறுங்க..

கேப் மே டெர்மினல் பாருங்க நீலக்கலர் கூரையோட எவ்வளவு அழகா இருக்கு. அந்தப்பக்கம் லூயிஸ் லயும் டெர்மினல் இதே அமைப்பும் நிறமும் தான்.

இதோ இந்த வழியாப்போனோம்ன்னா கப்பலுக்குள் கார்களை நிறுத்தற இடம் இருக்கு.

நிறுத்திட்டு அப்படியே படிகளில் ஏறி மேல போகலாம். மேலே ஏறும்போதும் இறங்கும்போதும் மிகக்கவனம் வேணும்.. அடிக்கின்ற காற்றோ அல்லது கப்பலின் ஆட்டமோ நம்மை தண்ணிக்குள் தள்ளிவிட்டுவிடும். கைப்பிடியை சரியாப்பிடிச்சுக்கவேணும்..

முதல் தளத்தில் நல்ல உணவுக்கூடமும் கடையும் இருக்கிறது. வாங்கும் உணவுகளை கப்பலின் ஆட்டத்தோடு சரியான மேஜைக்குக் கொண்டு செல்வது கூட பெரிய விசயம் தான். கொஞ்சம் மஃபின்ஸும் சல்சாவும் சிப்ஸும் ஐஸ்க்ரீமும் வாங்கிக்கொண்டு அமர்ந்தோம். பிறகு அதற்கடுத்த தளத்துக்கு ஏறவேண்டும். காற்று தள்ளுகிறது. கதவைத்திறக்க ரெண்டு ஆள் பலம் வேண்டும். படிகளில் ஏறி மேலே போனால் வெள்ளை நிற பெஞ்சுகள் வரிசை வரிசையாக இருக்கிறது.

கடலைக்கிழித்துக்கொண்டு செல்லும் கப்பலின் தடம் பின்னால் .. சிறுது நேரம் அதை ரசித்துவிட்டு .. கப்பலின் முன் பகுதிக்குச் சென்றோம்.

அப்போது தூரத்தில் ஒரு யாட்ச் படகு காற்றில் சரிந்தது போலத் தெரிந்தது . கப்பலின் கேப்டன் உடனே ஒலிபெருக்கியில் ,’நாம் அவர்களுக்கு உதவி தேவையா என்று பார்த்துவிட்டு பிறகு தொடர்வோம்’ என்ற படி அதன் அருகில் செல்ல ஆரம்பித்தார். ஒலிபெருக்கியில் எல்லாம் சரியாக இருக்கிறதா என்று கேட்டார். அங்கிருந்து ஒரு கை அசைப்பு வந்ததும் சரி என்று மீண்டும் லூயிஸ் நோக்கித் திரும்பினோம்.

ஒரு பாய்மரக்கப்பல் வந்தது. அதைப்பார்ததும் கதை மற்றும் காமிக்ஸ் புத்தகத்தில் பார்த்த கனவு போன்ற கடற்பயணத்தில் இருப்பது போன்ற உணர்வு ..

இந்தப்பயணம் கேப் மே யிலிருந்து லூயிஸுக்கு தரைவழிப் பயணமான 4 நான்கு மணிநேரத்தை கடல்வழியில் ஒருமணி நேரமாகக் குறைக்கிறது. கடலுகு நடுவில் சிறிய இரண்டு லைட் ஹவுஸ்களும் உண்டு. இப்பொழுது தானியங்கி . ஆனல் முன்பு தனியாக அங்கே சிலர் காவல் காத்துக்கொண்டிருந்தார்களாம். எப்படி இருந்திருக்கும்?

google google

கவிஞர் தாமரை

2011-08-08T20:42:00.001+05:30

முன்பு ஈழநேசன் தளத்திற்காக கவிஞர் தாமரையைப் பேட்டிக்கண்டு எழுதி இருந்தேன். அவர்கள் தற்போது தளத்தை முல்லை என்ற பெயரில் மாற்றிவிட்டிருக்கிறார்கள். எனது தளத்தில் ஒரு சேமிப்பிற்காக இங்கே இணைத்திருக்கிறேன்.
----------------------------------
16.10.09

கனிமொழி மற்றும் வைசாலி கண்ணதாசன் போன்றோர் முன்பே பாடல்கள் எழுதி இருந்தாலும் அவர்கள் திரையிசைப் பாடலாசிரியர்களாக தங்கள் துறையை மாற்றிக் கொள்ளவில்லை. இயந்திரவியல் படித்து இயந்திரங்களுடன் பழகத்தலைப்பட்ட ஆறுவருடங்களின் பின் கவிதைகளுக்கான தன் தாகத்தை உணர்ந்தவராய் பாடல் புனையத் தொடங்கியவர் கவிஞர் தாமரை.

பத்திரிக்கைகளுக்கு கட்டுரைகள், கவிதைகள் எழுதிக்கொண்டிருந்த காலத்தில் அவருடைய ஆக்கங்கள் அறியப்படத் தொடங்கியபோது இயக்குனர் சீமானால் திரைத்துறையில் ’இனியவளே’ திரைப்படத்திற்காக தேவாவின் இசையில் ’தென்றல் எந்தன் நடையைக் கேட்டது’ பாடல் மூலம் அறிமுகப்படுத்தப்பட்டார். ஆண்கள் மட்டுமாய் (நடிப்பு தவிர்த்து) இருந்துவந்த துறைக்கு பெண் வருவதும் தன்னை நிலை நிறுத்தி கொள்வது என்பதும் எளிதானது அன்று.

கவுதம் மேனன் மற்றும் ஹாரிஸ் ஜெயராஜ் கூட்டணியில் எழுதிய பாடல்கள் இவருக்கு மிக நல்ல பெயரை ஈட்டித்தந்தன. சின்னத்திரையிலும் கணேஷ் வசந்த், பஞ்சவர்ணம் , பாக்யராஜின் “ ஒரு கதையின் கதை” போன்ற தொடர்களுக்காகப் பாடல்கள் எழுதிய அனுபவமும் இவருக்கு இருக்கிறது. முற்றிலும் பெண்களால் உருவாக்கப்பட்ட ’மித்ரு மை ப்ரண்ட்’ படத்தில் இவர் பாடலாசிரியராக இருந்திருக்கிறார்.

பெண்களின் உணர்வுகளையும் ஆண்களின் வரிகளில் கேட்டே பழகிய நமக்கு , தாமரை எழுதிய ’வசீகரா’ பாடல் தமிழ்த் திரைப்படத்தில் முதன் முதலாக பெண் ஒருத்தியின் காதல் உணர்வு பெண் பார்வையில் எழுதப்பட்ட பாடலாக பதிவாகி இருக்கிறது. பெண்ணின் தேவைகளை ஆசைகளை அவளே வெளிப்படுத்துவதில் வேறுபாட்டினைக் காட்டிய அந்தப் பாடல் அனைவரையும் வசீகரித்த ஒன்று. ஆங்கில வார்த்தைக் கலப்பற்ற பாடல்களைத் தரவேண்டுமென்கிற எண்ணமிருப்பவர். மட்டுமல்லாமல் மிக அழகான தமிழ்ச் சொற்களை இதுவரை பயன்படுத்தாத வகையில் திரைப்பாடல்களில் புகுத்துபவர் என்றும் சொல்லவேண்டும். இன்றைய கணினி உலகத்தில் இளைஞர்களும் வெற்றிப்பெற்ற பாடல்களில் வருகிற அந்தப் புதிய தமிழ்ச் சொற்களை என்னவென்று தேடித் தெளிந்து கொள்வது தமிழுக்கு நன்மையல்லவா? பாடலைப்பாடுபவரும் சரியான உச்சரிப்பைத் தருகிறாரா என்பதை இவர் கவனிக்கும் பழக்கமுடையவர். கூட்டாக அனைவரும் கவனம் எடுத்துக்கொண்டு வெளிவரும் பாடல் அழகாக அமைந்துவிடுவதில் ஆச்சரியமில்லை.

மேலும், இரட்டை அர்த்தக் கலப்புக்கள் மற்றும் ஆபாச வரிகள் இன்றி வெளிவரும் மிக மெல்லிய உணர்வுகளைக் காட்டும் வரிகளைக் கொண்ட தாமரையின் பாடல்கள் மக்களின் மனதை வருடி மகிழ்விக்கிறது . ஃபைவ் ஸ்டார் படத்தின் ஒரு பாடலில்

வானவில்லாய் ஆணும்
வண்ணம் ஏழாய் பெண்ணும்
இருந்தால் இன்னும்
வானின் அழகு கூடும்
சுட்டு விரலாய் நீயும்
கட்டை விரலாய் நானும்
எழுதும் எதுவும்
கவிதையாக மாறும்

எளிமையாகவும் காதலைச் சொல்வதில் நளினமாகவும் வந்து விழுகிறது வார்த்தைகள்.

வேண்டாத வேலையென்று ஈழத்துப் பிரச்சனைகளை பலர் தவிர்த்துக் கொண்டிருக்க ,சிலரோ ஆறுதலாகப் பேசிவிட்டு அமைதிகொள்ள , தாமரை அதிகாரங்களையும் எதிர்த்துக் குரல் கொடுத்த வண்ணமிருக்கிறார். தன் கவிதைத் தொகுப்புகளிலும் மேடைப்பேச்சுக்களிலும் அவரின் எண்ணங்களை உரத்துச் சொல்கிறார். ஈழநேசன் (தற்போது முல்லை) இணையதளத்திற்காக தனிப்பட்ட முறையில் தாமரை அளித்த பேட்டியைக் கீழே காணலாம்.

இரட்டை அர்த்தக்கலப்பற்ற.. மெல்லிய உணர்வுகளைக் காட்டக்கூடிய நல்ல தமிழ் வார்த்தைகளால் ஆன பாடல்களைத் தருவதற்கு நீங்கள் தனியாக முயற்சி எடுக்க வேண்டி இருக்கிறதா?
ஆமாம், நான் திரைப்படங்களில் பாடல் எழுத வந்து 12 வருடங்களாகின்றன. அப்பொழுது ஆங்கில வார்த்தைகளும் இரட்டை அர்த்தங்களுமான பாடல்கள் வெற்றிப்பெற்றுக் கொண்டிருந்த காலம் தான். வரும்போதே அப்படியான பாடல்களை எழுதமாட்டேன் என்று ஒரு முடிவெடுத்துத்தான் எழுத வந்தேன்... வாய்ப்புக் கிடைப்பதே அபூர்வமாக இருக்கும்; அல்லது வாய்ப்பே கிடைக்காது. நான் நிபந்தனை போடக்கூடிய நிலையும் இல்லை. ஆனாலும் நான் உறுதியாக இருந்தேன். நான் நினைப்பது போல எழுத வாய்ப்புக் கிடைத்தால் எழுதுவது, இல்லை என்றால் அந்த வாய்ப்பே வேண்டாமென்று இருந்தேன். அப்படி எத்தனையோ பாடல்களை நிராகரித்திருக்கிறேன். காலப்போக்கில் கிடைத்த வாய்ப்புகளைப் பயன்படுத்தி நல்ல அழகான பாடல்களாக எழுதும்போது அதுவே ஒரு அடையாளமாகி வெற்றிகளைப் பெற்று தந்திருகிறது.

முன்பெல்லாம் வானொலியில் கவிஞர்களைப் பற்றியும் பாடல்களை எழுதியபோதான சுவாரசியங்களையும் தொகுத்துப் பேசி பாடல்களை அளிப்பார்கள்.. இப்போது தொலைக்காட்சி, வானொலி ஏன் இணையம் என்பது ஒரு வரலாற்றுக் குறிப்பாக மாறிவருகிற காலகட்டத்தில் இணையத்திலும் கூட கவிஞர்களைப் பற்றிய அதிக குறிப்புகள் இருப்பதில்லை. இது பற்றி உங்கள் கருத்து?

இது ஒரு வருத்தமான விசயம்..கவிஞர்களுக்கான மரியாதை தரப்படவேண்டும்.. .குறுந்தகடுகள் ஒலிநாடாக்கள் வருகிறது இல்லையா? பலசமயங்களில் குறுந்தகடு வெளிவந்தபின் தான் எங்களுக்குத் தெரியவரும். அவர்கள் கவிஞர்களின் பெயரைக் குறிப்பிடத்தவறி இருக்கலாம், அல்லது ஒருபடத்துல நிறைய கவிஞர்கள் எழுதறாங்க .. அப்போழுது குறுந்தகட்டில் ஒன்றாகச் சேர்த்துப் போட்டு இருப்பாங்க.. எந்தப் பாட்டு யாரு எழுதினார்கள் என்று தெரியாது. . தற்பொழுது வெளிவந்த ஒரு திரைப்படக் குறுந்தகட்டில் கவிஞர்கள் பெயரே இல்லை..என்ன செய்வது நாம ? கண்டிக்கப்படவேண்டிய விசயம்தான் இது.

தாய்த் தமிழ்ப் பள்ளிக்கான உங்கள் (ஆர்வம்) ஆதரவு ,விரிவாக்கம் பற்றிச் சொல்லுங்களேன்.

ஆதரவுன்னு சொல்வதை விட அந்த முறையை சென்னையில் , அம்பத்தூர்ல ஆரம்பித்தது என் கணவர் தியாகு. இதே போன்ற பள்ளிகள் இன்று தமிழ்நாட்டில் 20 , 25 பள்ளிகள் இருக்குன்னு சொல்றாங்க.. அவற்றுக்கு முன்னோட்டம் எங்கள் பள்ளி. தமிழ்க் குழந்தைகள், தமிழ்வழியில் , தாய்மொழியில் படிக்கணும்னு முயற்சி எடுத்து தொடர்ந்து செய்து வருகிறார்.
இப்ப 5 ஆம் வகுப்பிலிருந்து 6 ஆம் வகுப்பு வரை என்றாகி இருக்கிறது. பள்ளியின் முதல்மாணவி இன்று பொறியியற் கல்லூரியில் சேர்ந்து பட்டமே வாங்கிட்டாங்க.. .இடம் வசதியும் போதவில்லை..உயர்நிலைப் பள்ளியாக்க உதவி தேவைப்படுகிறது. உதவி கிடைத்தால் கல்லூரிவரை கூடச் செய்யலாம்..

விருதுகள் பெறுவது பற்றி உங்கள் மனநிலை என்னவாக இருக்கிறது?
விருதுகளை நான் முக்கியமாக நினைப்பதில்லை . கவிஞர்கள் விருதைத் தாண்டி இருக்கவேண்டும் என்றும் நினைக்கிறேன். ஆரம்பக்கட்டங்களில் விருதுகள் ஊக்கமளிக்கலாம்.. எழுத்துக்கு அங்கீகாரமாகவும் , பரவலாகப் பலருக்கும் சென்று சேர்வதற்கும் அவை பயன்படலாம். ஒருகட்டத்தில் விருதுகளைத் தாண்டி நாம வளர்ந்துரனும். தகுதியான விருதுகளைப் பெற்றுக்கொள்வதில் தவறு இல்லை. தகுதியற்ற விருதுகளை மறுக்கவும் செய்யவேண்டும் . தமிழகஅரசு விருது, மக்களோட வரிப் பணத்துல இருந்து கிடைப்பது அந்த ஒரு காரணத்துக்காக அதை வாங்கலாம்ன்னு எனக்குத் தோணும்.. ஆனா எந்த விருதுகளா இருந்தாலும் அரசியல் இல்லாமல் உண்மையான நடுவர்குழு அமைத்துத் தேர்ந்தெடுக்கப்படனும்.
மற்றபடி விருதே வேணாம்ன்னு ஒரு நிலை எனக்கு வரனும்ன்னு நினைக்கிறேன்.. மக்கள் நினைக்கனும், இவர்களுக்கு விருதுகொடுக்கலையே, கொடுத்திருக்கலாமேன்னு நினைக்கனும்..இவங்களுக்குக் குடுத்துட்டாங்களேன்னு நினைக்கக்கூடாது..(சிரிக்கிறார்)

தொடர்ந்து ஈழத்தமிழர்களுக்காகக் குரல் கொடுப்பவர் நீங்கள்.. போருக்குப் பின்னும் மீள்குடியேற்றம் கனவாக, முகாம்களில் ஈழமக்கள் துயருற்று இருக்கிறார்கள். அவர்கள் வாழ்நிலை சீராவதற்கு ஏற்படும் தாமதம் பற்றிய உங்கள் கருத்து என்ன?
உலகம் முழுதும் இலங்கை அரசைக் கண்டனம் செய்து கொண்டிருக்கிறாங்க. இந்தியாவோ மற்ற நாடுகளோ சொல்லி இலங்கை கேட்பதில்லை. போருக்குப் பின் இலங்கை அரசு எப்படி நடந்துகொள்ளும் என்பது எல்லா மத்திய, மாநில, உலக அரசுகளுக்கும் தமிழின உணர்வாளர்களுக்கும் முன்பே தெரிந்த விசயம் தான். அதை இன்று தான் தெரிந்துகொண்டது போல அரசுகள் நாடகம் ஆடுகின்றன. இந்தியாவே இலங்கை அரசைப் பாதுகாப்பது போல் இருப்பதனால் தான் உலகநாடுகள் தயங்குகின்றன .. போர்குற்றங்களுக்காக ஹிட்லரைச் சேர்ந்தவர்கள் பிற்காலத்தில் ராணுவ நீதிமன்றத்தால் தண்டனை பெற்றது போல இன்று உடந்தையாக இருப்பவர்கள் அனைவரும் கூண்டில் ஏற்றப்பட வேண்டும்.
நேற்று (11.10.09)காலை என் கணவரும் முன்னின்று நடத்திய தமிழினப் பாதுகாப்பு மாநாடு நாள் முழுதும் நடந்தது. காலை பேரணியில் மூவாயிரம் பேர் கலந்துகொண்டாங்க..மாலை பொதுக்கூட்டம் இருந்தது . கூட்டத்தில் சில தீர்மானங்கள் எடுத்தோம். அதில் நானும் ஒரு தீர்மானம் வாசித்தேன். இலங்கையை நாம் வற்புறுத்த வேண்டுமெனில் பொருளியல் தடை விதிக்கலாம். தனிமைப்படுத்தலாம். தமிழ்த் திரைப்படத்துறை சேர்ந்தவர்கள் படப்பிடிப்புக்கு இலங்கை போகாமல் இருக்கவேண்டும்.

சுப்புடு நினைவில் ஒரு இசை விழா

2011-08-01T14:57:00.007+05:30

வடக்குவாசல் புத்தகங்கள் வெளியிடும் நிகழ்வும் மற்றும் சுப்புடு நினைவில் ஒரு இசை விழாவும் என்று இந்த வாரம் மூன்று நாள் நிகழ்வு இருந்தது. பொதுவாகவே வடக்குவாசல் நிகழ்வில் தமிழிசை கேட்க நல்ல வாய்ப்பு என்பதால் ஆவலாக எதிர்பார்ப்பதுண்டு. முன்பே வெள்ளி, சனிக்கிழமைகளை அதற்கென ஒதுக்கி வைத்துவிட்டோம். ஞாயிறு அன்று மட்டும் செல்ல இயலவில்லை. மகளுக்கு அடுத்த நாளுக்கான பாடங்கள் தயார் செய்யவேண்டி இருந்தது.

{அன்று அவசரமாய் பத்திரிக்கைகளுக்கு அனுப்ப படம் வேண்டுமென்று என்னுடைய கேமிரா படங்களைத்தான் வாங்கினார்கள்.. எந்த பத்திரிக்கையில் வந்ததென்று தான் தெரியலை :) }

வெள்ளி மாலை என்றாலும் கூட கலாம் என்னும் ஈர்ப்புக்கென சில மக்கள் , இசைக்கான மக்கள், புத்தங்களின் ரசிகர்கள் என அரங்கம் இரு தளங்களும் நிறைந்துவிட்டது. கலாமின் உரை பற்றி விரிவாக கலாநேசன் இங்கே பதிவிட்டிருக்கிறார்.

இந்த உலகில் பிறந்த அனைவருக்கும் வரலாற்றின் பக்கங்களில் ஒரு பக்கம் ஒதுக்கப்பட்டிருக்கிறது. ஆனால் அந்தப் பக்கத்தை இந்த உலகையே படிக்க வைப்பது உங்கள் கைகளில் தான் உள்ளது.- கலாம்

தானாகவே முயல்பவர்களுக்கு எந்த வித உந்து சக்தியும் வெளியிலிருந்து தேவைப்படுவதில்லை. ஆனால் பலருக்கு ஊக்கமும் உந்துதலும் வெளியிலிருந்தே தேவைப்படுகிறது. இல்லையென்றால் இத்தனை எப்படி எப்படி, வெற்றியின் கதைகள் புத்தகங்கள் விற்பனையில் முதலிடத்தில் இருக்குமா?
அப்படி ஒரு ஊக்கத்தை அளிப்பவராக இருக்கிறார் கலாம்.. ஒவ்வொரு முறையும் அவர் கேள்விகளோ உறுதிமொழியோ அல்லது தன் கவிதையோ மேடையில் சொல்லும்போது மக்களையும் கூடவே சிறுவர்சிறுமிகளைப்போல ஒப்புவிக்க வைத்துவிடுகிறார்.

சுப்புடுவின் நினைவுகளைப்பற்றி பகிர்ந்துகொண்டார் கலாம் , சுப்புடு எழுதிய கடிதத்தையும் வாசிக்கச்செய்தார் . அக்கடிதத்தில் இருந்தபடியே சுப்புடு இறந்தபோது மொகல் தோட்டத்து ரோஜாமலரோடு தான் சென்றதையும் சொன்னார். மேலும் அக்கடிதத்தில் ”கலாம் உங்கள் கவிதைகளை நாட்டியமாக்க வேண்டுமென்றால் மிகத் திறமைவாய்ந்த நாட்டியமணிகளால் தான் முடியும் . எனவே எக்காலத்திலும் அதில் நாட்டியமாட அனுமதிக்காதீர்கள்” என்று குறிப்பிட்டிருக்கிறார் சுப்புடு. அந்த வரிகள் வாசிக்கப்பட்டபோது ”அது தான் சுப்புடு ”என்றார் கலாம் சிரித்தபடி. .. அவர் நாட்டியம் தானே ஆடக்கூடாதென்றார் பாடலாக அன்று சீர்காழி சிவசிதம்பரம் அவர்கள் பாடினார்கள். ஒரு கவிதை சிறியது.

வளமான நாடாக்குவோம்
இள உள்ளங்கள் பொறி ஏற்றியே
வளமான நாடாக்குவோம்
இள உள்ளங்கள் பொறி ஏற்றியே

அறிவாற்றலும் தொழில் மாட்சியும்
எங்கள் லட்சியம் ஈட்டிடும் ஆயுதமே
சிறு லட்சியந் தனில் சிந்தனை
வீணாவதை மாபெரும் குற்ற மென்போம் (வளமான )

பொருள் வளமோடு நன்னெறியோடு
நம் பாரதம் உயர்ந்திட உழைத்திடுவோம்
கோடிகள் நூறாகிலும் இந்த
லட்சியச் சுடரினை பரப்பிடுவோம் (வளமான)

இக்கவிதையின் இன்னோரு பத்தி எனக்கு தெரியவில்லை. இசையுடன் அழகாக இருந்தது.

மற்றொன்று மிக நீளமானது (ஆலமரம் பற்றிய கவிதை) மிகக்குறைந்த நேரத்தில் அதனை இசைவடிவமாக்கி பாடிவிட்டதாக பின்னர் பென்னேஸ்வரன் மேடையில் அறிவித்தார்.

வெளியிடப்பட இருந்த புத்தகங்களை பற்றியும் அவற்றின் ஆசிரியர்களையும் பாராட்டிப்பேசினார் கலாம்.
வெளியிடப்பட்ட புத்தகங்கள்
சிந்தனைச் சிதறல்கள் - ய.சு.ராஜன்
விருட்சங்களாகும் சிறுவிதைகள் - சி.டி.சனத்குமார்
சனிமூலை - ராகவன் தம்பி
வடக்குவாசல் நேர்காணல்கள் - ராகவன் தம்பி
தேவந்தி - எம். ஏ சுசீலா
சுசீலாம்மாவின் தேவந்தி கதைத் தொகுப்பிலிருந்து தனக்குப் பிடித்த கதையைக் குறிப்பிட்டு கலாம் மேடையிலேயே பாராட்டிய விதமும் அவர் ஏன் அப்படி அக்கதையை தேர்ந்தெடுத்து குறிப்பிட்டார் என்றும் சுசீலாம்மா இந்த இணைப்பிலுள்ள பதிவில் குறிப்பிட்டிருக்கிறார்கள். தேவந்தி புத்தகத்தை சுசீலாம்மாவின் மகள் மற்றும் பதிவர் விட்டலன் இருவரும் மேடையில் கலாம் அவர்களிடமிருந்து பெற்றுக்கொண்டனர்.

பிறகு சீர்காழிசிவசிதம்பரம் அவர்களின் கச்சேரி தொடங்கியது. வாரீர் தமிழ் தேன் பருகவாரீர் எனத்தொடங்கினார். கலாம் அவர்களின் இரண்டு கவிதைகளைத் தொடர்ந்து இனிய தமிழ் பாடல்களால் எங்கள் ஆவலைத்தீர்த்தார். திருக்குறள்- செய்நன்றி அறிதல் பகுதியிலிருந்து சில குறள்களை பாடலாக்கித்தந்தார். இதுவும் வடக்குவாசல் நிகழ்வின் ஒரு சிறப்பம்சம். ‘மாயவித்தை செய்கிறானே’ கஞ்சிரா,மோர்சிங், வயலின் ,மிருதங்கம் என பக்கவாத்தியத்திய கலைஞர்களோடு கச்சேரி களைகட்டியது.

‘நீயல்லால் தெய்வமில்லை’ இந்தப்பாடலைக் கேட்டால் நெகிழ்ந்து அழுகை தொண்டை அடைக்கும்.

ஓயாமல் ஒழியாமல் உன்னருள் தந்தாய் நீயல்லால் தெய்வமில்லை முருகா ....

‘சின்னஞ்சிறு பெண்போலே’ ...
’சங்கே முழங்கு’ .. ( கீழே உட்கார்ந்து கார் விளையாடிக்கொண்டிருந்த சபரியும் பாட ஆரம்பித்துவிட்டான் சங்கே முழுங்கு)
‘உள்ளத்தில் நல்ல உள்ளம் உறங்காதென்பது’ ....
தூரதொலைவிலிருந்து வந்தவர்கள் சிலர் கிளம்பத்தொடங்கிவிட்ட போதிலும் இருக்கின்ற மக்கள் விரும்பிக்கேட்ட பாடல்களைத் தொடர்ந்து பாடுவதில் ஆர்வமாக இருந்தார் சீர்காழி. இருக்கையிலிருந்து எழுந்து ஒரு வயதான அம்மா ( அவர்கள் எழுந்த வேகமும் பாடலைச் சொன்னவேகமும் நிச்சயம் அவர்களின் உள்ளிருந்த இளவயதைச்சொன்னது) ’அமுதும் தேனும் எதற்கு பாடுங்க’ என்றார். தேனாக இருந்தது கச்சேரி முழுவதும். அவரே எழுதிய ஆங்கிலப்பாடல் லார்ட் முருகா லண்டன் முருகா பாடலும் பாடினார். :)

சனி மாலையன்றும் அரங்கம் நிரம்பிவிட்டது. சுப்புடு குடும்பத்தினர் ஒரு அறக்கட்டளை நிறுவி இளைஞர்களுக்கு சுப்புடுவிருது வழங்க இருக்கிறார்கள். இவ்வருடத்திற்கான விருது குமாரி சௌம்யாவிற்கு வாய்ப்பாட்டிற்கும் , மிருதங்கத்திற்கு ஒரு சிறுவனுக்கும் கிடைத்தது. (ஸ்ரீராம் எனநினைக்கிறேன்).

ஐ ஏ எஸ் பாலசந்திரன் அவர்கள் தமிழிசையை பரவலாக்கவேண்டிய அவசியத்தினைக் குறித்து சிறிய உரையாற்றினார்.
நித்யஸ்ரீ ”தத்வமறிய தரமா”என்று கணபதியை ரீதிகௌளையில் பாடித் தொடங்கினார்.

சென்ற இசைவிழாவின்போது நித்யஸ்ரீ அவர்களின் பாட்டி காலமானதால் தில்லி வர இயலாமல் போனது. எனவே இம்முறை பாட்டி பாடும் பாடல்களில் தனக்குப் பிடித்தமானவற்றை பாடினார்.
'மரியாத காதய்ய’, பாகிமாம்ராஜ ராஜேஸ்வரி, ஈசனே கோடி சூர்யப்ரகாசனே ,ப்ருஹிமுகுந்தேத்தி ரசனே...
எங்கள் ஊர் மலை மந்திர் முருகன் மேல் பாடப்பட்ட ’உத்தர ஸ்வாமிமலை உகந்த முருகா உன் சிற்றடி தனில் பணிந்தேன்’ என்ற பாடலையும் பாடி தில்லி மக்களை குளிர்வித்தார். இந்தப் பாடல் மீனாட்சி அம்மாள் என்பவர்களால் இயற்றப்பட்ட பாடல். அவர்களை முருகன் பாட்டியென்றே பலரும் அறிவார்கள். முருகன் மேல் விருப்பமாக பல பாடல்களையும் எழுதியுள்ளார்.

கவிமணியின் ’எங்கள் நாட்டுக்கு எந்த நாடு ஈடு ?’(பெருமைக்கென்ன கேக்கனுமா..)

’தீராத விளையாட்டு பிள்ளை ’.. அதே பாட்டியின் சாயலில் பாடினார்.

’கோட்டைக்கட்டாதேடா மனிதா ..’ இந்தப்பாடலை நான் கேட்டதே இல்லை.
மகாராஜபுரம் சந்தானம் அவர்களின் வசந்த் ராக தில்லானா பாடி நிகழ்ச்சியை நிறைவுசெய்தார்.

மகளுக்கு நித்யஸ்ரீ என்றால் மிகப்பிடிக்கும். அவருடைய கையெழுத்தைப்பெறவும் புகைப்படம் எடுத்துக்கொள்ளவும் மேடையேறினோம். சிரித்தமுகத்துடன் ”பாடறியாம்மா .. நல்லா பாடு” என்று கூறி கையெழுத்திட்டுக் கொடுத்தார்கள். வீடு வரும்போது தீராதவிளையாட்டுப்பிள்ளையே காதுகளில் ஒலித்துக்கொண்டிருந்தது.

ஆன் த வே டு கேப் மே...

2011-07-26T23:08:00.003+05:30

Denny's ல காலைச்சாப்பாட்டிற்கு வந்திருக்கிறோம். தம்பி மனைவியின் பிறந்தநாள் என்பதால் வெளியில் சாப்பாடு. ப்ரஞ்ச் டோஸ்ட் மேலே கொஞ்சம் ஜீனி தூவி , ப்ரன்ச் ப்ரைஸ், சீஸ் காஸடியா (Quesadilla), குழந்தைகள் மெனுவில் இருந்து ஆப்பிள் துண்டுகள் , லெமன் ஜூஸ்,சீஸ் ஆம்லெட்.
இந்த சீஸ் காஸடியா ரொம்ப நல்லா இருந்தது.. மைதா மாவில் சிறிய சப்பாத்தி போல இட்டு அதில் நடுவில் சீஸை வைத்து அழுத்தம் கொடுக்கிறார்கள். எங்க போனாலும் குட்டிப்பையனுக்கு அது இருந்தால் போதும்.

அடுத்து cape may கேப் மே நோக்கிப் புறப்பட்டோம். அந்த ஊரில் எல்லா வீடுகளும் அவ்வளவு அழகு. பழமையான விக்டோரியன் மாடல் வீடுகள் என்று அவற்றை அழைக்கிறார்கள். வண்ணமயமான வீடுகள்.

சிலபழமையான வீடுகளை அப்படியே தங்கும் விடுதிகளாக செய்து பராமரிக்கிறார்கள். திருமணங்கள் நடத்த ஏற்பாடு செய்துதருகிறார்கள். விக்டோரியன் வீடுகளில் , அழகான கடற்கரையில் திருமணங்கள் செய்துகொள்வது என்றே ஆர்வமாய் சிலர் வருகிறார்கள்.

பொதுவாக அமெரிக்கா முழுவதுமே எல்லார் வீட்டு முகப்பிலும் அந்நாட்டுக்கொடி ஒன்று சாய்ந்தபடி பறந்துகொண்டிருக்கிறது. நம்ம எல்லாம் நேராத்தான் நிறுத்துவோம்ன்னு..நிறுத்திய கம்பத்தில் காற்றில்லாம கொடி சுருங்கிக் கிடக்கவிடுகிறோம். . கம்பத்தை சாஞ்சாப்பல சொருகிவச்சிட்டு கொடியை முழுக்கத் தெரியும்படி பறக்கவிடறாங்க..:)

(photo : thanks Steve and liza)
நியூஜெர்ஸி மாநிலத்தின் தெற்கு முனையில் இந்த லைட் ஹவுஸ் இருக்கிறது. இந்த இடம் படக்காட்சியாக ஓவியமாக அதிகமாக வெளிவந்திருக்கிறதாம். நீங்க பார்த்திருக்கீங்களா?

முதல் முறை கட்டப்பட்ட கலங்கரைவிளக்கத்தை கடலே சாப்பிட்டுவிட்டதாம். இரண்டாம் முறை சரியில்லாததால் உடைந்துபோய்விட்டதாம். இப்போது இரண்டு சுவர்களாக மிக அதிகமான பாதுகாப்புடன் கட்டப்பட்டு ,தொடர்ந்து இயங்கிக்கொண்டிருக்கும் கலங்கரை விளக்கத்தில் ஒன்றாக இருக்கின்றது.( தானியங்கி)

ஜன்னல் வழி காட்சி. வெளிப்புறச்சுவரின் பரிமாணம் தெரிகிறதா?

photo :capemaytimes

199 இரும்புப்படிகள் . மேலே ஏறியபின் அங்கிருந்து அழகான காட்சி. கம்பிகள் இட்டிருந்தாலும் என்னவோ அந்த இரும்பு மேடையின் ஓரமாக நடப்பதற்கு ஒரு திகில் தான். காற்று பிச்சு வாங்கியது.

இந்தப்படத்தில் கடற்கரையில் சிமெண்ட் நிறத்தில் தெரிவது இரண்டாம் உலகப்போரின் போது பயன்படுத்தப்பட்ட பங்க்கர். படத்தைக் கிளிக் செய்து பெரிதாகப்பாருங்கள். கடலுக்கு எதிரில் தேங்கி இருக்கின்ற நீர்ப்பகுதியில் விதவிதமானப் பறவைகள் வருவதால் அங்கே பறவை பார்க்கும் மேடை ஒன்றும் அமைத்திருக்கிறார்கள். அதன் அருகில் ஒரு பிக்னிக் கூடாரம் உள்ளது . கொண்டுவந்த உணவை அங்கே வைத்து சாப்பிடலாம். எங்கும் உணவு விற்பனை கிடையாது.
(காலையிலேயே அறையில் மின் குக்கரில் சாதம் சமைத்து வந்திருந்தோம். புளிக்காச்சல் சேர்த்து , சிப்ஸ் மற்றும் ப்ரூட்டியுடன் அங்கே தான் அமர்ந்து மதிய உணவு முடித்தோம்.)

ஒரு ”ப்ரஞ்ச் பியர்’ பெரியவர் மேலே ஏறி வந்தார். ஆனால் கதவைத்தாண்டி அந்த இரும்பு மேடையில் கால் வைக்கவில்லை. “ஹனி ஐ ம் கோயிங் டௌன்.. டோண்ட் டோண்ட் டச் மீ “ என்று அவரை நிறுத்த முயன்ற மனைவியை நோக்கி பரபரப்பாக பதில் சொல்லிவிட்டு கீழே இறங்க ஆரம்பித்துவிட்டார். அவர் முகம் மேலும் சிவந்து பயந்து போயிருந்தது. அவர் ஒழுங்காக இறங்கிப்போய்விடுவாரா என்று எனக்கு பயமாக இருந்தது. வெளியில் பார்க்கத்தான் அவருக்கு பயம் போல...

photo: southfloridadayily

கடற்கரைக்குப் போகலாமா? இதோ இந்த நொடி கடற்கரை எப்படி இருக்கென்று கூட நீங்கள் பாக்கலாம். ஒரு சில இடங்களில் லைவ் கேமராக்கள் பொருத்தி இருக்கிறார்கள். இந்த இரண்டு இணைப்பிலும் நீங்கள் பார்க்கலாம். நமது நேரம் பகலில் பார்த்தால் கருப்பானத் திரையினைத் தான் பார்ப்பீர்கள்:) அமெரிக்க நேரத்தைக் கணக்கில் கொண்டு பார்க்கவும்.
cape may live cam

http://www.thesurfersview.com/index.php?option=com_content&view=article&id=200&Itemid=199

http://www.sunsetcam.com/cams/capemaycams.html

கடற்கரைக் காட்சிகள் இரண்டு . இந்தப் பாட்டு எவ்ளோ அழகு கேளுங்களேன்..காதல் ஜோடிகளாகப் போகாவிட்டாலும் போகிற வழியில் காதலை சந்திப்பார்களோ?

on the way to cape may

i fell in love with you

on the way to cape may

i saw my dreams come true

அமெரிக்கா-2- அட்லாண்டிக் சிட்டி

2011-07-22T11:38:00.003+05:30

மாலையில் தயாராகி பெட்டிகளை அடுக்கிவிட்டுப் பார்த்தால் எண்ணிக்கை நம்பமுடியாததாக இருந்தது. பெட்டிகளைத் தவிர நமக்கான உணவு இந்த நாட்டில் கிடைப்பது அரிது என்பதால் உணவுப்பொருட்களும் கணக்கில் சேர்ந்திருந்தது. ஒரு பெரிய ட்ரம் சைஸ் கூலர் அதனுள் பரோட்டா மாவு சப்பாத்தியாக இட்டது, ரெடிமேட் சப்பாத்திகள், அதற்கான சப்ஜி வகையறாக்கள், பழரசங்கள் , தயிர், பால் , ப்ளேவர்ட் மில்க் ,புளிக்காச்சல் அனைத்தும் இருந்தது. அடுத்து வரும் நாட்களில் சமைக்க அரிசி , அதற்கான மின் குக்கர் , தட்டுகளும் ஸ்பூன்களும் என ஏறக்குறைய வீட்டைக் காலி செய்துவிட்டோம். இன்னும் நின்று யோசிக்க யோசிக்க பொருட்கள் சேரும் என்பதால் கிளம்பிவிடுவதே நல்லது என்று கிளம்பினோம். இதில் சின்னப்பசங்களுக்கு கார் இருக்கையின் மேல் உயரமாக்கிக்கொடுக்கும் இருக்கைகள் வேறு.

காருக்குள் பொருட்களுக்கு மத்தியில் நாங்கள் ஏழு பேரும் இருந்தோம். ஒரு உருளை நாப்கினும் உண்டு. நீங்கள் எது கேட்டாலும் இல்லையென்று சொல்லமுடியாதபடிக்கு அத்தனையும் இருந்தது. முதல் திட்டம் சூதாட்டவிடுதிக்கு செல்வது.

அட்லாண்டிக் சிட்டி சென்று சேரும்போது இரவு . மின்விளக்குகள் ஒளிர கடைத்தெருக்கள் அழகாக இருந்தது. கசினோ வழியாகத்தான் விடுதியின் மேலுள்ள அறைகளுக்குச் செல்லவேண்டும் என்பதால் குழந்தைகள் அந்த இடத்தைப் பார்க்க முடிந்தது. மற்றபடி குழந்தைகளுக்கு அனுமதியில்லை. புகைப்படமெடுக்க அனுமதி இல்லை.

அறையில் சென்று பொருட்களை வைத்துவிட்டு , போர்ட்வாக்கிங் சென்றோம்.

பகலில் போர்ட் வாக்கிங்க் தோற்றம் (இந்தப்படம் :google)

இரவில் போர்ட்வாக்கிங்க் ..

தரையில் மரப்பலகையால் பாதை அமைத்திருக்கிறார்கள். ஷாப்பிங்கும் கசினோக்களும் ஒருபக்கம் மற்றொரு பக்கம் கடல். நம்ம ஊரில் வந்ததும் ரிக்‌ஷாவா? மனுசனை மனுசன் இழுப்பதா? என்று கூப்பாடு போடறாங்க. மேலே படத்தில் ரிக்‌ஷாக்களைப் பாருங்க.. நம் ஊரிலாவது மனுசன் சைக்கிளைப்போல ஓட்டி இழுக்கிறார்கள். இங்கே நடந்தபடி தள்ளிக்கொண்டு வருகிறார்கள்.

இரவு வெளிச்சத்தில் சூதாட்டவிடுதிகள் பளிச் பளிச் விளக்கு காட்டி எல்லாரையும் அழைக்கிறது.

சீசர்ஸ் சூதாட்டவிடுதி .

கூரைப்பகுதியில் வானத்தையே கொண்டு வந்து வரைந்து வைத்திருக்கிறார்கள். இந்த இணைப்பில் நீங்கள் அவ்விடத்தைச் சுற்றிப்பார்க்கலாம். (virtual tour) ரோமாபுரியில் இருப்பது போன்ற உணர்வு.

இரவில் குழந்தைகளை உறங்கவைத்துவிட்டு தங்கி இருந்த ட்ரம்ப் ப்ளாசாவில் சூதாட்டம் பார்க்கச்சென்றோம். தம்பி முதலில் கொஞ்சம் ஜெயித்து விட்டு பின் தோற்றான். நாங்கள் வேடிக்கைத்தான் பார்த்தோம். டாலர்களை கூப்பன்களாக மாற்றிவிட்டு அந்த மிசின்களுக்குள் செலுத்தி விளையாடவேண்டும். ஒரு முறை டேபிள் கேம் பக்கம் சென்றோம். அம்மேஜையில் விளையாட்டை நடத்துபவர் ஒரு பாட்டி. அவர் கொடுக்கும் சீட்டுக்களின் கூட்டுத்தொகையை வைத்து விளையாட்டு. ஒவ்வொரு நொடியிலும் ஒரு பத்து டாலரை விழுங்கிவிட்டாங்க பாட்டி அம்மா.. சரி போதும் தோற்றதென்று நடையைக் கட்டிவிட்டோம்.

(படம் :google)

பெரும்பாலும் வயதானவர்களே விளையாடிக்கொண்டிருந்தார்கள். அவர்கள் காலத்துக்கு உழைத்து முடித்துவிட்டு இப்போது இப்படி செலவு செய்து கொண்டு இருக்கிறார்கள் போல.. ஆனால் முகத்திலும் மகிழ்ச்சியைப் பார்க்கவில்லை. ஒரு பாட்டி மட்டும் தன் தோழிகளிடம் மகிழ்ச்சியைப் பகிர்ந்துகொண்டிருந்தார்கள். அவர்கள் எவ்வளவோ ஜெயித்திருந்தார்கள் போலும். ’நான் தான் சொன்னேன் ல’ என்று ஒரு பாட்டி அவருக்கு பெருமையைத் தேடிக்கொண்டிருந்தார். எனக்கென்னவோ ஜெயித்து அந்தப்பணத்தை அடுத்த விளையாட்டில் தோற்றிருப்பார்கள் என்று தோன்றுகிறது. ஜெயிக்கின்ற யாருக்கும் வெளியேற மனசு வராது இன்னும் இன்னும் என்று தான் இருக்கும்.

பக்கத்தில் இன்னொரு சூதாட்டவிடுதியில் இப்படி அந்தக்கால வீடுகளும் வீதியும் செட்டப்பில் அமைத்திருந்தார்கள்.

நகரும்படிகள் மட்டும் கொஞ்சம் இடத்திற்கு பொருத்தமற்றிருக்கும். :) யாருமில்லை என்பதால் படம் எடுத்தோம். சரி நாளைக்கு காலையில் டெனிஸ்ல (denny's) ப்ரேக்ஃபாஸ்ட் சாப்பிட்டுட்டு கேப் மே கிளம்பலாம்................................................
அமெரிக்கப்பயணம் -1

அமெரிக்கப் பயணக்குறிப்புகள்

2011-07-21T23:23:00.004+05:30

சிறுமுயற்சியைத் தொடங்கிய இத்தனை வருடங்களில் (5வது ஆண்டு நிறைவு வரப்போகுதுங்க) பார்க்கும் எதனையும் ஒரு ப்ளாக்கராக பார்த்தே பழகி அதை பதிந்து வந்திருக்கிறேன். ஆனால் இம்முறை விடுமுறைக்கு அமெரிக்கா சென்றபோது ஒரு ப்ளாக்கராக நான் உணரவே இல்லை. இப்பொழுது அதிகமாக பதிவுகள் எழுதுவதில்லை என்பதால் இருக்கலாம். அந்த அந்த நொடியை அப்படியே அனுபவிப்பதில் மட்டுமே மனம் இருந்தது. சென்ற இடங்களெல்லாம் தம்பியும் தம்பி மனைவியும் , நாத்தனாரும் அவள் கணவரும் போட்டு வைத்தத் திட்டங்கள் என்பதால் செல்லும் இடம் அதன் விவரங்கள் என எந்தவித திட்டமிடல்களும் எனக்குள் இல்லை. வழக்கமாக நாங்களாகச் செல்லும் பயணங்களில் இருக்கும் திட்டமிடல் என்கிற பளு இல்லாத காரணத்தால் இந்தப் பயணம் இன்னும் ரசிக்கும் படி இருந்தது.

”அடுத்து இப்போ எங்கே போகிறோம்? எவ்வளவு நேரமாகும்?” என்று ⁫அவ்வப்போது விசாரித்துக் கொண்டும் வழிகளின் வரைபடத்தை ’ஐ போன்’ துணைகொண்டு பார்த்துக்கொண்டே செல்வேன். அந்த அந்த நொடியில் அது நாம் இருக்கும் இடத்தையும்,செல்லும் தொலைவையும் வரைபடத்தில் காட்டுவதைப்பார்ப்பதும் சுற்றுப்புறத்தை வேடிக்கைப் பார்ப்பதுமாக இருந்தேன். குறிப்புகள் எதுவும் கூட எழுதவில்லை. நினைவில் வருவதை இங்கே பதிகிறேன்.
-------------------
அமெரிக்கப்பயணத்தை கட்டார் ஏர்வேஸில் பதிவு செய்திருந்தோம். தில்லி விமானநிலையத்தின் ப்ரமாண்ட புதிய தோற்றத்தை முதல் முதலாகப் பார்த்தோம்.ரசித்தோம். விமானம் வரை செல்ல நகரும் நடைபாதையில் சென்றோம். புதிய வசதிகளையும் அழகையும் பார்த்து மனம் பெருமிதமாக இருந்தது.

முதல் விமானத்தில் உணவு வருவதற்குள் கார்டூனை திரையில் பார்த்துக்கொண்டே சபரி தூங்கிவிட்டான். தோஹா விமான நிலையத்தில் தரை இறங்கும் போது எங்கெங்கும் மணற்பரப்பும் , கட்டிட்டங்களும் கூட அதே நிறத்திலே தெரிந்தது வித்தியாசமாக இருந்தது. அமெரிக்க விமானங்களுக்கான அதிகப்படியான சோதனைகள் இன்னும் ஒருமுறை அங்கேயும் நடந்தது . குழந்தைகளும் ஷூ மற்றும் பெல்ட்கள் என எல்லாவற்றையும் கழட்டி ஒரு ப்ளாஸ்டிக் ட்ரேயில் போட்டுவிட்டே மெட்டல் டிடெக்டர்களை கடக்கவேண்டும். அங்கிருந்து மீண்டும் விமானம் ஏறி அமெரிக்கா செல்லும் வழியில் தூங்கி விழித்து , தூங்கி விழித்து சில படங்கள் பார்த்தோம். தமிழ் படங்கள் எல்லாம் பார்த்த படங்களாக இருந்தது.

நியூயார்க் நகரம் - ஜே எஃப் கே விமான நிலையம். இறங்கி வரும் மக்களுக்கென்று ஒரு பந்தாவையும் காண்பிக்காத அரசாங்க அலுவலக தோரணை. எல்லாரும் மிரட்டியபடி அங்கே எந்த சோதனையும் செய்யவில்லை. எங்கே செல்கிறீர்கள்? யார் இருக்கிறார்கள்? எவ்வளவு நாட்கள்? என்று கேட்டுவிட்டு கைவிரல்களின் பதிவுகளை எடுத்துக்கொண்டு நல்வரவு சொன்னார்கள். உண்மையில் இங்கிருந்து கொண்டு சென்ற உணவுப்பொருட்களை எல்லாம் ப்ரவுன் ப்ளாஸ்டிக் டேப்பால் சுத்து சுத்தென்று சுத்தி எல்லா பெட்டியிலும் கொஞ்சம் கொஞ்சமாக வைக்கணும் என்றெல்லாம் சொல்லிவைத்திருந்தார்கள். சரி கும்பிட்டுப்போன கடவுளெல்லாம் நல்லபடி துணையிருந்திருக்கிறார்கள் என்று நன்றி கூறி தம்பியின் வரவுக்காக சிறிது நேரம் காத்திருந்தோம். அன்று அலுவலகத்திலிருந்து சீக்கிரம் கிளம்பி நியூயார்க் நகரம் வரை குடும்பத்துடன் வந்து வரவேற்பளித்தான்.

தம்பி மகனுக்கு இரண்டு வயது. பார்த்ததும் கையில் வந்துவிட்டான். ஆனால் கழுத்தை கட்டியபடி முகத்தை வேறு எங்கோ வைத்துக்கொண்டான். இத்தனை நாள் ஸ்கைப்பில் பேசியவள் நேரிலா என்று குழப்பமும் அன்புமாய் இருந்தான்.
நியூ ஜெர்ஸி நோக்கி செல்லும் வழியெல்லாம் மிக அதிகமான போக்குவரத்து நெரிசல். போனோம் போனோம் போய்க்கொண்டே இருந்தோம். சபரிக்கோ நல்ல தூக்கம் வருகிறது. ஜெட் லாகின் வேலை ஆரம்பித்துவிட்டது. மாமா வீடு எப்போது வருமென்று ஆயாசமாகக் கேட்டான். எங்களுக்கும் கண் எரிகிறது. இருந்தும் இந்திய நேரத்திற்கு தூங்கிவிடாமல் இருக்க கட்டுப்படுத்திக்கொண்டிருந்தோம்.

அடுத்த இரண்டு நாட்களும் ராஜகணபதி கோயில் , ப்ரிட்ஜ்வாட்டர் பெருமாள் கோயில் ( அங்கே ஒரு பதிவர்கள் சந்திப்பும் நடந்தது ) இரு நண்பர்கள் வீடு மற்றும் லிபர்டி சிலை சென்று பார்த்தோம். அவற்றின் புகைப்படங்களை நான் எனது கணினிக்கு மாற்றாததால் குறிப்புக்களை பிறகு எழுதுகிறேன். தற்போது அதற்கு அடுத்த ஐந்து நாட்கள் நாங்கள் சென்ற சிறு சுற்றுப்பயணம் ஆமாம் உண்மையாகவே அது சுற்றுப்பயணம் தான் இந்த வரைபடத்தைப் பாருங்களேன்..

View Larger Map பெரிது செய்து ம் பார்க்கலாம்.

வித்தியாசமான பயணம். 157 அடி உயரத்தில் (கலங்கரை விளக்கத்தில்) ஏறி..

தரைக்கடியில் குகைகளுக்குள் நடந்து,
கப்பலுக்குள் காரோடு ஏறி,
கடலுக்கு மேலே பாலத்தில் பயணித்து, (7 km)
கடலுக்குள்ளும் ( டன்னல் ரோடு) காரை ஓட்டி..............................
காலச்சக்கரத்தில் பின்னோக்கிப் பயணித்து அமெரிக்க சுதந்திர பிரகடனத்தின் போது நடந்தவற்றை கண்டு ..
சரி விளக்கமாக அடுத்தடுத்த பதிவுகளில் .........

ஒன்றுக்கு மூன்றா பதில் கொடுக்கனுமாம்

2011-07-20T14:32:00.005+05:30

ரொம்ப நாட்களாகிவிட்டது (பதிவுலக) பரிட்சை எழுதி இல்லையா? வெங்கட் கேள்விபதில் தொடருக்கு அழைத்திருக்கிறார்கள். இதோ விடைத்தாள்....

1) நீங்கள் விரும்பும் மூன்று விஷயங்கள்?

* தொல்லை தராம எப்பவும் சிரிச்சிக்கிட்டே அம்மா அப்பான்னு சொல் பேச்சுக்கேட்டு பிள்ளைங்க சமத்தா இருக்கின்ற நேரங்கள்
* இனிமையான பாடல்களும் தனிமையும்..
*அடுத்து செய்யவேண்டிய வேலை என்று எதுவும் என் முன்னால் இல்லாமல் இருப்பது .

2) நீங்கள் விரும்பாத மூன்று விஷயங்கள்?

• குழந்தைகளை சீண்டி விளையாடும் பெரியவர்கள்
* வரிசையில் குறுக்கப்போகும் புத்திசாலிகளின் கர்வம்
* நல்ல பாடலுக்கு நடுவில் விளம்பரங்களைப்போட்டு கடுப்பேத்தும் வானொலி தொகுப்பாளர்

3) பயப்படும் மூன்று விஷயங்கள்?

• இரவு நேரத்தைய கார் மற்றும் பஸ் பயணங்கள்
• புதுகைத்தென்றல் பதிவில் இருந்து காப்பியடித்த பதில் ..எனக்கு பிடித்த தனிமையே பயமுறுத்தும் வேளைகள்... •
* மருத்துவரின் எதிர் நாற்காலியில் இருந்து பதில் சொல்லும் நேரம்

4) உங்களுக்குப் புரியாத மூன்று விஷயங்கள்?
ஹே இதை சாய்ஸ் ல விடறேன்ப்பா.. நிஜம்மாவே இந்த கேள்விக்கு என்ன எழுதறதுன்னு புரியலை:)

5) உங்கள் மேஜையில் உள்ள மூன்று பொருட்கள்?

• என் கைபேசி
* சாப்பிட்டு முடித்த சாக்லேட் கவர் ( இதோ எழுதி முடிச்சிட்டு எடுத்துப் போட்டுடறேன்)
* இந்தக் கணினி

6) உங்களை சிரிக்கவைக்கும் மூன்று விசயங்கள் அல்லது மனிதர்கள்?
*வீட்டில் குழந்தைகள் பெரியவங்க மாதிரி நீட்டி முழக்கிட்டு குழந்தை மாதிரி முகத்தை வைத்துக்கொள்ளும் தருணங்கள்
* தோழிகள், மற்றும் உறவினர்களாக கூடி களிக்கும் தருணங்கள் முக்கியமாக அப்பா சித்தப்பா பெரியப்பா எனச் சேரும்போது அவர்கள் பழைய நினைவுகளை வரிசை கட்டிச் சொன்னால் ......சுவாரசியமும் சிரிப்பும் தான்.
* நகைச்சுவைக்காட்சிகள்

7) தாங்கள் தற்போது செய்து கொண்டு இருக்கும் மூன்று காரியங்கள்?

• லீவுக்குப் போய்வந்த அமெரிக்கா பற்றி பதிவு எப்படி எழுதறதுன்னு யோசனை செய்வது
• http://www.ragasurabhi.com/identifying-ragas.html இந்த தளத்தில் இருந்து ராகங்களை அறிந்துகொள்ளக் கத்துக்கலாம்ன்னு ஒரு சிறுமுயற்சி.
• மகனுக்கு வீட்டுப்பாடங்களில் உதவுகிறேன்.

8) வாழ் நாள் முடிவதற்குள் செய்ய நினைக்கும் மூன்று காரியங்கள்?

• முடிந்தவரை பல இடங்களைச் சுற்றிப்பார்க்கவேண்டும்.
• மகளும் மகனும் அவர்கள் வாழ்க்கையில் நான் எட்டாத உயரம் அடைய உதவுவது.
• திண்ணையும் ஊஞ்சலும் தோட்டமும் என ஊரில் வீடு.

9) உங்களால் செய்து முடிக்கக் கூடிய மூன்று விஷயங்கள்?
இதுக்கு என்ன எழுதறதுன்னு தெரியலை.
(இந்த பதிவையே முழுசா முடிக்க முடியலையே..)

10) கேட்க விரும்பாத மூன்று விஷயங்கள்?

• ஒருவேலையைச் செய்யச்சொல்லி அதுக்கு ஒரு டார்கெட் வைத்து என்னிடம் ஒப்படைப்பது.
• வெட்டி பந்தாப்பேச்சு
• ஓவர் அட்வைஸ்

11) கற்றுக் கொள்ள விரும்பும் மூன்று விஷயங்கள்?

• வயலின்
• வேற மொழிகள்
• நீச்சல்

12) பிடித்த மூன்று உணவு வகைகள் ?

• பேல் பூரி
• வெங்காய பக்கோடா ( ஊரிலிருந்தா சிங்கமடை ஸ்வீட் ஸ்டால் பக்கோடா)
• இட்லி கூட சாம்பார் அதுல கொஞ்சம் நல்லெண்ணெய் ஊற்றி.

13) அடிக்கடி முணுமுணுக்கும் மூன்று பாடல்கள்?

• நாளாம் நாளாம் திருநாளாம் நம்பிக்கும் நங்கைக்கும் மணநாளாம்
• ஒரு ராகம் பாடலோடு காதில் கேட்டதோ மனதோடு ஊஞ்சலாடுதோ
* ஏதோ நினைவுகள் கனவுகள் மனதிலே மலருதே காவேரி ஊற்றாகவே

இது ஒரு எக்ஸ்ட்ரா பதில்
• எப்பவும் மகளுக்கு பாட்டு வகுப்பில் புதியதாகச் சொல்லிக்கொடுத்தப் பாடல்களில் எனக்கு பிடித்தது முணுமுணுப்பில் இருக்கும். இப்பொழுது ”மனவியால கிஞ்சரா தடே” .. என்ன ஒரு நளினமான நளினகாந்தி ராகம். பிடிச்சுப்போய் இப்ப பைத்தியமாகி இந்த வீடியோவில் ஸ்வரங்களின் தேனை ரசிச்சிட்டிருக்கேன். “இசையின் ஸ்வரங்கள் தேனா”
ரைட் .. எந்தன் நெஞ்சில் நீங்காத பாட்டோட ராகம் தான்..

14) பிடித்த மூன்று படங்கள்?

•கரகாட்டக்காரன்
• பூ
• மணல்கயிறு

15) இது இல்லாம வாழ முடியாதுனு சொல்லும்படியான மூணு விஷயம்?

• கொஞ்சம் காலமாக கணினி
• எப்போதும் எதாவது பாட்டு
• ----
16) இதை எழுத அழைக்கப்போகும் மூன்று நபர்?

*ஆதவன்
*யாழினி
*விருப்பமுள்ள வேறு யாரும் சொல்லுங்கப்பா
-----------------------------------------
தமிழ்மணம் தமிழ் பதிவர்களுக்கு தாயின் மடிப் போல.... நிதி மிகுந்தோர் பொற்குவை தாரீர்! நிதி குறைந்தோர் காசுகள் தாரீர்! http://tamilmanam.net/
---------------------------------------------------

கதை, படக்கதை, கதை படமாக ,,...

2011-07-11T14:25:00.002+05:30

சிறுவயதில் புகழ்பெற்ற ஆங்கிலக்கதைகளை படக்கதைகளாக பைக்கொ க்ளாஸிக்ஸ் மூலம் தான் வாசித்திருக்கிறேன்.

பள்ளிக்கூடத்தில் தருகிற ஆங்கில புத்தகம் தவிர்த்து வேறெதுவும் வாசிக்க முயன்றதாக நினைவில்லை. பள்ளி முடித்தபின் வாசிக்க முயன்றாலும் முழுசாக முடித்ததாக நினைவில்லை. (முதல் முறையாக கொஞ்ச நாட்கள் முன்பு தான் , மகளின் புத்தக அலமாரியிலிருந்து அவள் தோழி ஒரு புத்தகத்தை எடுத்துச்சென்றுவிட்டு படிக்கப் பிடிக்கவில்லை என்று திருப்பித் தந்தபோது அது ஏன் என்று ஒரு ஆர்வத்தில் வாசிக்க ஆரம்பித்து முழுவதும் முடித்தேன்.[How I saved My Father's live - (And Ruined Everything Else)- ANN HOOD ]சின்னப்பிள்ளைகளாயிற்றே.. அப்பா அம்மா விவாகரத்து என்றும் அதனால் அக்குழந்தைக்கு நேரும் குழப்பங்கள் என்றும் முதல் பாகமே இருந்தால்.. பயந்து போய் இருவரும் அதைப் படிக்காமல் வைத்துவிட்டார்கள் போலும். )

தமிழில் க.நா.சு அவர்கள் மொழி பெயர்த்த புத்தகங்களை வாசித்து முடித்துவிட்டு அதனைப்பற்றி இணையத்தில் தேடியபோது அவை படங்களாகவே கிடைத்தது. அது இன்னும் கதையை மனதில் பதியவைக்க உதவியது.
1984 by George Orwell / Nineteen Eighty-Four

இந்தப்படத்தை இங்கே பார்க்கலாம்

Animal Farm இந்தப் படத்தை இங்கே பார்க்கலாம்.

நம்ம டாக்டர் ரோகிணி எப்பவும் அயன் ராண்ட் பற்றி பஸ்ஸில் சொல்லிக்கொண்டிருப்பார்கள். சமீபமாய் அவரின் பௌண்டெய்ன் ஹெட் புத்தகத்தை பதிவர் தெக்கிக்காட்டானும் வாசிக்கத்தொடங்கி விட்டு பஸ்ஸில் குறிப்பிட்டிருந்தார். அதனைப்பற்றி தேடியதில் அதுவும் படமாக வெளிவந்திருப்பதை அறிந்ததும் சோம்பேறி மனதுக்கு தெம்பாகிவிட்டது . படமாக மாற்றியதில் பல மாற்றங்களுடன் சுருக்கமாகிவிட்டாலும் எதோ அதையும் அறிமுகப்படுத்திக்கொண்டதாக ஆகிவிட்டதல்லவா?
இங்கே அப்படத்தை பன்னிரெண்டு பாகமாகப் பார்க்கலாம். இனி மெதுவாக வேண்டுமானால் பிடிஎஃப் கோப்பை இங்கிருந்து படித்துக்கொள்ளலாம்.

இதே போல பாரபாஸ் படமும் பார்த்த ஞாபகம். அப்போதே அதை சேமித்துவைக்கவில்லை.
( அதான் இந்த சேமிப்பு பதிவு )தற்போது அதன் இணைப்பு கைக்கு கிடைக்கவில்லை. வெறொரு இணைப்பில் இருக்கிறது ஆனால் எதோ மொழியில் ஒருவரே மொழிபெயர்த்து அந்தக்குரலை மேலே ஒலிக்கவிட்டிருக்கிறது போல இருக்கிறது. அதை சகித்துக்கொள்வதாக இருந்தால் படத்தைப் பார்க்கலாம். http://www.veoh.com/watch/v12000307AcXStkhH ..

செம்மொழி விருதுகள்

2011-05-06T13:12:00.007+05:30

செம்மொழி தமிழுக்கான குடியரசுத் தலைவர் விருதுகள் பெறுகிறவர்களை தில்லித் தமிழ்ச்சங்கம் இன்று சிறப்பு செய்கிறார்கள். மேலே அழைப்பிதழில் விருது பெறுபவர்களின் பெயர்களைக் காணலாம். மாலை 6.30 மணிக்கு தமிழ்சங்கத்தில் இந்நிகழ்வு நடைபெறும்.

நேற்று தமிழ்ச்சங்கத்தில் முனைவர் மு. இளங்கோவன் அவர்களுடன் ஒரு (இணையத்தில் தமிழ் )கலந்துரையாடலை ஏற்பாடு செய்திருந்தனர். வடக்குவாசல் ஆசிரியர் கி.பென்னேஸ்வரன் அறிமுகம் செய்து வைக்க , முனைவர் இணையத்தில் தமிழின் அவசியம் பற்றிப்பேசினார். இன்னும் பரவலாக அனைவரும் இணையத்தில் தமிழை உலவச்செய்ய வேண்டுமென்று வலியுறுத்தினார். தமிழறிஞர்கள் பலரைப்பற்றியும் இணையத்தில் இதுவரை பதியப்படாமல் இருப்பது பற்றி வருந்தினார். அனைவரும் பங்குபெற்றால் அக்குறைகள் களையப்படும்.

மந்திரக்கோல்

2011-04-06T22:21:00.002+05:30

பெண் எழுத்து என்கிற தலைப்பில் நம்ம ஆசியா கூப்பிட்டிருக்காங்க..ரொம்ப நாட்களாக பிள்ளைகளின் பரிட்சையும் விடுமுறையும் என்று நான் எதையும் எழுத இயலவில்லை. பாருங்க இப்படி இருக்கு பெண் எழுத்து. பலவிதமான கடமைகளுக்கு நடுவில் பெண்கள் விசயங்களைப் பகிர்ந்துகொள்வதை கொஞ்சம் தள்ளிப்போடுவதை வழக்கமாக்கியே வைத்திருக்கிறோம். அப்படியே பகிர்ந்துகொண்டாலும் அதன் தொடர்விளைவுகளைப் பற்றியும் யோசிக்கிறோம். சிலர் பரீட்சார்த்தங்களில் ஈடுபடுகிறார்கள். முயற்சிக்கிறார்கள் . சிலர் வெற்றி பெறுகிறார்கள். எழுத்தைப் பெண் எழுத்தென்று பிரிக்கவேண்டிய அவசியமில்லை என்று கூறுவது ஒரு புறமிருந்தாலும் அதன் அவசியம் என்று ஒன்று இருக்கிறது.

உலகம் முழுதும் ஆண்களைப்பற்றிய கருத்துக்கள் ஒன்று விடாமல் ஆண்களால் எழுதப்பட்டுவிட்டதோடு அவர்களே பெண் மனம் என்ன சிந்திக்கும் அவளுக்கான துயரங்கள் என்ன? அதற்கான தீர்வுகள் என்ன என்பதையும் எழுதி வைத்திருக்கிறார்கள். எந்த ஒரு விசயத்திற்கும் இரண்டு பக்கங்கள் உண்டு. பல வருடங்களாக நாம் அந்த ஒரு பக்கத்தையே ஏன் பார்க்கவேண்டும் மற்றோரு பக்கத்தையும் பார்க்கலாமே.. அதற்காகவேனும் பெண்களின் எழுத்து என்று ஒன்று நிறைய வரவேண்டியே இருக்கின்றது. இன்னமும் கூட போதுமன உயரத்தை அந்த எழுத்து அடையாமல் இருப்பதற்கு அவர்களுடைய தளைகளே காரணம். அவை அன்பான தளைகளாய் இருப்பதால் கொஞ்சம் கடினம் தானே.

பெண் எழுத்து என்ற உடன் சமீபமாய் படித்த, நினைவுக்கு வந்த சிலவற்றை இங்கே குறிப்பிடுகிறேன் .

நினைவுக்குறிப்பாக அக்கதையைப்பற்றி சிறிதாக எழுதி வைத்திருக்கிறேன் இங்கே சசி தேஷ்பாண்டேயின் “என் அன்பான சாரதி” வயதான காலத்தில் கணவனை இழந்த தாய்க்கும்சிறுவயதில் கணவனை இழந்த மகளுக்கும் இடையில் எழும் பிரச்சனையைக் குறிப்பிடும் கதை.

-----------

The white masai என்று ஒரு படம் பார்த்தேன் . ஒரு ஜெர்மனியப்பெண் பாய் ப்ரண்டுடன் கென்யாவுக்கு லீவுக்கு சென்றவள் அங்குள்ள பழங்குடியன் ஒருவன் மேல் கொண்ட ஈடுபாட்டால் அங்கேயே தங்கிவிடுகிறாள். அது அந்த பெண் எழுதிய உண்மைக்கதையைக் கொண்டு எடுக்கப்பட்டது என்பதால் அதனைப்பற்றி இணையத்தில் தேடியபோது அதன் பின் அவர் மேலும் இரண்டு புத்தகங்களூம் போட்டிருப்பதாகத் தெரிந்தது. நேர்மறை எதிர்மறை கருத்துக்கள், அப்புத்தகத்தை விட அந்த பெண்ணின் குணத்தைப்பற்றிய அலசல்கள் தான் அதிகம் கிடைத்தது. வாழ்க்கையில் சடாரென்று முடிவெடுப்பது பற்றி பலருக்கும் பல கேள்விகள் இருந்தது. ஃபேரிடேல்களைப் படித்து வளர்ந்தவர்களுக்கு கூட வாழ்க்கையில் அதுபோன்ற சந்தர்ப்பங்களை நம்பமுடிவதில்லை. மேலும் கலாச்சாரத்தில் எதிரெதிர் துருவங்களைச்சேர்ந்ததாலேயே அவளால் அங்கு தொடர்ந்து வசிக்கமுடியவில்லை என்று குறிப்பிட்டு அலசிக்கொண்டிருந்தார்கள். கலாச்சாரத்தை விடுவோம்.. ஒன்றுமில்லை ஒரே கலாச்சாரமாக இருந்தாலும் கூடவே பெண்கள் ஒருகுடும்பத்திலிருந்து மற்றொன்றுக்கு வாழ்க்கைப்படும்போது வருகின்ற ப்ரச்சனைக்கும் இதற்கும் எனக்கு வித்தியாசமே தெரியவில்லை.

பதினைந்து வருடத்திற்கு பின் பழங்குடி கிராமத்தை மகளுக்கு காண்பிப்பதற்காக (புத்தகத்துகாகவும் இருக்கலாம்) சென்று பார்த்தபோது அவருடைய மூன்றாம் புத்தகத்தில் மூன்று மனைவிகளில் இவரை முதல்மனைவியாய் இன்றும் மதிப்பதாக குறிப்பிட்டிருக்கிறார் . இதுவும் நமக்கு ஆச்சரியத்தைக்கொடுக்காது . ஏனெனில் மனைவிகள் எத்தனை இருந்தாலும் தலைவன் உயர்ந்தவன். தலைவிகளின் வாழ்க்கையின் பின்புலத்தை அக்குவேறு ஆணிவேறாக அலசுவது தான் பண்பாடு..

உலகின் எந்த மூலையில் எந்த கலாச்சாரத்தைச்சேர்ந்தவனை அவள் கல்யாணம் செய்திருந்தாலும் ஈகோ , சந்தேகம் போன்ற ப்ரச்சனைகள் வர வாய்ப்புக்கள் இல்லையா என்ன? ஒரு பெண் இந்த புத்தகத்தை விமானத்தில் படித்ததால் ஜன்னல் வழி தூக்கிப் போடமுடியவில்லை என்றார். இந்த மாதிரியான எண்ணங்கள் எல்லாம் இதுவரை ஆண்களால் மட்டுமே பெண்களைப்பற்றி எழுதப்பட்டதாலே தான் இருக்கவேண்டும்.

--------------------

திரைப்பாடல்களில் கூட பல வருடங்களாக பெண் மன ஆசைகளை ஆண்களே எழுதி வந்ததற்கும் தாமரை வந்த பின் பெண்ணின் கோணத்தில் எழுதப்பட்ட பாடல்களுக்கும் மிகப்பெரிய வித்தியாசத்தைக் காணலாம். இன்னும் சொன்னால் ஆண்கள் காதல் வயப்பட்டு பாடும் சினிமாப்பாடல்கள் கூட தாமரை எனும் பெண்ணின் கவிதையின் மூலம் இன்னும் அழகாகத் தெரிவதாக நான் உணர்கிறேன்.

------------------------

ஆங்கில பதிவுகளில் நான் தொடரும் ரோசாரியாவின் பதிவில் பெண்களின் அன்றைய நிலை ஒரு இடத்தில் சுட்டப்பட்டபோது வயது வித்தியாசமில்லாமல் பலரும் அது இன்றும் தொடர்வதைப் பற்றி பேசிக்கொண்டிருந்தார்கள். The more things change, the more they remain the same...

----------------------------

சமீபத்தில் மீட்டுருவாக்கக்கதைகள் , புராணக்கதையில் இருக்கும் பெண்களின் நிலையை வேறு பார்வையில் ( வேறென்ன பெண்ணுக்காக யோசிக்கும் பார்வையில் தான் ) எழுதப்பட்டகதைகள் பற்றிய நிகழ்வொன்றினைப்பற்றி சுசீலாம்மா சொன்னார்கள். ஆனால் குழந்தைகளின் விடுமுறையால் என்னால் அதனைச் சென்றுபார்க்க முடியவில்லை. எவ்வளவோ காலங்களாக பெண்கள் குறைவாகவே எழுதுவதால் ஆண்களால் கட்டமைக்கப்பட்ட சமூக நீதிகளால், எப்பொழுதாவது எழுத்தென்னும் கூர்வாட்களுடன் புறப்பட்டால் அது பெண் எழுத்தென்றே கூறி சிறுமைப்படுத்தப்படுவதும் நடந்துகொண்டே இருக்கிறது.

-------------------------

பலகாலமாக நாம் சொல்லிக்கொண்டிருக்கிறோம் . பள்ளிப்பிள்ளைகளின் புத்தங்களில் அப்பா பேப்பர் படிக்கிறார். அம்மா சமைக்கிறாள் என்று இருக்கிறதே என்று. ஆனால் தற்போது மகனின் பள்ளிப்புத்தகத்தில் அம்மா புத்தகம் படிக்கிறாள். அப்பா செடிக்கு தண்ணீர் ஊற்றுகிறார். அம்மாவும் அப்பாவும் சமைக்கிறார்கள் என்று நான் அவனுக்கு சொல்லிக்கொடுக்கும்போது அட என்றபடி புத்தகத்தை வடிவமைத்தவர்களைத் தேடி முன்பக்கம் சென்றபோது அது பள்ளியின் தலைமை ஆசிரியையும் மற்றும் இரு ஆசிரியைகளும் என்று அறிந்தபோது பெண்களின் கைகளுக்கு ஒரு மந்திரக்கோல் கிடைத்தால் இப்படியே எல்லா சரியான இடங்களில் சரியானபடி பொருந்திப்போய்விடுமோ என்று தோன்றுகிறது.

நம்பிக்கை ஒளி

2011-03-10T11:27:00.000+05:30

தில்லியில் ஆண்டுபரிட்சைக் காலமிது. எங்கள் வீட்டு வேலைக்காரங்க எப்போதும் போலல்லாமல் மிகத்தாமதமாக வருகிறார்கள். விவரம் கேட்டபோது எப்போதும் குழந்தைகள் சமையலில் வீட்டுவேலைகளில் உதவுவார்கள் இந்த நேரத்தில் அவர்களால் உதவி செய்யமுடிவதில்லை அதனால் தானே எல்லாம் முடித்துவிட்டு வருவதால் ஏற்படும் தாமதமென்று கூறினார். மற்ற வீடுகளுக்கும் ( அவங்கள்ளாம் திட்டுவாங்களே) போய்விட்டு இங்கு வருவார்கள்.

அவர்களுக்கு 2 பெண் குழந்தைகள் ஒரு பையன். எல்லாரையும் நன்றாகப் படிக்கவைப்பதற்காகவே நான் அவர்களை மிக மதிப்பதுண்டு. அவர்களின் இரண்டாவது பெண் பள்ளி நடத்தும் இதழுக்காக ஒரு படைப்பை அனுப்பி அது வெளிவந்ததாகக் காண்பித்தார்கள். நீங்கள் என்னிடம் அடிக்கடி சொல்வீர்கள் ப்ளாஸ்டிக் பயன்படுத்தக்கூடாது என்று அதே போல என் மகளும் எழுதி இருக்கிறாள் என்று பெருமிதமாகச் சொன்னார்கள் , ஜெயந்தி. நான் எப்பவும் அவர்களுக்கும் லெக்சர் கொடுப்பது வழக்கம்.

அதிகமில்லையென்றாலும் நானும் அம்மாவிற்கு வீட்டில் வேலைகள் செய்துகொடுப்பது உண்டு. எங்கள் பள்ளியின் தலைமை ஆசிரியை டொமினிக் சிஸ்டர் எப்போதும் ஆண்டு விடுமுறைக்கு முன்பு ஒரு அறிவுரை வழங்குவார்கள். ”பெண்களே அம்மாவுக்கு உதவுங்கள்” என்று அந்தப்பேச்சைக் கேட்கும்போதே போன உடனே எல்லா வேலையும் இழுத்துப்போட்டு அம்மாவுக்கு உதவ வேண்டுமென்று தோன்றும். சமீபத்தில் நானும் என் மகளும் ,தோழி ஒருவர் வேலை செய்யும் பள்ளியின் ஆண்டுவிழாவுக்கு சென்று இருந்தோம் . அங்கு சிறப்பு விருந்தினராக ஸ்டீபன் கல்லூரியின் முதல்வர் வந்திருந்தார். அவரை இப்படியாக ஒரு பள்ளிக்கு அழைத்திருந்தார்களாம் அது மிக பணக்காரர்களின் குழந்தைகள் படிக்கும் பள்ளியாம். இவர்களுக்கு நான் என்ன அறிவுரை கூறிவிடமுடியும் நானோ ஒரு எறுமை மேய்த்துக்கொண்டிருந்த பையன் என்று நினைத்துக்கொண்டு பேசினாராம்.

”இன்றைய காலகட்டத்தில் படிப்பு என்பது மதிப்பெண் பெறுவது மட்டும் கற்றுக்கொடுக்கும் இடமாக இருப்பதால் தான் ஊழல் மலிந்து மக்கள் துன்புறுகிறார்கள் . குழந்தைகளும் பள்ளிப்படிப்பு என்று சொல்லிவிட்டு வாழ்க்கையின் பாடங்களை தெரிந்துகொள்வதில்லை. என் தாய்க்கு நான் சமையல் வேலையிலிருந்து மாடு மேய்ப்பது வரை உதவியபடியே தான் படித்தேன். அங்கே தான் வாழ்க்கை பாடம் இருக்கிறது என்றார். பெற்றோர்களே ஆணோ பெண்ணோ குழந்தைக்கு வாழ்க்கைப்பாடத்தை கற்றுத்தரத் தவறாதீர்கள் என்று”...அவ்வப்போது நானும் வேலைவாங்குவதால் மகளை நானும் அர்த்தத்துடன் பார்த்தேன். ஹுசைனம்மா கவலைப்படாதீங்க குழந்தைகளுக்கு வாழ்க்கைப்பாடத்தைத்தான் நாம் கற்றுத்தருகிறோம். :)

மூங்கிலில் பூத்து தொங்குது பூ

2011-02-28T11:26:00.005+05:30

அமைதிச்சாரல் வீட்டுத்தோட்டம் பற்றி பதிவிட்டிருந்தார்கள். அப்போது நான் பார்த்த மூங்கில் குழாய் தொட்டி பற்றி பின்னூட்டமிட்டேன். அதைப் புகைப்படமாக எடுத்துக் காண்பிக்குமாறு கேட்டிருந்தார்கள். நேற்று கடைத்தெரு பக்கம் போனேன். கைபேசியின் மூலமே புகைப்படமெடுத்து வந்தேன். இரவு வெளிச்சமென்பதால் சுமாராகத்தான் இருக்கிறது. ஆனால் ஒரு ஐடியாவிற்கு இங்கே.

மூங்கில் குழாயில் ஒரு பட்டை மட்டும் நீக்கிவிட்டு அதில் மண் நிரப்பி பூந்தொட்டியாக்கி பூக்களை பதியனிட்டு அதை இப்படி தொங்கவிட்டிருந்தார்கள் கடை வாசலில்...

இணையத்தில் தேடும்போது கிடைத்த படத்தை பாருங்களேன் ஆகா..

நன்றி ராமலக்‌ஷ்மி :)

இந்த ஐடியாவை சீக்கிரம் நானும் செய்து பார்க்க ஆசைப்படுகிறேன்.

எனக்குமூங்கிலென்றால் ரொம்ப பிரியம். வீட்டுல சோபா செட் கூட மூங்கில் தான். குளிர்காலத்தில் வெயிலில் உட்கார்ந்திருக்க மூங்கில் மோடா தான்.

ஆரோவில் கூட மூங்கிலுக்கென்று ஒரு தளம் வைத்திருக்கிறார்கள்.
----------------------------------------------

நம்ம லிட்டில்ஸ்டார் அவங்க அக்காவோடு சேர்ந்து ஒரு வேப்பமரம் வளர்க்கிறதாக கையெழுத்துப்போட்டு இருக்கிறார். இங்கே போய் பாருங்க அவருடைய பெருமிதத்தை...
-------------------------------------------------

இந்தவாரம் ஒரு தோழியோடு பேசிக்கொண்டிருக்கும் போது சொன்னார் எல்லாரும் பாலிதீன் பேக் ல் பொருட்களை வாங்கிக்கொண்டு போகும்போது நாம் மட்டும் வேண்டாமென்று சொல்லும்போது மற்றவர்கள் திரும்பிப்பார்ப்பது சங்கடமாக இருக்கிறது என்று.. ஆனால் உண்மையில் நாம் அந்த சங்கடத்தை அடையவேண்டியதே இல்லை. எனக்கும் இருக்கத்தான் செய்தது. ஆனால் வருடங்களாக இப்பொழுது அந்த பழக்கத்திற்கு வந்த பிறகு தற்போது சங்கடமும் இல்லை பெருமிதமும் இல்லை.. இயல்பாய் ஆகிவிட்டது.

கற்பக விருட்சம்

2011-02-23T12:12:00.000+05:30

ஒரு நாள் சுழன்று மறுநாள் ஆவதன்
இடைப்பட்ட பொழுதில்
நீள்கனவு
மூழ்கியவனை மீள்காட்டும்
கனவில் நீளும் கடற்கரைகள்

சுவடுகள் அழித்து அழித்து
அலையெழுதும் கதைகளில்
விதிகளின் வழிப்படியும்
வலியுடனும்
விட்டெறிந்த கல்லாக
ஆசைகள் மீள்வதைக் காணும்
அலையோசைக் கனவுகள்

பச்சையம் சமைக்கும் சருகுகள்
இயலாததில்லையென்று
முட்டி மோதி கிளைத்தெழுதலை
இட்டு நிரப்பும்
வளர்விருட்சக் கனவுகள்

இயல்பை மறந்த எதிராளியும்
குழப்ப முடிச்சின் நுனியும்
தோன்றுமொரு நாளின் கனவை
நனவாக்கும்
மந்திரக்கோல் தேடுதல்
மற்றொரு கனவின் தொடக்கமாகக் கூடும்.

ஈழநேசனில் 2009 ல் வெளிவந்த கவிதை

நாஞ்சில்நாடனுக்கு பாராட்டுவிழா - தில்லி தமிழ்ச்சங்கம்

2011-02-17T11:18:00.007+05:30

தில்லி தமிழ்ச்சங்கம் சார்பில் சாகித்ய அகாடமி விருதுபெற்ற திரு.நாஞ்சில் நாடன் அவர்களுக்கு பாராட்டுவிழா நடத்தப்பட்டது. வெளியே மழைக்காற்றும் சிலுசிலுப்புமாக இருந்தது. வழக்கம்போலவே போவதா வேண்டாமா குழப்பங்களுடன் முதல் முறையாக( இப்படியே எத்தனை முறை சொல்வேனென்று கேட்காதீர்கள்) நிஜம்மாகவே முதல் முறையாக இரண்டு பேருந்து(1மணிநேரம்) மாற்றித் தமிழ்ச்சங்க வாசலை அடைந்தேன்.

6 மணிக்கு தொடங்கவேண்டிய நிகழ்வு 6.30 வாக்கில் தொடங்கியது. பேராசிரியர் நாச்சிமுத்து அவர்கள் நாஞ்சில் நாடன் அவர்களை வாழ்த்தி நிகழ்வைத் தொடங்கிவைத்தார். நுணுக்கமான விவரங்களை காவியமரபில் வருவது போன்றே நாஞ்சில் நாடன் அவர்களின் படைப்பில் காணமுடிகிறது என்று சுட்டிக்காட்டினார். இன்றைய இளைஞர்களைத் தமிழின்பாலும் வாசிப்பின்பாலும் ஈர்க்கக்கூடிய கவர்ச்சியுடைய எழுத்தாளர்களில் இவரும் ஒருவர் எனப்பாரட்டினார். இந்த விருது சக தமிழனாக அனைவருக்குமே பெருமை அளிக்ககூடிய விருதென்று வாழ்த்தினார்.

அனைவரின் வாழ்த்துக்களையும் தன் நெஞ்சின் மீது கரம் வைத்து நாஞ்சில் நாடன் அவர்கள் மேடையில் ஏற்றுக்கொண்ட காட்சியே சிறப்பாக இருந்தது. இதயபூர்வமாக வரும் பாரட்டுக்களை இதயபூர்வமாகவே அவர் ஏற்றுக்கொண்டதன் அடையாளமாகவும் தோன்றியது.

இதழியலாளர் திரு ஏ.ஆர்.ராஜாமணி அவர்கள் விருதுகள் பெறுவது கூட பூர்வஜென்ம பலன் தான் என்று நகைச்சுவையுடன் பேசிக்கொண்டிருந்தார். சட்டதிட்டங்களுக்கு மத்தியில் அனைவருக்கும் சரியானபடி விருது போய்ச்சேர வழியில்லை. அப்படி சரியானபடி விருது வந்து சேர்ந்தால் பேரதிர்ஷ்டக்காரராகத்தான் இருக்கவேண்டும் என்று குறிப்பிட்டார். அரசாங்கத்துக்கு ஆலோசனைகளை கட்டுரைகளில் வழங்குவதை குறைத்துக்கொண்டு கதை நாவல்களில் அதிகம் கவனம் செலுத்துபடியாகவும் கேட்டுக்கொண்டார்.

ஒய்வு பெற்ற பேராசிரியை எம்.ஏ. சுசிலா அம்மா நாஞ்சில் நாடன் அவர்களின், விருது பெற்ற ’சூடிய பூ சூடற்க’ தொகுப்பிலிருந்து சில அறிமுகங்களைக் கொடுத்துப் பேசினார். ’யாம் உண்பேம் ‘ கதை பற்றிக் குறிப்பிட்டுப் பேசினார். ’மஞ்சனமாட்ட கனாக்கண்டேன்’ என வரும் இடம் பற்றிக் குறிப்பிட்டபோது நாஞ்சில் நாடன் அவர்களும் கதையில் அவ்வுணர்ச்சி மிக்க இடத்தினை நினைவு கூர்ந்து வருத்தப்பட்டார். எப்படி அவருடைய கதைகளில் மனிதம் ஓங்கி நிற்கின்றது என்று கூறி வனம் சிறுகதையையும் உதாரணமாகக் குறிப்பிட்டார்கள்.

தனக்கு தில்லியின் நகரமும் மக்களும் உணவும் பதட்டத்தை தருகின்றன ஆனால் நாஞ்சில் நாடனோ புலம்பெயர் உலகின் மண்வாசனையையும், ’நல் உணவும் நாப்பழக்கம்’ என்று உணவுப்பழக்கத்தையும், மண்ணின் மக்களையும் உள்வாங்கி அதன் வாடையை தன் படைப்பில் கொண்டுவருவது தனக்கு வியப்பளிக்கிறது என்றார். மேலும் பல நகரங்களுக்கும் நாடுகளுக்கும் சென்று நாஞ்சில் அவர்கள் தங்கினால் இன்னும் பல மண்ணின் மணத்தை நாம் அறிய வாய்ப்பாக இருக்குமென்ற தன் அவாவினை வெளிப்படுத்தினார்.

திரு பென்னேஸ்வரன் அவர்கள் பேசியபோது ”இன்றைய தினத்தில் இணையத்தில் சிலர் எல்லாம் தெரிந்ததைப் போல எழுதுகிறார்கள் - கூகிள் உதவியுடன், அவர்களின் வாசிப்பின் வீச்சும் பரப்பும் எனக்குத் தெரியும் ஆனால் இணையத்தில் செயல்படாத நாடன் எழுத்துக்களோ அசலாக இருக்கின்றன” என்று குறிப்பிட்டார். விருதுக்கு தகுதியான மனிதர் என்று அனைவராலும் ஒருமுகமாக நாஞ்சில் நாடன் பாராட்டப்பட்டார்.

விழா நாயகன் நாஞ்சில் நாடனின் மனைவி அவர்களையும் மேடையேற்றி அவருக்கும் மரியாதைகளை செய்து அவரையும் மேடையில் அமரவைத்தார்கள். நெகிழ்ச்சியுடன் அவர் அமர்ந்திருந்தார்.

விழாவுக்கு கூட்டம் பரவாயில்லை எனும்படியே இருந்தது. இலக்கியக்கூட்டங்களுக்கு அதுவும் அலுவலக தினத்தில் இது அதிகமே என்று பென்னேஸ்வரன் அவர்களும் குறிப்பிட்டார். அதனபடியும் கூட நாஞ்சில் நாடன் பேரதிஷ்டக்காரர் தான்.

திரைப்பட நடிகர் தாமு அவர்கள் தற்செயலாக நிகழ்ச்சியன்று தமிழ்சங்கம் வந்திருந்தார். அவரும் வாழ்த்திப்பேசினார். இருதயபூர்வமான கைத்தட்டல்களென்றால் இன்னும் உரத்து ஒலிக்கட்டுமென்று கேட்டார். பெற்றோரிடத்து அன்புமிக்கவராக இருந்திருக்கவேண்டும் அதனால் தான் இத்தகைய விருதினைப் பெற்றார் எனவே அவருடைய பெற்றோருக்கும் நற்றுணையாக இருக்கும் மனைவியை அளித்த மாமனார் மாமியாருக்கும் கூட கைத்தட்டல்களை வாங்கிக்கொடுத்தார். அப்படியே அடுத்த வருடம் அவர் இயக்குனாராக இருக்கிறாராம் அதற்கும் எங்களிடமிருந்தும் விருது பெற்ற சாம்பினிடமிருந்தும் ஆசிகளாக கைத்தட்டல்களைப் பெற்றுக்கொண்டார்.

நாஞ்சில் நாடன் அவர்கள் தன் படைப்புகளின் தரம் பற்றிய அதன் தகுதி பற்றிய நம்பிக்கையின் பேரில் விருதினை ஏற்றுக்கொண்டாலும் இதனைப் பெறாத ஆனால் தகுதியுடையமற்றவர்களை நினைவு கூர்ந்து பேசினார். அதன் உட்கருத்து இப்பேட்டியிலும் உண்டு. பரிசில் வாழ்க்கை தானே.. விருது என்பதும் அவசியம் தான். காலதாமதமாக அளிக்கப்படும் விருதுகளைத்தான் தான் விமர்சிப்பதாகவும் கூறினார். மேலும் ஏனைய மொழிகளில் விருதுபெற்றவர்களின் படைப்புகள் தமிழுக்கு முன் மிக சாதரணமாகவே தெரிகின்றதென்றும் தமிழில் விருதுபெறுவதற்கு தகுதியான படைப்புகள் பல இருந்தும் அவை அளிக்கப்படாமல் விடுபடுவதுதான் விமர்சிக்கப்படக் காரணமும் என்றார்.

விருது பெற்றதிலிருந்து தினம் வீட்டில் மூன்றரை லிட்டர் பால் வாங்கி விருந்தினரை உபசரிக்கும் மனைவியைப் பற்றியும் தொடர்ந்த வருகையால் இரண்டு நாள் குளிக்கக்கூட நேரமில்லாமல் போய்விட்டதென்றும் விருதினால் கிடைத்த பணமெல்லாம் தில்லியிலேயே கூட செலவழிந்தும் போய்விடலாமென்றும் நகைச்சுவையாக குறிப்பிட்டார். ஆனால் பணம் புகழ் பாராட்டு இதையும் தாண்டி விருது தனக்கு மட்டுமல்லாம் தன் மொழிக்கும் சக எழுத்தாளர்களுக்குமான ஒன்றாக அவர் பார்க்கின்றார்.

எழுத்தாளர்களின் சொற்கிடங்கு என்பது அம்புறாத்தூணி போல எடுக்கஎடுக்க குறையாத சொற்கள் நிறைந்ததாக இருக்கவேண்டுமென்று கூறி சொற்கள் அம்புகள் என்பதற்கு கம்பராமயணத்திலிருந்து உதாரணமளித்தார். தொன்மையான நம் மொழியின் பல சொற்கள் பயன்படுத்தப்படாமல் இருக்கின்றதென்றும் அவற்றை படைப்புகளில் பயன்படுத்துவது அவசியமென்றும் கூறினார். பயணங்களில் உணவு முக்கியமில்லை பயணங்களும் மனிதர்களை படிப்பதும் தனக்கு எப்படி உதவியதென்றார். விற்பனை பிரதிநிதியாக இருந்த நாட்களில் எப்படி அலுவலக வரவேற்பரையில் காத்திருக்கும் நேரங்களிலேலாம் தான் படித்துக்கொண்டிருந்ததையும் குறிப்பிட்டார்.

நாஞ்சில் உணவுகள் பற்றிய தன் புத்தகத்தை முடித்துவிட்டு கதை நாவல்கள் பக்கம் திரும்ப இருக்கிறாராம். இருந்தாலும் சமூகத்தைப்பற்றிய விமர்சனங்களை கட்டுரைகள் தானே சிறப்பாக வெளிப்படுத்தும் அதனை கதைகளில் வைத்து என்னபயன்? என்றும் கேட்டுக்கொண்டார்.

கேள்வி நேரம் என்று இரண்டு கேள்விகளுக்கு அனுமதியளிக்கப்பட்டிருந்தது. இரவு வெகுநேரமாகிவிட்டதென்பதால் நான் அதற்கு அமரமுடியவில்லை.

விருது அவருக்கு தாமதகமாக அளிக்கப்பட்டதாகச் சொன்னாலும் கூட, எப்போது அளிக்கப்பட்டாலும், அப்பொழுது தான் வாசிப்பின் பக்கம் திரும்பும் வாய்ப்புள்ள சிலர் அந்த தருணத்தில் இருக்கத்தானே இருப்பார்கள். அவர்கள் இதுபோன்ற ஏற்புரைகளை கேட்கும்போது இலக்கியத்தின் அமைதியான பக்கங்களையும் தெரிந்துகொள்ள வாய்ப்பாக அமையுமென்றே தொன்றுகிறது.

சுசீலாம்மாவின் விரிவான பதிவு இங்கே

காற்றுவெளியில் ஒரு கவிதை

2011-02-02T21:24:00.003+05:30

காற்றுவெளி இணைய இதழில் என் கவிதை மீள்பிரசுரம் செய்யப்பட்டிருக்கிறது. இதழின் பிற பக்கங்களையும் இங்கே வாசியுங்கள். முழு திரை என்று க்ளிக் செய்து இதழை ஒவ்வொரு பக்கமாக வாசிக்கலாம்..

சிதல் அரிக்கும் நாட்கள்

சிதல் அரிக்கும் நாட்கள்
பாதிவழியில் திரும்புவதே
வழக்கமாகி விடுகிறது.
ஒவ்வொரு முறையும்
பிழைகள் எதிர்கொண்டு
பின்னங்களில் வெற்றியாய்
திருப்பி அனுப்பும்
முடிவில்லா
வாழ்க்கைக்கணக்குகள்

சென்று மீண்ட வழிகளின்
பள்ளங்கள் மேடுகள்
பழகியென்ன?
தடைகளாய் முளைக்கிறது
உதவிக்காய் கொணர்ந்தவைகள்

கண்ணாடிச் சுவர் மீது
சப்தமெழுப்பும் வழி தேடல்
முடிச்சவிழ்க்க அவிழ்க்க
வளரும் ரகசியங்கள்
மாதங்களை வருடங்களை
இரக்கமில்லாமல்
உறிஞ்சியபடி
நாட்களில் புயற்கண் அமைதி

*சிதல் - கரையான்

மீனவர்களுக்காக டிவிட்டர் #tnfisherman

2011-01-31T21:57:00.000+05:30

50 சொச்சங்களில் மட்டுமே டிவிட்டிவிட்டு , சரிவரவில்லை என அதை மறந்தே போயிருந்தேன் . இந்த தொடர் முயற்சியில் கலந்துகொள்ளவே டிவிட்டர் பற்றி மீண்டும் புரிந்துகொண்டு தொடர்ந்து 1000 டிவிட்டுக்களை அடித்துள்ளேன். தொடரும் ஒவ்வொருவருக்கும் பாராட்டுக்கள்.

TN politicians, see #tnfisherman as a human rights issue not ur election issue
மேலும் போராட்டத்தின் விவரம் அறிய ஆல் இன் ஆல் ப்ளாகில் பதியப்பட்ட பதிவின் மீள்பதிவு இங்கே.

இதுவரை சென்று சேராத எவரேனும் இதை வாசித்து கையெழுத்திட , செய்திகளை அனுப்ப வாய்ப்பாக இங்கே பதியப்படுகிறது.
----------------------------------------------------------------------------------------------------

1. முழுமையான தகவல்கள் தொகுப்பு.

இதுவரை இலங்கைக் கடற்படையினரால் கொல்லப்பட்ட 539 மீனவர்கள் பற்றிய முழுமையான தகவல்களைத் திரட்ட வேண்டும். அவர்களது பெயர், ஊர், சம்பவம் நடைபெற்ற நாள், இடம் உள்ளிட்டவற்றோடு பத்திரிகைச் செய்திகள், பேட்டிகள் உள்ளிட்ட தரவுகளை முழுமையாக சேகரிக்க வேண்டும். நடைபெறும் பிரச்சனையை பேசுவதற்கு அடிப்படையான தகவல்கள் இவை.

பங்களிப்பு: நேற்று வந்திருந்த நண்பர்களில் சிலர் ஒரு சில பகுதிகளுக்கு நேரில் சென்று தகவல்களைத் திரட்ட பொறுப்பெடுத்துக் கொண்டனர். மேலும் சிலர், 539 மீனவர்களின் பெயர்கள் கொண்ட பட்டியல் இருப்பதாகவும், அதனை அளிப்பதாகவும் ஒத்துக்கொண்டனர். பொறுப்பேற்றுக் கொண்ட நண்பர்கள் தவிர மற்றவர்கள் இது சம்பந்தமான தகவல்கள் உங்களிடம் இருந்தாலோ, அல்லது திரட்டித் தர முடிந்தாலோ பதிவின் கடைசியில் இருக்கும் மின்னஞ்சல் முகவரிக்கு அவற்றை அனுப்பி வையுங்கள்.

2. பொதுநல வழக்கு (Public Interest Litigation)

மீனவர் பாதுகாப்பு குறித்து பொது நல வழக்கு ஒன்றும் தாக்கல் செய்வது என்று முடிவு செய்யப்பட்டுள்ளது. நேற்றைய சந்திப்புக்கு சில வழக்கறிஞர்களும் வந்திருந்தனர். இது சம்பந்தமாக நிலுவையில் இருக்கும் ரிட் மனுக்கள் பற்றியும், சட்ட விபரங்களும் அலசப்பட்டன.

பங்களிப்பு: வந்திருந்த உயர்நீதிமன்ற வழக்கறிஞர்களில் ஒருவர், தான் இப்பொறுப்பை ஏற்றுக்கொள்வதாக தெரிவித்துள்ளார். வரும் சனி அல்லது ஞாயிறு வழக்குத் தொடர்பான கூட்டம் ஒன்று நடைபெறும். மேலும் சில வழக்கறிஞர்களும் அக்கூட்டத்திற்கு வருவார்கள். சட்ட நுணுக்கங்கள் தெரிந்த மற்ற ஆர்வலர்களும் அதில் கலந்துகொள்ளலாம்.

3. ஊடகங்களோடு தொடர்பு

நமது தொடர்ந்த கவன ஈர்ப்பின் மூலம் சில ஊடகங்கள் மீனவர்களைப் பற்றி கட்டுரைகள் வெளியிட்டு வருகின்றன. ஆனால், வட இந்திய ஊடகங்கள் இன்னும் பாரா முகமாகவே இருக்கின்றன. தமிழ் மற்றும் ஆங்கில ஊடகங்களின் எடிட்டர்களை சந்தித்து இந்நிலையை விளக்கிச் சொல்லி, மீனவர் பாதுகாப்பு தொடர்பான செய்திகளை வெளியிடச் செய்வது என்று முடிவு செய்யப்பட்டுள்ளது. அவர்களை நாம் சந்தித்து ஒத்துக்கொள்ள வைப்பதற்கு #tnfisherman தொடர்ந்து ட்ரெண்டில் இருக்கவேண்டியது அவசியம்.

பங்களிப்பு: தமிழ் ஊடகங்களை தொடர்பு கொள்வதற்கென ஒரு குழுவினரும், ஆங்கில ஊடகங்களை தொடர்பு கொள்வதற்கு சிலரும் பொறுப்பேற்றுக் கொண்டுள்ளனர். கடந்த 5 நாட்களாக ட்ரெண்டில் இருந்து வந்த #tnfisherman இன்று காலையில் சில நிமிடங்கள் ட்ரெண்டில் இல்லாமல் போனது. அப்படி நேராமல், குறைந்த பட்சம் இந்த வாரம் முழுவதும் ட்ரெண்டில் நிலைத்து நிற்பதற்கு அனைவரின் ஒத்துழைப்பும் அவசியமாகின்றது. உங்களுக்கு 5 நிமிடம் ஓய்வு கிடைத்தாலும் 10 ட்வீட்டுகளாவது அனுப்பி இதனை தொடருங்கள். இது மிக மிக முக்கியமான விஷயம். நாம் சென்று எடிட்டர்களோடு பேசும்போது நான்கு நாட்கள் இருந்துவிட்டு இப்பொழுது இல்லாத ஒன்றைப் பற்றி பேச வேண்டாம் என்று ஒதுக்க முடியாத அளவிற்கு நம்முடைய தொடர் போராட்டம் இருக்கவேண்டும்.

4. ஆன்லைன் பெட்டிஷன்.

பிரதமருக்கு அனுப்புவதற்கென நாம் உருவாக்கியுள்ள ஆன்லைன் பெட்டிஷனில் இன்னும் பல்லாயிரக்கணக்கான கையொப்பங்கள் தேவைப்படுகின்றன. இதனை இன்னும் முன்னெடுக்க வேண்டியது அவசியம்.

பங்களிப்பு: நீங்கள் கையொப்பம் இடுவது மட்டுமின்றி உங்கள் நண்பர்கள், உடன் பணிபுரிவோர், உறவினர்கள் ஆகியோரிடமும் இதனைப் பற்றி எடுத்துரைத்து கையொப்பம் இடச்செய்யுங்கள். இப்பிரச்சனை உங்கள் சுற்று வட்டாரத்தில் விளக்கிச் சொல்லி இன்னும் பல கையொப்பங்கள் பெற்றுக் கொடுங்கள்.

5. அரசியல் கட்சியினரை சந்தித்து அவர்களை குரல் கொடுக்கச் செய்வது.

இதுவரை இப்பிரச்சனையில் கவனம் செலுத்தாத அரசியல் கட்சிகளின் தலைமையை அணுகி, இப்பிரச்சனை குறித்து அவர்களின் நிலைப்படை அறிவது, மற்றும் அவர்களையும் குரல் கொடுக்கச் செய்வது.

பங்களிப்பு: சில நண்பர்கள் தங்களது தொடர்புகள் மூலம் சில அரசியல் கட்சித் தலைவர்களை சந்திக்க முயல்கின்றனர். உங்களுக்கு அது போன்ற தொடர்புகள் இருந்தால் தெரியப்படுத்தி சந்திப்புகளுக்கு வகை செய்யுங்கள்.

6. சுஷ்மா ஸ்வராஜ் - நேரில் சந்திப்பது.

வரும் 4 ம் தேதி அன்று பாரதீய ஜனதாவின் சுஷ்மா ஸ்வராஜ் நாகப்பட்டிணம் வருகின்றார். அப்பொழுது வட இந்திய ஊடகங்களும் அவரது பயணத்தைப் பற்றி செய்தி வெளியிடுவார்கள். இந்தத் தருணத்தில் அவரை நேரில் சந்தித்து, முழுமையான தகவல்கள் அடங்கிய விளக்கங்களை நாம் நேரில் அளித்தால், மீனவர் பிரச்சனையை பற்றி விரிவான விவாதத்திற்கு வழி ஏற்படக்கூடும்.

பங்களிப்பு: அவரது சந்திப்புக்கு ஏற்பாடு செய்ய ஒரு நண்பர் முன்வந்துள்ளார். உங்களுக்கு தொடர்புகள் இருந்து அவரை சந்திக்க ஏற்பாடு செய்ய முடிந்தால் தகவல் தெரிவித்து ஏற்பாடுகள் செய்யுங்கள்.

==================================================================================

#tnfisherman போராட்டமானது அனைவரின் பங்களிப்போடும் நடைபெறுவது. தொடர்ந்து இதனை முன்னெடுத்துச் செல்வதே, ஒரு தீர்வு கிடைக்க வழி செய்யும். இங்கு நாம் குறிப்பிட்டுள்ள பங்களிப்புகளில் உங்களுக்கு எப்படியெல்லாம் முடியுமோ, அப்படியெல்லாம் பங்களித்து வாருங்கள். நம் சகோதரர்களைக் காக்க ஒன்றிணைந்துள்ள நாம் வெற்றி காண்பது அனைவரின் பங்களிப்பிலுமே உள்ளது. தொடர்ந்து ட்விட்டரிலும், மற்ற வழிகளிலும் ஒத்துழைப்பு வழங்குங்கள்.

நேற்றைய சந்திப்புப் பற்றிய twitlonger

http://www.twitlonger.com/show/8g8uc1

நேற்று நடைபெற்ற கூட்டம் பற்றிய பத்ரியின் பதிவு

http://thoughtsintamil.blogspot.com/2011/01/blog-post_31.html

நீங்கள் தகவல்கள் அனுப்ப வேண்டிய மின்னஞ்சல் முகவரிகள் :

savetnfisherman@gmail.com

tnfishermancampaign@gmail.com

பெட்டிஷன் அனுப்பும் சுட்டி

http://www.petitiononline.com/TNfisher/petition.html

வானவில் இற்றைகள் - ஜனவரி 2011

2011-01-27T10:20:00.002+05:30

இற்றைகள்* - அப்டேட்ஸ்

அந்தந்த நாட்களின் என் அனுபவங்களில் பகிர்ந்துகொள்ளப்பட வேண்டியவற்றை குழந்தைகளிடமும் பேசுவது வழக்கம். டிவிட்டரில் தமிழ்நாடு மீனவர்களுக்காக அனைவரும் #tnfisherman என குறிப்பின் கீழ் இணைந்து ஊடகத்தால் தங்கள் கவலைகளைப் பகிர்ந்துகொள்வதையும் ஆனால் தொலைக்காட்சி ஊடகத்தில் அவை வராதது பற்றியும் நானும் மகளும் பேசிக்கொண்டிருந்தோம்.
அதிரடியாக அவள் சொன்னாள்.

”டீவிக்காரங்களுக்கு யாராச்சும் லவ் செய்து தற்கொலை செய்துகொண்ட பையனைப்பற்றிப் பேசவே நேரம் போதாது. அவங்க எங்க உருப்படியா வேலை செய்யப்போறாங்க.. அவங்க பொலிட்டிக்கல் ஆளுங்களோட சேர்ந்துட்டாங்கம்மா “

இந்த வாரம் தான் நொய்டாவில் ஒரு ஷாப்பிங்மாலின் நான்காவது மாடியிலிருந்து ஒரு பையன் கீழே விழுந்து இறந்துவிட்டான். அவளுடைய தோழிகள் எல்லாம் அதுபற்றியே பேசிக்கொண்டிருந்திருக்கிறார்கள். மேலும் இது போன்ற ”நடந்தது என்ன?” எனும் மிரட்டும் பிண்ணனியோடு வரும் நிகழ்வுகளையே அவர்கள் விரும்பிப் பார்ப்பதாகவும் சொல்லிக்கொண்டிருந்தாள்.

------------------
பீம்சிங் ஜோஷி இறந்துவிட்டார் என்ற செய்தியைப்பற்றிப் பேசிக்கொண்டே இணையத்தில் அவர் படத்தைப் பார்த்துக்கொண்டிருந்தோம். தலையைத் திருப்பி சின்னவர் பார்த்தார். மீண்டும் காண்பிக்கச்சொல்லிப் பார்த்துவிட்டு. ..
வயசாகி நாமளும் செத்துப்போவோமா?
ஆமா
அப்பறம் திரும்பி பிறப்போமா?
ஆமா
அப்பன்னா நான் திரும்பி பிறக்கறதுக்கு முன்னயே நீங்களும் அப்பாவும் பிறந்துடுவீங்கன்னான்..
ஏண்டா அப்படி ?
அப்பறம் தான் நான் பிறப்பேன்.

அடுத்த ஜென்மத்துலயும் எங்களுக்கே மகனாக பிறக்க ஆசைப்படுகிறானே என்ன பேறு பெற்றோம்.

---------------------------
எங்கள் பகுதியில் குடியரசு தினவிழாக்கொண்டாட்டத்தில் மகன் லெமன் ஸ்பூனில் 3 வது பரிசும்
மகள் ம்யூசிக்கல் சேர் ல் 2 வது பரிசு.

தனியாக அக்காவும் தம்பியும் சென்றார்கள், வென்றார்கள், வெங்கலம் மற்றும் வெள்ளிமெடல்களுடன், வந்தார்கள்.
---------------------
ஆங்கிலமற்றும் கணித பயிற்சி ஏடுகளில் மூன்று நட்சத்திரம் எப்போதும் கிடைத்துவிடுகிறதாம்.
ஹிந்தியில் மட்டும் இரண்டு தான் என்று வருத்தப்படுவான். சின்னதாக ஒரு விசயம் நாம் மாற்றினாலும்
“ அய்யோ அந்த டீச்சர் அடிக்கடி கோவப்படுவாங்க இப்படி எதும் செய்யாதீங்க “ என்று பயப்படுவான்.

உன்னை இதுவரை திட்டியதில்லையே அப்பறம் ஏன்? என்றாலும் ஒரு குழப்பமான முகபாவம் தான் .
பள்ளியின் ஆசிரியர் சந்திப்பு தினத்தில் ஹிந்தி ஆசிரியை வேறு ஒரு தளத்தில் இருப்பதால் உங்களுக்கு எதுவும் பேச வேண்டுமானால் சென்று சந்திக்கலாம் என்று சொன்னார்கள்.
புத்தகக்கண்காட்சி ( பள்ளியில் ஆசிரியரை சந்திக்கும் தினத்தில் வைப்பார்கள் வியாபார உத்தி) செல்லும் ஆவலுடன் கூட,ஆசிரியையை சந்திக்கும் பயமும் சேர்ந்து கொள்ளவோ என்னவோ
”நான் தான் ஹிந்தி நல்லா படிக்கிறேனே எதுக்கு பார்க்கனும்.”
:)
------------------
புத்தகக்கண்காட்சியில் ஆக்டிவிட்டி செய்கிற புக் வேண்டாம் அதுபோல நிறைய வீட்டில் இருக்கிறது என்று நான் மறுத்ததற்கு ..
நான் கந்தி (கெட்ட) அம்மா ஆகிவிட்டேன்..

டிஸ்னியின் தி ஜங்கல் புக் வாங்கினான். அக்கா அடிக்கடி புத்தகம் வாங்கினாலும் முடித்துவிட்டுத்தான் மறுவேலை பார்ப்பாள் என்பதால் அவளைக்காட்டி நீ புத்தகம் வாங்கக்கூடாது. இனி இந்த புத்தகத்தை முழுதாக வாசித்துக் காண்பி அதற்குப் பிறகு தான் அடுத்த புத்தகம் என்று வேறு சொல்லிவிட்டேன். கொஞ்சம் ஆதங்கம் தான் .
------------------------
சபரியின் தளம் புதிய இடத்திற்கு மாற்றப்பட்டுள்ளது. அவருடைய நடனநிகழ்ச்சியின் காணொளி இற்றைப்படுத்தப்பட்டிருக்கிறது.

போகி அன்றைக்கே பொங்கல்

2011-01-18T12:31:00.002+05:30

thai.mp3

போகி அன்றைக்கே பொங்கி இருக்கோம் ல வானொலியில்

கானா ப்ரபா தொகுத்து வழங்கும் தித்திக்கும் வெள்ளி எனும் ஆஸ்த்ரேலிய வானொலி நிகழ்ச்சியின் போது பொங்கல் நினைவுகளைப் பகிரும் படி அழைத்திருந்தார். ஆனால் தொலைபேசி இணைப்பு கிடைத்த நொடி (அது நேரலை) தமிழ்நாட்டு பொங்கலைப்பற்றி என்று ஆரம்பித்தார். எனக்கு என்றைக்கும் என்னைச் சுற்றி நடப்பதை கூர்ந்து கவனிக்கும் பழக்கமெல்லாம் இல்லை :( நான் எதாவது ஒன்றை முக்கியமாக எடுத்துக்கொண்டு அதைதவிர எல்லாவற்றையும் அவுட் ஆஃப் ஃபோகஸில் வைத்திருப்பேன் சிலவற்றை மறந்தே போயிருப்பேன்.

என் ஊரைக்கூட முழுமையாகத் தெரிந்ததாகச் சொல்லமுடியாது. தற்போது மாயவரத்துக்காரர்கள் பலர் இங்கிருக்கிறார்கள்.. மாயவரத்துப் பொங்கல் இப்படி மட்டுமா என்று யாரும் கேட்டுவிடாதீர்கள். நான் கொண்டாடியதைத்தானே நான் சொல்லமுடியும். வீடு இருந்த இடத்தில் மாடு கன்னு வளர்த்தவர்கள் இல்லை. பொங்கலுக்கு எந்த விவசாய நிலம் வைத்த தோழிகள் வீட்டுக்கும் போனதில்லை. அதனால் என் வீட்டு பொங்கல் , என் நினைவில் தங்கி இருக்கும் பொங்கல் பற்றி சொல்லிக்கொண்டிருந்தேன். இடையில் புகுந்து எதோ கேள்வி கேட்க முயன்றிருக்கிறார் கானா :) நல்லதொரு நேயர் ப்ரண்ட்லி ஆள் கானா . நம்மை பேசும்போது இன்னும் பேசவைப்பது போன்ற வார்த்தைகளை இடையில் சொல்லி வைப்பார்.

அவருடைய நிகழ்ச்சியில் பலர் தண்ணி குடிச்சு குடிச்சு பேசுவாங்க . ஆனாலும் தொடர்ந்து பேச வாய்ப்பளிப்பார். ஏனென்று கேட்டபோது.

தமிழ்பேச அவர்களுக்கு இருக்கும் ஒரே ஒரு வாய்ப்பென்று சொல்லுவார் கானா.. எனக்கும் பழைய நினைவுகளை நினைத்துப்பார்க்க வாய்ப்பளித்தார் நன்றி.

--------------

தில்லியில் இவ்வருடம் குளிர்காற்றில் உறைந்து கொண்டிருந்தோம். ஆனால் போன வருடங்களைப்போல இல்லாமல் பொங்கலன்று கனிவோடு சூரியன் அழகாக முகம் காட்டினார். பொங்கல் பானையை திடீரென உதித்த யோசனையோடு கணவர் வெளியில் வை கும்பிடலாம் என்றார்கள். அவசரக்கோலமொன்று போட்டு பால்கனியில் வைத்து கும்பிட்டோம். கரும்பு காய்கறிகளோடு சாமியறையில் பொங்கல் வைத்தபோது படமெடுக்க மறந்துவிட்டது.

பொங்கல் பொங்கி சாமி கும்பிட்டு விட்டு மலைமந்திர் சென்று முருகனை வழிபட்டுவந்தோம். மதியம் நல்ல சுகமான வெயில் .

பால்கனியில் லஞ்ச்

பொங்கிய பொங்கலுக்கு தேங்காய்துவையலும் ,அப்பளம் வத்தலோடு பல காய் சாம்பாரும் , நெஸ்லே தயிரும் ... பிறகு கரும்பும் என பொங்கல் இனித்தது.

சக்கரைப்பொங்கலுக்கு அடிமையான பையர் ப்ரவுன் பொங்கல் தா தா என்று நாலு வேளையும் பொங்கலே சாப்பிட்டார்.

பொங்கல் பரிசாய் தமிழ்மண விருது - நன்றி

2011-01-17T12:54:00.003+05:30

சிறுவயதிலிருந்தே நான் அதிகமாக போட்டிகளில் கலந்து வழக்கமில்லை. மூன்றாம் வகுப்பிலிருக்கும் போது ஒருமுறை பாட்டுப்பாடி ஒரு பென்சில் வைக்கிற டப்பா பரிசு வாங்கியதை அடிக்கடி அப்பா அம்மா சொல்லிக்கொண்டிருப்பார்கள். அது நீலநிறமும் வெள்ளை மூடியுமா இருந்ததோ.. சரியாக நினைவில்லை.

அதற்கு பிறகு படித்த பள்ளிகளில் எதும் போட்டிகள் பரபரப்பாக நடந்ததுமில்லை. எட்டாம் வகுப்பு படிக்கும் போது ஒருமுறை பாட்டுப்போட்டிக்கு வகுப்பாசிரியையே தேர்ந்தெடுத்து அனுப்பிவைத்தார்கள். ரோட்டரி க்ளப் போட்டி. (பரிசு கிடைத்திருந்தால் தான் சொல்லி இருப்பேனே ? என்னன்னு யாரு கேட்பது) அத்தோடு சரி. கல்லூரியில் வயலினில் கோல்ட் மெடல் வாங்கிய கதை தான் முன்பே எழுதி இருக்கிறேனெ..

அதற்கு பிறகு காட்சிக்கவிதை பரிசு 500 ரூ புத்தகப் பரிசு அன்புடன் குழுமத்தின் ஆண்டுவிழாவில் கிடைத்தது. இணையம் தான் தன்னம்பிக்கை அளித்திருக்கிறது. போனவருடத்தின் தமிழ்மணப்போட்டியில் இருத்தலின் அடையாளமாக பதிவை சேர்த்திருந்தேன். பரிசு ஒன்றும் கிடைக்கவில்லை. மேலும் இந்த வருடம் அனுப்புவதற்கு என்னிடம் ஒன்று நல்ல பதிவு இருப்பதாக நான் நினைத்திருக்கவில்லை. நன்றாக எழுதியபதிவுகள் என நான் நினைப்பவற்றை நான் வேறு ஒரு தளத்துக்கு அளித்து பின் அவர்கள் வெளியிட்டபின் தான் என் பதிவில் இணைத்திருந்தேன். அதனால் அது தமிழ்மண விதிகளுக்குள் அடங்காது.

யோசித்தபடியே இருந்தபின் கடைசியாக பெண்கள் பிரிவில் மட்டும் வியல் விருதுகள் பதிவை இணைத்தேன். அது முழுக்க முழுக்க பெண்களை பேட்டிகண்டு எழுதிய பதிவு மற்றும் ஆக்கபூர்வமாக முன்னெடுத்துச் செல்ல அழைத்து அவர்களுக்கு வழங்குவதற்கான விருதை கூகிள் ஸ்கெட்சப் மூலமாக தயார் செய்து பின் நகர்படமாக மாற்றி பதிவிட்டதுமாகும். அப்பதிவின் உட்கருத்து , அனைவரிடமும் கருத்தினைப் பெற்று ஒருங்கிணைத்த முயற்சி, மேலும் வியல்விருதின் வடிவமைப்பு போன்றவற்றிற்காக அதனை போட்டியில் சமர்பிக்க தைரியம் பெற்றேன்.

என் பதிவின் 5 ம் வருட துவக்கத்திற்காக அப்பதிவினை எழுதத்தூண்டிய கோபிநாத் க்கு என் நன்றிகள். மேலும் தொடர்ந்து பதிவில் எழுதி வர ஊக்கமும் நம்பிக்கையும் அளிக்கும் இணைய நட்புகளுக்கும்.. என் குடும்பத்தினருக்கும் நன்றி.

வியல் விருது பதிவினை இரண்டு சுற்றுக்களிலும் தேர்ந்தெடுத்த நண்பர்களுக்கும் மூன்றாம் சுற்றில் தேர்ந்தெடுத்த தமிழ்மணம் குழுவினருக்கும் நடுவர்களுக்கும் நன்றி நன்றி.
வியல் விருதுக்கு இரண்டாம் பரிசு.

13 வது நாடகத்திருவிழா - மிருக விதூஷகம்

2011-01-12T18:45:00.002+05:30

நேஷனல் ஸ்கூல் ஆஃப் ட்ராமா பெயர் பலகையை பலமுறை வாசித்துக்கொண்டே
உள்ளே என்ன நடக்கும் என்று யோசித்துக்கொண்டே கடந்து போவோம். அதனைப்பற்றிய செய்திகளை பத்திரிக்கையில் வாசித்துக்கொண்டே எப்படித்தான் அவை நடக்கும் என்று பார்க்கவில்லையே இதுவரை என்று உள்ளூர எண்ணம் ஓடிக்கொண்டிருந்தது.

லிவிங் ஸ்மைல் வித்யா, தான் பங்கேற்கும் நாடகம், இயக்குனர் முருக பூபதியின் ‘மிருகவிதூஷகம்’ *அங்கே திறந்தவெளி அரங்கில் 11ம் தேதி இரவு நடக்குமென்று தொலைபேசியில் செய்தி அனுப்பினார். நானொரு கிறுக்கியைப்போல ‘குளிருமே’ என்று மறுசெய்தி அனுப்பிவிட்டு
யோசித்துக்கொண்டிருந்தேன். அன்றோ துணைக்கு அழைத்தால் வீட்டில் ஒருவருக்கும் வரும் வகையுமில்லை . மெட்ரோ துணையிருக்க , பெண்கள் பெட்டியும் இருக்க என்ன குறை.

திறந்தவெளி அரங்கின் வழி விசாரித்து நெருங்கிய போது நாடகத்தின் முதல்
காட்சியாகத்தான் இருக்கவேண்டும். விழுதுகள் தொங்கும் ஆலமரத்தின் மேடை முழுதும்
மணல் நிரப்பப்பட்டிருந்தது. வித்தியாசமான ஒளி அமைப்புகளும் மெல்லிய ஒலியாக குழுவினர் இசைப்பதும் அழகாக இருந்தது. அமர நாற்காலிகள் இருந்தும் வசதியானபடிக்கு நின்று கொண்டே தான் அந்த ஒன்றரை மணி நேர நாடகத்தை பலரும் பார்த்தோம். நாடகத்தில் பயன்படுத்தும் பொருட்களைப் பற்றி இயக்குனர் குறிப்பிட்டபடி இன்று பயன்பாட்டில் இல்லாத முறம், கோழிக்கூடைகள் ,சாக்கு போன்றவற்றையைக் கொண்டு அவர்கள் நாடகம் செய்கின்றதும் புல்லாங்குழல் மற்றும் மேளங்களின் ஒலியும் வேறு ஒரு வித்தியாசமான சூழலாக இருந்தது.

ஆரம்பக்கட்டங்களில் மிருகங்களாகவே மாறிவிட்டனரோ எனும்படி அவர்களின் ஒலியும் அசைவுகளும் இருந்தது. மிகச்சிரமப்பட்டுத்தான் நடிக்கின்றனர். விழுவதென்றால் நிஜமாக விழுகிறார்கள். இன்றைய நகரமயமாக்கலால் பாதிக்கப்பட்டும் இழிவுபடுத்தப்பட்டும் வரும் மக்களை அவர்களின் துயரங்களை பேசுகிறதாக அமைந்திருக்கும் நாடகத்தின் முதல் பகுதிகள். பின் இலவசங்களால் விளம்பரங்களால் தொழில்நுட்பத்தால் மதிக்கப்படாமல் மாறிவிட்ட மனிதர்களின் வாழ்நிலையைக் காட்டும் பகுதிகள். திறந்த வெளி தான் அந்நாடகத்துக்கும் நல்ல பொருத்தம்.

வித்யா நன்றாக செய்திருந்தார். டம் டம் என்ற ஓசையோடு அவர் ஆடிவருகின்ற காட்சி மிரட்டியது .

தொலைபேசியோடு பேசிக்கொண்டே அலையும் நகரக்காட்சியில் தமிழ் புரிந்தவர்கள் சிரித்து ரசித்தனர். என்ன இருந்தாலும் உரையாடல் சட்டென்று புரிபடுகிறதே. மற்ற பகுதிகள் புதிரான ஒரு நவீன பாணி இருப்பதும் அவசியமானதானாலும் எங்களுக்கு உரையாடல் பகுதிகள் எளிதாகப் புரிந்தது.

“எங்கள் பொருட்களைப் பயன்படுத்தியவர்கள் தான் சினிமாவில் செயித்திருக்கிறார்கள்.”

அனைவருக்கும் வழங்கப்படும் இலவச சுருக்கு கயிறு ,
“எனக்கும் கயிறுதான் குடுத்திருக்கிறார்கள்”
“எனக்கு இலவசம் வேண்டாம் சார் ப்ளீஸ் ப்ளீஸ்”
“குழாயடி சண்டையைப் படம் பிடித்து அனுப்பினால்” போன்ற பகுதிகளில் கூட்டத்தினர் ரசித்து சிரித்தனர்.

கதை சொல்லிகளும் உண்மைகளைச் சொல்லும் கோமாளிகளும் இல்லாது போன காலகட்டத்தில் அல்லது ஒழிக்கப்பட்டுவிட்ட காலத்தில் “ நல்ல கதை உண்மைக்கதை வேண்டாண்டா” என்று அவற்றை சொல்லவரும் இன்னோருவரை அடக்க நினைக்கிற இடங்கள் நன்று.

அழிக்கப்பட்ட அபூர்வ சிறு பூச்சிக்காகவும் குருவிகளுக்காகவும் மிருகங்களுக்காவும் கூட குரல் கொடுத்த விசயம் எல்லா ஊடகம் மூலமாகவும் சொல்லப்பட்டுக்கொண்டே இருக்கவேண்டிய விசயம் தான்.

காமெடி வகை நாடகங்களிலிருந்து நாட்டிய நாடகம் , இந்த நவீன நாடகம் வரை எது ஆனாலும் அதனதன் நிலையில் என்னை ரசிக்கவைக்கின்றன. துணுக்குத் தோரண காமெடி நாடகங்களைக்கூட எனக்கு வெறுக்கமுடியாது.

இன்னும் அந்த பிண்ணனி ஒலிகள் காதில் ஒலித்துக்கொண்டிருக்கிறது. வாழ்த்தி நினைவுப்பரிசை இயக்குனருக்கு வழங்கும்போது நடிகர்கள் அனைவரும் குலவையிட்டனர். அழைப்பனுப்பிய லிவிங் ஸ்மைல் வித்யாவுக்கு நன்றி. அவர்கள் குழுவினருக்கும் வாழ்த்துக்களும் நன்றியும்.